۱-یُوحنّا 2 - پنجابی نواں عہد نامہ نظرثانی شدہ چھپائی

مسِیح ساڈا مددگار

¹ بچّیو! ایہہ گلّاں مَیں تُہانوں ایس لئی لِکھنا آں۔ پئی تُسی گُناہ نا کرو۔ تے جے کوئی گُناہ کرے تے باپ دے کول ساڈا اِک مددگار رہندا اے۔ تے اوہ یِسُوع مسِیح اے جیہڑا راستباز اے۔

² تے اوہ ساڈے گُناہاں دا کفّارہ اے۔ تے نِرے ساڈیاں دا ای نئیں سگوں ساری دُنیا دا وی۔

³ جے اسی اوہدے حُکماں نُوں منیئے تے سانُوں پتا لگدا اے۔ پئی اسی اوہنوں جاننے آں۔

⁴ جیہڑا ایہہ آکھدا اے پئی مَیں اوہنوں جاننا آں تے اوہدے حُکماں نُوں نئیں مَندا اوہ جُھوٹھا اے تے اوہدے وِچ سچیائی نئیں۔

⁵ آں جیہڑا اوہدے کلام نُوں مَندا اے۔ سَچّی مُچّی اوہدے وِچ خُدا دی مُحبّت پُوری ہوگئی اے ایس توں پتا لگدا اے۔ پئی اسی اوہدے وِچ آں۔

⁶ جیہڑا ایہہ آکھدا اے۔ پئی مَیں اوہدے وِچ رہنا آں۔ تے اوہنوں اوسے طرح ٹُرناں چاہیدا اے۔ جیویں اوہ ٹُردا ہوندا سی۔

نواں حُکم

⁷ پیاریو۔ مَیں تُہانوں کوئی نواں حُکم نئیں لِکھدا۔ سگوں اوہ ای پرانا حُکم جیہڑا مُڈھوں تُہانوں مِلیا سی۔ ایہہ پرانا حُکم اوہ ای کلام اے جیہڑا تُساں سُنیا سی۔

⁸ فیر تُہانوں اِک نواں حُکم لِکھناں آں۔ تے ایہہ گلّ اوہدے اُتّے تے تُہاڈے اُتّے ٹھیک آؤندی اے۔ کیوں جو ہنیرا ہَٹ دا جاندا اے تے سَچّا چانن چمکن لگ پیا اے۔

⁹ جیہڑا ایہہ آکھدا اے۔ پئی مَیں چانن وِچ آں تے اپنے بھرا نال وَیر رکھدا اے اوہ اجے تِیکر ہنیرے وِچ ای رہندا اے۔

¹⁰ تے جیہڑا اپنے بھرا نال مُحبّت رکھدا اے اوہ چانن وِچ رہندا اے تے اوہدے وِچ تے اوہنوں ٹھیڈا نئیں لگدا۔

¹¹ پر جیہڑا اپنے بھرا نال وَیر رکھدا اے اوہ ہنیرے وِچ ای اے۔ تے ہنیرے وِچ ٹُردا اے۔ تے اوہنوں پتا نئیں پئی مَیں کِتّھے لگا جاناں آں کیوں جو ہنیرے اوہدیاں اَکھّیاں اَنھیاں کر چھڈیاں نیں۔

¹² بچّیو! مَیں تُہانوں ایس کر کے لِکھنا آں۔ پئی اوہدے ناں سببّوں تُہاڈے گُناہ مُعاف ہوئے ہوئے نیں۔

¹³ بزُرگو۔ مَیں تُہانوں ایس کر کے لِکھنا آں۔ پئی جیہڑا مُڈھوں اے اوہنوں تُسی جان دے ہو۔ جوانو۔ مَیں تُہانوں ایس کر کے لِکھنا آں پئی تُساں شریر نُوں جِت لیا اے۔ مُنڈیو۔ مَیں تُہانوں ایس کر کے لِکھیا اے۔ پئی تُسی باپ نُوں جان دے ہو۔

¹⁴ بزُرگو۔ مَیں تُہانوں ایس کر کے لِکھیا اے۔ پئی جیہڑا مُڈھوں اے۔ اوہنوں تُسی جان گئے ہو۔ جوانو۔ مَیں تُہانوں ایس کر کے لِکھیا اے۔ پئی تُسی تگڑے ہو۔ تے خُدا دا کلام تُہاڈے وِچ رہندا اے۔ تے تُساں شریر نُوں جِت لیا اے۔

