۱-تھِسّلُنِیکوں 4 - پنجابی نواں عہد نامہ نظرثانی شدہ چھپائی

زِندگی جیہڑی خُدا نُوں پسند آؤندی اے

¹ باقی بھراؤ! اسی تُہاڈی مِنّت کرنے آں تے خُداوند یِسُوع مسِیح وِچ تُہانوں ایہہ نصِیحت کرنے آں۔ پئی جیویں تُساں ساڈے کولوں سِکھیا۔ پئی جیویں ٹُرناں تے خُدا نُوں خُوش کرنا چاہیدا اے تے جیویں تُسی ٹُر دے وی ہو اوسے طرح وَدھدے جاؤ۔

² کیوں جو تُسی جان دے ہو پئی اساں تُہانوں خُداوند یِسُوع ولّوں کِیہ کِیہ حُکم سُنایا۔

³ سو خُدا دی مرضی ایہہ اے پئی تُسی پاک بنو تے زنا توں بچے رہو۔

⁴ تے ہر اِک تُہاڈے وِچوں اپنے بدن نُوں پاکیزگی تے عِزّت نال قابُو رکھنا جانے۔

⁵ نا شہوت دے جوش نال اوہناں قوماں وانگر جیہڑیاں خُدا نُوں نئیں جان دِیاں۔

⁶ تے کوئی بندہ اپنے بھرا نال ایس گلّ وِچ وادھا تے دَغا نا کرے۔ کیوں جو خُدا ایہناں ساریاں کمّاں دا بدلہ دین والا اے۔ جیویں اساں پہلاں تُہانوں صاف صاف دس چھڈیا۔

⁷ ایس لئی پئی خُدا سانُوں پلِیتی دے واسطے نئیں پر پاکیزگی دے واسطے سدّیا اے۔

⁸ ایس واسطے جیہڑا نئیں مَندا اوہ بندے دی نئیں پر اوس خُدا دی گلّ نئیں مَندا جیہڑا تُہانوں اپنا پاک رُوح دیندا اے۔

⁹ پر بھراواں دی مُحبّت ولّوں تُہانوں کُجھ لِکھن دی لوڑ نئیں۔ کیوں جو تُساں آپو وِچ مُحبّت رکھنا خُدا کولوں سِکھیا اے۔

¹⁰ تے سارے مَکِدُنیہ دے سارے بھراواں نال ایسے طرح کر دے ہو۔ پر بھراؤ! اسی تُہانوں نصِیحت کرنے آں پئی ہور وی وَدھدے جاؤ۔

¹¹ تے جیویں اساں تُہانوں حُکم دِتّا تُسی ہِمّت کر کے چُپ چاپ رہو تے اپنا کمّ دھندا کرو تے اپنے ہتّھاں نال محنت کرو۔

¹² تاں جو باہر والے لوکاں نال بھلمانسی دے نال چلّو۔ تے کِسے شے دی لوڑ نا رکھو۔

خُداوند دی آمدِثانی

¹³ پر بھراؤ! اسی نئیں چاہندے۔ پئی تُسی اوہناں ولّوں نا واقف رہو۔ جیہڑے سَوں جاندے نیں۔ تاں جو تُسی ہورناں وانگر جیہڑے نا آس نیں غم نا کرو۔

¹⁴ کیوں جو جد سانُوں ایہہ یقِین اے پئی یِسُوع مر گیا تے فیر جی اُٹھیا۔ تے ایسے طرح خُدا اوہناں نُوں وی جیہڑے یِسُوع وِچ سَوں گئے نیں اوہدے نال لے آوے گا۔

¹⁵ سگوں اسی تُہانوں خُدا دے کلام دے سببّوں آکھنے آں پئی اسی جیہڑے جیونے آں تے خُداوند دے آؤن توڑی باقی رہاں گے سُتّیاں ہویاں توں کِسے طرح اگّے نا وَدھاں گے۔

¹⁶ کیوں جو خُداوند آپ اسمانوں اُتر آوے گا۔ اوس ویلے بڑی پُکار تے سردار فرِشتے دی اواز سُنائی دیوے گی۔ تے خُدا دی تُرہی وَجائی جائے گی۔ تے پہلاں اوہ جی اُٹھن گے جیہڑے مسِیح وِچ موئے ہوئے نیں۔

¹⁷ فیر اسی جیہڑے جِیوندے باقی ہوواں گے۔ اوہناں دے نال بدّلاں اُتّے چُکے جاواں گے تاں جو وَا وِچ خُداوند دی اگّوالی کریئے۔ تے ایس طرح سدا خُداوند دے نال رہاں گے۔

¹⁸ سو تُسی ایہناں گلّاں نال اِک دُوجے نُوں تسلّی دَیا کرو۔