۱-پطرس 5 - پنجابی نواں عہد نامہ نظرثانی شدہ چھپائی

خُدا دا گلّہ

¹ مَیں اوہناں نُوں نصِیحت کرنا آں جیہڑے تُہاڈے وِچوں بزُرگ نیں اوہناں وانگر بزُرگ تے مَیں وی آں تے مسِیح دے دُکھاں دا گواہ تے ظاہر ہون والے جلال وِچ سنگی آں۔

² پئی خُدا دے اوس اِجّڑ دی رکھوالی کرو۔ جیہڑا تُہاڈے وِچ اے۔ لاچاری نال نِگہبانی نا کرو۔ سگوں خُوش ہو کے خُدا دی مرضی نال۔ تے ناجائز نفع واسطے نئیں سگوں دِل دے شَوق نال۔

³ تے جیہڑے لوک تُہاڈے سپُرد نیں اوہناں اُتّے دابا نا پاؤ سگوں اِجّڑ لئی نمونہ بنو۔

⁴ تے جدوں وَڈا آجڑی ظاہر ہوئے گا۔ تے تُہانوں جلال دا اجیہا سِہرا مِلے گا جیہڑا کُملاؤندا نئیں۔

⁵ جوانو! تُسی وی بزُرگاں دی تابعیاں وِچ رہو اِک دُوجے دی سیوا واسطے عاجزی نال لکّ بنھیں رکھو۔ ایس لئی پئی خُدا مغرُوراں دا سامنا کر دا اے پر عاجزاں نُوں فضل دیندا اے۔

⁶ خُدا دے قُوّت والے ہتّھ دے ہیٹھ رہو تاں جو اوہ تُہانوں ویلے سر اُچّا کرے۔

⁷ تے اپنا سارا فِکر اوسے اُتّے سُٹ دیو۔ کیوں جو اوہنوں تُہاڈا فِکر اے۔

⁸ تُسی ہوش رکھو تے جاگدے رہو تُہاڈا وَیری ابلیس گرجن والے شیر وانگر لَبّھدا پِھردا اے پئی کِنوں پاڑ کھاواں۔

⁹ تُسی اِیمان وِچ پکّے ہو کے اوہدا سامنا کرو۔ کیوں جو تُسی جان دے ہو پئی تُہاڈے بھرا جیہڑے دُنیا وِچ نیں اجیہے ای دُکھ پئے سَہندے نیں۔

¹⁰ ہُن تُہاڈے تھوڑے چِر تِیکر تکلیف سہن دے پِچّھوں جیہڑا سارے فضل دا خُدا اے جِس تُہانوں مسِیح وِچ اپنے سدا دے جلال واسطے سدّیا اے۔ آپ ای تُہانوں کامِل تے قیم تے مضبُوط کرے گا۔

¹¹ اوڑک تِیکر اوسے دی بادشاہی رہے آمِین۔

اخِیری سلام

¹² مَیں تُہانوں سِلوانُس دی راہِیں جیہڑا میری سمجھ وِچ اِیماندار بھرا اے تھوڑا جِہیا لِکھ کے تُہانوں نصِیحت کِیتی تے ایہہ گواہی دِتّی پئی خُدا دا سَچّا فضل ایہو ای اے۔ ایسے اُتّے قیم رہو۔

¹³ اوہ کلِیسیا جیہڑی بابل وِچ تُہاڈے وانگر چُنی ہوئی اے تے میرا پُتر مرقس وی تُہانوں سلام آکھدے نیں۔

¹⁴ مُحبّت نال اِک دُوجے نُوں چُمّ کے سلام آکھو۔ تُہانوں سبھناں نُوں جیہڑے مسِیح وِچ ہو۔ تسلّی مِلدی رہے۔