۲-کُرِنتھِیوں 13 - پنجابی نواں عہد نامہ نظرثانی شدہ چھپائی

اخِیری خبرداری تے سلام

¹ ہُن ترِیجی وار مَیں تُہاڈے کول آؤناں آں دو یا تِنّ گواہاں دی زبانی ہر اِک گلّ ثابت ہو جائے گی۔

² جیویں مَیں جد دُوجی وار حاضر ساں۔ تے پہلاں توں آکھ دِتّا سی۔ ایسے طرح ای ہُن حاضر نا ہو کے وی اوہناں لوکاں نُوں جِنہاں پہلاں گُناہ کِیتے نیں۔ تے ہور ساریاں لوکاں نُوں پہلوں ای آکھ دینا آں پئی جے فیر آواں تے چھڈاں گا نئیں۔

³ کیوں جو تُسی ایہدی دلیل چاہندے اوہ۔ پئی مسِیح میرے وِچ بولدا اے۔ تے اوہ ساڈے لئی کمزور نئیں۔ سگوں تُہاڈے وِچ زوراور اے۔

⁴ ہاں اوہ کمزوری دے سببّوں صلِیب دِتّا گیا پر خُدا دی قُدرت دے سببّوں زِندہ اے۔ تے اسی وی اوہدے وِچ کمزور تے آں پر اوہدے نال خُدا دی اوس قُدرت نال زِندہ ہوواں گے جیہڑی تُہاڈے لئی اے۔

⁵ تُسی اپنے آپ نُوں ازماؤ پئی اِیمان وِچ ہویا نئیں۔ اپنے آپ نُوں پرکھو تُسی اپنی بابت ایہہ نئیں جان دے پئی یِسُوع مسِیح تُہاڈے وِچ اے؟ نئیں تے تُسی نامقبُول اوہ۔

⁶ پر مَیں آس رکھنا آں پئی تُسی معلُوم کر لو گے پئی اسی تے نامقبُول نئیں۔

⁷ تے اسی خُدا توں دُعا منگنے آں۔ پئی تُسی کوئی بُریائی نا کرو۔ نا ایس لئی پئی اسی قبولے ہوئے معلُوم ہوئے۔ سگوں ایس لئی پئی تُسی نیکی کرو۔ بھانویں اسی نامقبُول وی ٹھہریئے۔

⁸ کیوں جو اسی سچیائی دے برخلاف کُجھ نئیں کر سکدے۔ پر نِرا سچیائی دے لئی کر سکنے آں۔

⁹ جدوں اسی کمزور آں تے تُسی زوراور تَد اسی خُوش آں تے ایہہ دُعا وی منگنے آں۔ پئی تُسی کامِل بنو۔

¹⁰ ایس لئی مَیں غیر حاضری وِچ ایہہ گلّاں لِکھنا آں۔ تاں جو حاضر ہو کے مَینُوں اوس اختیار دے سببّوں سختی نا کرنی پَوے۔ جیہڑا خُداوند مَینُوں بنان لئی دِتّا اے نا وگاڑن لئی۔

¹¹ سو بھراؤ! خُوش رہو۔ کامِل بنو۔ خاطرجمع رکھو۔ اِک دِل رہو۔ میل ملاپ رکھو۔ تے خُدا مُحبّت تے تسلّی دا سرچشمہ تُہاڈے نال ہوئے گا۔

¹² آپو وِچ پاک بوسہ لے کے سلام آکھو۔

¹³ سارے پاک لوک تُہانوں سلام آکھدے نیں۔

¹⁴ خُداوند یِسُوع مسِیح دا فضل تے خُدا دی مُحبّت تے پاک رُوح دی سنگت تُہاڈے سبھناں نال ہوندی رہے۔