۱-کُرِنتھِیوں 8 - پنجابی نواں عہد نامہ نظرثانی شدہ چھپائی

بُتاں دی قُربانی دی ضیافتوں دے بارے سوال

¹ ہُن بُتاں دی قُربانی دی بابت ایہہ گلّ اے اسی جاننے آں پئی اسی سارے عِلم رکھنے آں۔ عِلم مان پَیدا کر دا اے پر مُحبّت ترقی دا سبّب اے۔

² جے کوئی خیال کرے پئی مَیں کُجھ جاننا آں تے وی جِنّاں جاننا چاہیدا اے۔ اوہو جِہیا اجے تِیکر نئیں جان دا۔

³ پر جیہڑا خُدا نال مُحبّت رکھدا اے خُدا اوہنوں پچھاندا اے۔

⁴ سو بُتاں دی قُربانی دا ماس کھان دی بابت اسی جاننے آں۔ پئی بُت دُنیا وِچ کوئی شے نئیں۔ تے بِناں اِک دے ہور کوئی خُدا نئیں۔

⁵ بھانویں اسمان تے زمین وِچ بتھیرے خُدا اکھواؤندے نیں۔ (جیویں بتھیرے خُدا تے بتھیرے خُداوند نیں۔)

⁶ پر ساڈے بھانیں تے اِکّوئی خُدا اے۔ یعنی ربّ جِہدے ولّوں سارِیاں شیواں نیں۔ تے اسی اوہدے لئی آں۔ تے اِکّوئی خُداوند اے۔ یعنی یِسُوع مسِیح جِہدی راہِیں سارِیاں شیواں بنیاں نیں۔ تے اسی وی اوسے دی راہِیں آں۔

⁷ پر سبھناں نُوں ایہہ عِلم نئیں۔ سگوں کئیاں نُوں اجے تِیکر بُت پُوجن دی عادت اے۔ ایس لئی اوس ماس نُوں بُت دی قُربانی جان کے کھاندے نیں۔ تے اوہناں دا دِل ایس کر کے پئی کمزور اے پلِیت ہو جاندا اے۔

⁸ کھانا سانُوں خُدا نال نئیں مِلاوے گا۔ جے نا کھایئے تے ساڈا کُجھ وِگڑدا نئیں۔ تے جے کھایئے تے کُجھ نفع نئیں۔

⁹ پر خبردار رہو۔ اجیہا نا ہوئے پئی تُہاڈی ایہہ کُھل کمزوراں دی ٹھوکر دا سبّب بن جائے۔

¹⁰ کیوں جو جے کوئی تینُوں عِلم والے نُوں بُت خانے وِچ کھانا کھاندیاں ہویاں ویکھے تے اوہ کمزور بندہ ہوئے۔ تے اوہدا دِل بُتاں دی قُربانی کھان لئی دلیر نا ہو جائے گا؟

¹¹ سو تیرے عِلم دے سببّوں اوہ کمزور بندہ یعنی اوہ بھرا جِہدی خاطر مسِیح مویا ہلاک ہو جائے گا۔

¹² تے تُسی ایس طرح بھراواں دے گُنہگار ہو کے تے اوہناں کمزور دِلاں نُوں زخمی کر کے مسِیح دے گُنہگار ہوندے ہو۔

¹³ ایس لئی جے کھانا میرے بھرا نُوں ٹھوکر کھواوے تے مَیں کدی وی ماس نا کھاں گا۔ تاں جو اپنے بھرا دے ٹھوکر کھان دا سبّب نا ہوواں۔