۱-یُوحنّا 5 - پنجابی نواں عہد نامہ نظرثانی شدہ چھپائی

دُنیا تے ساڈا غلبہ

¹ جِہدا اِیمان اے۔ پئی یِسُوع ای مسِیح اے۔ اوہ خُدا توں جمّیا اے۔ تے جیہڑا کوئی جمان والے نال مُحبّت کر دا اے۔ اوہ اوہدے جمّیاں نال وی مُحبّت کر دا اے۔

² جدوں اسی خُدا دے نال مُحبّت کرنے آں۔ تے اوہدے حُکماں نُوں پُوریاں کرنے آں تے اوہدے توں معلُوم ہوندا اے۔ پئی خُدا دے پُتراں نال وی مُحبّت کرنے آں۔

³ تے خُدا دی مُحبّت ایہہ اے پئی اسی اوہدے حُکماں نُوں پُوریاں کریئے۔ تے اوہدے حُکم اَوکھے نئیں۔

⁴ جیہڑا خُدا توں جمّیا ہویا اے اوہ دُنیا نُوں جِت لَیندا اے۔ تے اوہ فتح جِہدے نال دُنیا جِتّی گئی اے ساڈا اِیمان اے۔

⁵ اوس بندے دے سِوا جِہدا اِیمان اے پئی یِسُوع خُدا دا پُتر اے۔ دُنیا نُوں جتن والا کون اے؟

یِسُوع مسِیح دے بارے گواہی

⁶ ایہہ اوہ اے جیہڑا پانی تے لہو دوہاں دی راہِیں آیا سی یعنی یِسُوع مسِیح نِرا پانی دے راہِیں نئیں۔ سگوں پانی تے لہو دو آں دی راہِیں۔

⁷ تے رُوح ای گواہی دین والا اے۔ کیوں جو رُوح سچیائی اے۔

⁸ تے گواہی دین والے تَرے نیں رُوح تے پانی تے لہو تے ایہہ تَرے اِکّو گلّ وِچ رَلدے نیں۔

⁹ جے اسی بندیاں دی گواہی منظُور کر لینے آں تے خُدا دی گواہی اودُوں وڈّی اے تے خُدا دی گواہی ایہہ اے۔ پئی اوس اپنے پُتر دے حق وِچ گواہی دِتّی اے۔

¹⁰ جیہڑا خُدا دے پُتر اُتّے اِیمان لیاؤندا اے گواہی اوہدے وِچ ای اے تے جِس خُدا دی گواہی نئیں مَنّی اوس اوہنوں جُھوٹھا بنایا۔ کیوں جو اوس گواہی اُتّے جیہڑی خُدا اپنے پُتر دی بابت دِتّی اوہنے اِیمان نئیں لیاندا۔

¹¹ تے اوہ گواہی ایہہ اے۔ پئی خُدا سانُوں سدا دی زِندگی دِتّی اے۔ تے ایہہ زِندگی اوہدے پُتر وِچ اے۔

¹² جِہدے کول پُتر اے اوہدے کول زِندگی اے۔ تے جِہدے کول خُدا دا پُتر نئیں اوہدے کول زِندگی وی نئیں۔

ہمیش دی زِندگی

¹³ مَیں تُہانوں جیہڑے خُدا دے پُتر دے ناں اُتّے اِیمان لیائے ہو ایہہ گلّاں ایس لئی لِکھیاں۔ پئی تُہانوں پتا ہوئے پئی سدا دی زِندگی تُہانوں مِلی اے۔

¹⁴ تے اوہدے اگّے ساڈا ایہو ای حَوصلہ اے۔ پئی جے اوہدی مرضی دے سببّوں کُجھ منگِئے اوہ ساڈی سُندا اے۔

¹⁵ تے جے اسی جاننے آں پئی جو کُجھ اساں منگیا اے اوہ ساڈی سُندا اے۔ تے ایہہ وی جاننے آں پئی جو کُجھ اساں اوہدے کولوں منگیا اے اساں لَبّھ لیا اے۔

¹⁶ جے کوئی اپنے بھرا نُوں اجیہا گُناہ کر دیاں ویکھے جِہدا انت مَوت نا ہوئے تے دُعا منگے خُدا اوہدی راہِیں اوہناں لوکاں نُوں زِندگی دیوے گا جِنہاں اجیہا گُناہ نئیں کِیتا جِہدا انت مَوت ہوئے۔ گُناہ اجیہا وی اے جِہدا انت مَوت اے۔ اوہدے لئی مَیں دُعا منگن نُوں نئیں آکھدا۔

¹⁷ ہر طرح دی بُرائی گُناہ اے۔ پر اجیہا گُناہ وی اے۔ جِہدا انت مَوت نئیں۔

¹⁸ اسی جاننے آں پئی جیہڑا خُدا توں جمّیا اے اوہ گُناہ نئیں کر دا سگوں اوہدی راکھی اوہ کر دا اے۔ جیہڑا خُدا توں جمّیا اے۔ تے اوہ شریر اوہنوں نئیں چھوندا۔

¹⁹ سانُوں پتا اے پئی اسی خُدا ولّوں آں تے ساری دُنیا اوس شریر دے ہتّھ وِچ پئی ہوئی اے۔

²⁰ تے ایہہ وی جاننے آں پئی خُدا دا پُتر آگیا اے۔ تے اوس سانُوں سمجھ دِتّی اے۔ تاں جو اوہنوں جیہڑا اصلی اے جانئے۔ تے اسی اوہدے وِچ۔ جیہڑا اصلی اے یعنی اوہدے پُتر یِسُوع مسِیح وِچ آں۔ اصلی خُدا تے ہمیشہ دی زِندگی ایہی اے۔

²¹ بچّیو۔ بُتاں توں اپنی راکھی کرو۔