¹⁵ نا دُنیا نال مُحبّت رکھو۔ نا اوہناں شیواں نال جیہڑیاں دُنیا وِچ نیں۔ جیہڑا دُنیا نال مُحبّت رکھدا اے۔ اوہدے وِچ باپ دی مُحبّت نئیں۔

¹⁶ کیوں جو دُنیا وِچ جیہڑیاں شیواں نیں یعنی جِسم دی خواہش تے اَکھّیاں دی خواہش تے زِندگی دی شیخی اوہ باپ ولّوں نئیں سگوں دُنیا ولّوں نیں۔

¹⁷ دُنیا تے اوہدی خواہش ٹل جان گِئیاں پر جیہڑا خُدا دی مرضی اُتّے ٹُردا اے اوہ سدا تِیکر رہندا اے۔

مخالفِ مسِیح

¹⁸ مُنڈیو۔ ایہہ چھیکڑلا ویلا اے تے جِہیا تُساں سُنیا اے۔ پئی مسِیح دا وَیری آؤن والا اے سو ہُن وی مسِیح دے بتھیرے وَیری اُٹھ کھلوتے نیں۔ ایس توں اسی جاننے آں پئی ایہہ اخِیری ویلا اے۔

¹⁹ نِکلے تے اوہ ساڈے وِچوں ای سن۔ پر ساڈے نئیں سن۔ ایس لئی پئی جے اوہ ساڈے ہوندے تے ساڈے نال رہندے پر ایس لئی نِکل گئے تاں جو پَتا لگ جائے۔ پئی اوہ سارے ساڈے نئیں۔

²⁰ پر تُسی اوس قُدُّوس ولّوں مسَح کِیتے گئے ہو۔ تے تُسی سبھو کُجھ جان دے ہو۔

²¹ مَیں تُہانوں ایس کر کے نئیں لِکھیا۔ پئی تُسی سچیائی نُوں نئیں جاندے سگوں ایس کر کے پئی تُسی اوہنوں جان دے ہو۔ تے ایس لئی پئی کوئی جُھوٹھ سچیائی ولّوں نئیں۔

²² جیہڑا یِسُوع دے مسِیح ہون توں مُکّر دا اے۔ اوہدے سِوا ہور کون جُھوٹھا اے؟ مسِیح دا وَیری اوہو ای اے۔ جیہڑا باپ تے پُتر توں مُکّر دا اے۔

²³ جیہڑا پُتر توں مُکّر دا اے۔ اوہدے کول باپ وی نئیں۔ جیہڑا پُتر نُوں مَندا اے۔ اوہدے کول باپ وی اے۔

²⁴ جیہڑی گلّ تُساں مُڈھوں سُنی اے اوہ ای تُہاڈے وِچ رہے تے جیہڑی گلّ مُڈھوں تُساں سُنی اے جے اوہ تُہاڈے وِچ رہے۔ تے تُسی وی پُتر تے باپ وِچ رہو گے۔

²⁵ تے جیہڑی گلّ دا اوس ساڈے نال وعدہ کِیتا اے اوہ سدا دی زِندگی اے۔

²⁶ مَیں ایہہ گلّاں تُہانوں اوہناں لوکاں دی بابت لِکھیاں نیں جیہڑے تُہانوں فریب دیندے نیں۔

²⁷ تے تُہاڈا اوہ مسَح جیہڑا اوہدے ولّوں کِیتا گیا تُہاڈے وِچ قیم رہندا اے۔ تے تُہانوں ایس گلّ دی لوڑ نئیں۔ پئی کوئی تُہانوں سِکھائے۔ سگوں جیویں اوہ مسَح جیہڑا اوہدے ولّوں تُہاڈے اُتّے کِیتا گیا۔ تُہانوں سارِیاں گلّاں سِکھالدا اے تے سَچّا اے۔ تے جُھوٹھا نئیں تے جیویں اوس تُہانوں سکھایا اے۔ اوسے طرح اوہدے وِچ قیم رہو۔

²⁸ سو بچّیو! اوہدے وِچ قیم رہو۔ تاں جو اوہدے ظاہر ہون دے ویلے سانُوں دلیری ہوئے۔ تے اوہدے آؤن دے ویلے اوہدے اگّے سانُوں نموشی نا ہوئے۔

²⁹ جے تُسی ایہہ جان دے ہو۔ پئی اوہ راستباز اے تے ایہہ وی جان دے ہو۔ پئی جیہڑا راستبازی کر دا اے۔ اوہ اوہدے توں جمّیا اے۔