۱-تِیمُتِھیُس 6 - پنجابی نواں عہد نامہ نظرثانی شدہ چھپائی

¹ جیہڑے نوکر جُولے ہیٹھ نیں اپنے اپنے مالکاں نُوں پُوری عِزّت دے قابل جانن۔ تاں جو خُدا دا ناں تے تعلِیم بدنام نا ہوئے۔

² تے جِنہاں دے مالک اِیمان والے نیں اوہ اوہناں نُوں بھرا ہون دے سببّوں حِقیر نا جانن سگوں ایس لئی وَدّھ کے اوہناں دی سیوا کرن۔ پئی فائدہ لین والے اِیماندار تے پیارے نیں۔ تُوں ایہناں گلّاں دی تعلِیم تے نصِیحت دے۔

جُھوٹھی تعلِیم تے حقیقی دَولت

³ جے کوئی بندہ ہور تعلِیم دیندا اے۔ تے ٹھیک گلّاں نُوں یعنی ساڈے خُداوند یِسُوع مسِیح دِیاں گلّاں تے تعلِیم نئیں مَندا جیہڑی دِینداری دے سببّوں اے۔

⁴ اوہ مغرُور اے تے کُجھ وی نئیں جان دا سگوں اوہنوں بحث تے لفظی جھگڑیاں دی بیماری اے۔ جِنہاں توں ساڑا۔ لڑائِیاں۔ تے بدگوئِیاں تے بدنِیتی۔

⁵ تے اوہناں بندیاں وِچ جھگڑے ہوندے نیں جِنہاں دی عقل وِگڑ گئی اے۔ تے سچیائی توں خالی نیں۔ تے دِینداری نُوں نفع لین دا وسیلہ سمجھدے نیں۔

⁶ ہاں دِینداری صبر دے نال تے بڑے نفع دا وسیلہ اے۔

⁷ کیوں جو نا اسی دُنیا وِچ کُجھ لیائے تے نا ہُن کُجھ ایہدے وِچوں لے جا سکنے آں۔

⁸ سو جے ساڈے کول کھان ہنڈان نُوں اے تے اوسے اُتّے صبر کریئے۔

⁹ پر جیہڑے دَولتمند بننا چاہندے نیں اوہ ایسے ای ازمایش تے پھاہی تے بُہت ساری واہیات تے نُقصان دین والِیاں خواہشاں وِچ پَھس جاندے نیں جیہڑیاں بندیاں نُوں بربادی تے مَوت دے دریا وِچ ڈوب دیندیاں نیں۔

¹⁰ کیوں جو پَیسے دی مُحبّت سارِیاں بُرائیاں دی اِک جڑ اے۔ جِہدی تانگھ وِچ بتھیریاں اِیمان ولّوں پرت کے اپنے دِلاں نُوں وَن سَونّے روگاں نال وِنّھ لیا اے۔

شخصی نصِیحتاں

¹¹ پر تُوں اَے خُدا دے بندیا۔ ایہناں گلّاں توں نَسّ تے راستبازی تے دِینداری تے اِیمان تے مُحبّت تے صبر تے حلِیمی دے مگر لگ۔

¹² اِیمان دی چنگی کُشتی گُھل اوس سدا دی زِندگی اُتّے قبضہ کر لے۔ جِہدے لئی سدّیا گیا سَیں۔ تے بتھیرے گواہاں اگّے چَنگا اِقرار کِیتا سی۔

¹³ مَیں اوس خُدا نُوں جیہڑا سارِیاں شیواں نُوں جوالدا اے۔ تے مسِیح یِسُوع نُوں جِس پُنطِیُس پِیلاطُس دے اگّے چَنگا اِقرار کِیتا سی گواہ کر کے تینُوں پَکّی کرنا آں۔

¹⁴ پئی ساڈے خُداوند یِسُوع مسِیح دے ظاہر ہون تِیکر حُکم نُوں بے نُقص تے بے عیب رکھ۔

¹⁵ اوہنوں اوہ چنگے ویلے وِچ ظاہر کرے گا۔ جیہڑا مُبارک تے اِکّو حاکم تے بادشاہاں دا بادشاہ تے خُداونداں دا خُداوند اے۔

¹⁶ بے انت زِندگی نِری اوہدی اے۔ تے اوہ چانن وِچ رہندا اے۔ جِتّھے کوئی اَپڑ نئیں سکدا۔ تے نا کِسے بندے اوہنوں ویکھیا اے۔ تے نا ویکھ سکدا اے۔ اوہدی عِزّت تے بادشاہی سدا تِیکر رہے۔ آمِین۔

¹⁷ ہُن دے جہان دیاں دَولت منداں نُوں حُکم دے۔ پئی مغرُور نا ہون تے قیم نا رہن والی دَولت اُتّے نئیں سگوں خُدا اُتّے آس رکھن۔ جیہڑا سانُوں سواد لین واسطے سارِیاں شیواں کُھلے دِل نال دیندا اے۔

¹⁸ تے نیکی کرن تے چنگے کمّاں وِچ دَولتمند بنن تے سخی ہون نُوں تیار تے مدد کرن اُتّے قیم ہون۔

¹⁹ تے اگّے واسطے اِک چنگی نِینّھ قیم کر رکھن۔ تاں جو اصلی زِندگی اُتّے قبضہ کر لین۔

²⁰ اَے تِیمُتِھیُس ایس امانت نُوں چنگی طرح رکھ۔ تے جیہڑے عِلم نُوں عِلم آکھنا ای نئیں چاہیدا۔ اوہدی واہیات بکواساں تے مخالفتاں اُتّے دھیان نا کر۔

²¹ بُہتے اوہدا اِقرار کر کے اِیمان ولّوں بُھل گئے نیں۔ تُہاڈے اُتّے فضل ہوندا رہے۔