۲-کُرِنتھِیوں 10 - پنجابی نواں عہد نامہ نظرثانی شدہ چھپائی

پَولُس اپنی خِدمت دا دفاع کر دا اے

¹ مَیں پَولُس جیہڑا تُہاڈے سامھنے عاجز تے پِٹھ پِچّھے تُہاڈے اُتّے دلیر آں۔ مسِیح دی حلِیمی تے نرمی یاد دوا کے آپ تُہاڈے اگّے عرض کرنا آں۔

² سگوں مِنّت کرنا آں۔ پئی مَینُوں حاضر ہو کے اوس بے دھڑکی نال دلیر نا ہونا پَوے جِس نال مَیں کئیاں لوکاں اُتّے دلیر ہون دا اِرادہ کرنا آں جیہڑے سانُوں ایس طرح سمجھدے نیں۔ پئی اسی جِسم دے سببّوں زِندگی کٹنے آں۔

³ کیوں جو اسی بھانویں جِسم وِچ زِندگی کٹنے آں پر جِسم دے سببّوں لڑدے نئیں۔

⁴ ایس لئی پئی ساڈی لڑائی دے ہتّھیار جِسمانی نئیں۔ سگوں خُدا دے اگّے قِلعیاں نُوں ڈھاہ سُٹّن جو گے نیں۔

⁵ سو اسی وہماں تے ہر اُچّی شے نُوں جِس خُدا دی پہچان دے برخلاف سِر چُکیا ہویا اے۔ ڈھاہ دینے آں۔ تے ہر اِک خیال نُوں قید کر کے مسِیح دا تابعدار بنا دینے آں۔

⁶ تے اسی تیار آں پئی جد تُہاڈی تابعداری پُوری ہوئے تے ہر طرح دی نافرمانی دا بدلہ لئیے۔

⁷ تُسی تے اوہناں شیواں نُوں ویکھدے ہو۔ جیہڑیاں اَکھّیاں اگّے نیں۔ جے کِسے نُوں اپنے اُتّے بھروسا ہوئے۔ پئی اوہ مسِیح دا اے۔ تے اپنے دِل وِچ ایہہ وی سوچ لَوے۔ پئی جیویں اوہ مسِیح دا اے۔ اوسے طرح اسی وی آں۔

⁸ کیوں جو جے مَیں ایس اختیار اُتّے کُجھ وَدّھ فخر وی کراں۔ جیہڑا خُداوند تُہاڈے بنان لئی مَینُوں دِتّا اے۔ تے تُہاڈے وگاڑن لئی نئیں۔ تے مَیں شرمندہ نا ہوواں گا۔

⁹ ایہہ مَیں ایس کر کے آکھنا آں پئی خطاں نال تُہانوں ڈران والا نا بناواں۔

¹⁰ کیوں جو آکھدے نیں پئی اوہدے خط تے ضرُور تاثِیر کرن والے زبردست نیں پر جد آپی موجُود ہوندا اے۔ تے ماڑا جِہیا معلُوم ہوندا اے۔ تے اوہدا بولنا ایویں کوِیں ای اے۔

¹¹ سو ایس طرح آکھن والا سمجھ چھڈے پئی جیویں پِٹھ پِچّھے خطاں وِچ ساڈا کلام اے اوہو جِہیا ای آپے ہوندیاں ہویاں ساڈا کمّ وی ہوئے گا۔

¹² کیوں جو ساڈے وِچ ایہہ حَوصلہ نئیں پئی اپنے آپ نُوں اوہناں بندیاں وِچ رلایئے۔ یاں اوہناں نال کوئی برابری کریئے جیہڑے اپنی نیک نامی جتاؤندے نیں۔ پر اوہ آپ ای اپنے آپ نُوں مَن کے تے اپنے آپ دی اِک دُوجے نال برابری کر کے نادان بن دے نیں۔

¹³ پر اسی اندازیوں وَدّھ فخر نا کراں گے۔ سگوں اوسے ای حد دے اندازے دے سببّوں جیہڑی خُدا ساڈے لئی مُقرّر کِیتی اے۔ جِہدے اندر تُسی وی آگئے ہو۔

¹⁴ کیوں جو اسی اپنے آپ نُوں حدّوں وَدّھ نئیں وَدھاندے جِہیا تُہاڈے کول نا اپڑن ویلے ہوندا۔ سگوں اسی مسِیح دی خُوشخبری دیندے ہوئے تُہاڈے کول اَپڑ گئے ساں۔

¹⁵ تے اسی اندازیوں وَدّھ کے یعنی ہورناں دِیاں محِنتاں اُتّے فخر نئیں کر دے۔ پر اُمّیدوار آں پئی جد تُہاڈے اِیمان وِچ وادھا ہوئے تے اسی تُہاڈے سببّوں اپنی حد دے سببّوں ہور وی وَدِھیئے۔

¹⁶ تاں جو تُہاڈیاں حداں توں پرانہہ خُوشخبری پُچایئے۔ نا پئی ہورناں دی حد وِچ بنیاں بنائِیاں شیواں اُتّے فخر کریئے۔

¹⁷ سو جیہڑا کوئی فخر کرے۔ سو خُداوند اُتّے فخر کرے۔

¹⁸ کیوں جو جیہڑا کوئی اپنی نیک نامی جتاؤندا اے۔ اوہ قبولیا ہویا نئیں۔ سگوں جِہنُوں خُداوند نیک نام ٹھہراؤندا اے اوہو ای قبولیا ہویا اے۔