۱-کُرِنتھِیوں 7 - پنجابی نواں عہد نامہ نظرثانی شدہ چھپائی

ویاہ دے بارے سوالات

¹ جیہڑیاں گلّاں تُسی لِکھیاں مَیں اوہناں دی بابت پہلے ایہہ آکھنا آں۔ بندے لئی چَنگا اے پئی زنانی نُوں نا چُھوئے۔

² پر حرامکاری دے خطریوں ہر اِک مرد اپنی بیوی تے ہر اِک زنانی اپنا شوہر رکھّے۔

³ شوہر بیوی دا حق ادا کرے۔ ایسے طرح بیوی شوہر دا۔

⁴ بیوی اپنے جِسم دی مُختِیار نئیں۔ سگوں شوہر مُختِیار اے۔ ایسے طرح شوہر وی اپنے جِسم دا مُختِیار نئیں سگوں بیوی اے۔

⁵ تُسی اِک دُوجے توں وَکھ نا رہو پر تھوڑے چِر تِیکر سو ایہہ وی آپو وِچ رضامندی نال۔ تاں جو دُعا لئی ویہل مِلے۔ تے مُڑ کٹّھے ہو جاؤ۔ اجیہا نا ہوئے پئی نا جَرن دے سببّوں شیطان تُہانوں ازمائے۔

⁶ پر ایہدے وِچ مَیں اجازت دینا آں۔ حُکم نئیں دیندا۔

⁷ پر مَیں ایہہ چاہناں آں پئی جیہا مَیں آں اوہو جیہے سارے بندے ہون۔ پر ہر اِک نُوں خُدا ولّوں خاص خاص توفِیق مِلی اے۔ کِسے نُوں کِسے طرح دی کِسے نُوں کِسے طرح دی۔

⁸ مَیں بِن وِیاہیاں تے رَنڈِیاں دے حق وِچ ایہہ آکھنا آں پئی اوہناں دے لئی ایہو جیہا رہنا چَنگا اے جیہا مَیں آں۔

⁹ پر جے رُک نا سکن تے ویاہ کر لین۔ کیوں جو ویاہ کرنا مسَتی نالوں چَنگا اے۔

¹⁰ پر جِنہاں دا ویاہ ہوگیا اے اوہناں نُوں مَیں نئیں سگوں خُداوند حُکم دیندا اے۔ پئی بیوی اپنے شوہر نُوں نا چھڈے۔

¹¹ (جے چھڈے تے بے نکاحی رہے یا اپنے بندے نال فیر مِل کے رہے۔) تے نا ای شوہر بیوی نُوں چھڈے۔

¹² باقِیاں نُوں مَیں ای آکھنا آں نا خُداوند۔ پئی جے کِسے بھرا دی بیوی بے اِیمان ہوئے تے اوہدے نال رہن نُوں راضی ہوئے۔ تے اوہ اوہنوں نا چھڈے۔

¹³ تے جیہڑی زنانی دا شوہر بے اِیمان ہوئے تے اوہدے نال رہن نُوں راضی ہوئے۔ تے اوہ شوہر نُوں نا چھڈے۔

¹⁴ کیوں جو جیہڑا شوہر اِیماندار نئیں اوہ بیوی دے سببّوں پاک ہوندا اے۔ تے جیہڑی بیوی اِیماندار نئیں اوہ مسِیحی شوہر دے سببّوں پاک ہوندی اے۔ نئیں تے تُہاڈی اولاد پلِیت ہوندی۔ پر ہُن پاک اے۔

¹⁵ پر بندہ جیہڑا بے اِیمان ہوئے۔ جے اوہ وَکھ ہوئے۔ تے ہون دیو۔ اجیہے حال وِچ کوئی بھرا یا بھین بَدّھی ہوئی نئیں۔ تے خُدا سانُوں وی میل ملاپ لئی سدّیا اے۔

¹⁶ کیوں جو اَے زنانی! تینُوں کِیہ پَتا اے۔ پئی شاید تُوں اپنے شوہر نُوں بچا لئیں۔ تے بندیا! تینُوں کِیہ پَتا اے۔ پئی تُوں اپنی بیوی نُوں بچا لئیں۔

خُدا دے سَدّے دے حِساب نال جینا

¹⁷ پر جیہا خُدا ہر اِک نُوں حِصّہ دِتّا اے تے جیویں خُدا ہر اِک نُوں سدّیا اے۔ اوہ اوسے طرح ٹُرے۔ تے مَیں ساریاں کلِیسیاواں وِچ ایسے طرح حُکم دینا آں۔

¹⁸ تے جیہڑا سُنتی والا سدّیا گیا اے۔ اوہ نا سُنت نا ہو جائے۔ جیہڑا نا سُنتی دی حالت وِچ سدّیا گیا اے۔ اوہ سُنتی نا بَہے۔

¹⁹ نا تے سُنت کُجھ شے اے تے نا ناسُنتی سگوں خُدا دے حُکماں اُتّے ٹُرناں ای سبھ کُجھ اے۔

²⁰ ہر کوئی جِس حال وِچ سدّیا گیا اے اوسے وِچ رہے۔

²¹ جے تُوں غلامی دی حالت وِچ سدّیا گیا ایں۔ تے فِکر نا کر پر جے تُوں اَزاد وی ہو سکیں۔ تَد وی اوسے نُوں منظُور کر۔

²² کیوں جو جیہڑا غلام خُداوند وِچ سدّیا گیا اے اوہ خُداوند دا اَزاد کِیتا ہویا اے۔ ایسے طرح جیہڑا اَزادی دی حالت وِچ سدّیا گیا اے۔ اوہ مسِیح دا غلام اے۔

²³ تُسی مُل لَئے گئے ہو بندیاں دے غلام نا بنو۔

²⁴ بھراؤ! جیہڑا جیہڑی حالت وِچ سدّیا گیا اے۔ اوہ اوسے حالت وِچ خُدا دے نال رہے۔

کوارِیاں تے بیواؤاں دے لئی سوالات

²⁵ تے کوارِیاں لئی میرے کول خُداوند دا کوئی حُکم نئیں پر ایس کر کے۔ پئی میرے اُتّے دیانتدار ہون لئی اجیہا خُداوند ولّوں رَحم ہویا۔ مَیں ایہہ صلاح دینا آں۔

²⁶ سو ہُن دی مُصِیبت دا خیال کر کے میری رائے وِچ بندے دے لئی ایہو چَنگا اے۔ پئی جِہیا اے۔ اوہو جِہیا رہے۔

²⁷ جے تیری بیوی اے۔ تے اوہدے توں وَکھریاں ہون دی کوشش نا کر۔ تے جے تیری بیوی نئیں تے بیوی دی بھال نا کر۔

²⁸ پر جے تُوں ویاہ کر لیں۔ تے کوئی گُناہ وی نئیں۔ تے جے کواری وِیاہی جائے تے کوئی گُناہ نئیں۔ اجیہے بندے جِسم دا دُکھ پان گے تے مَیں تُہانوں بچانا چاہناں آں۔

²⁹ پر بھراؤ! مَیں ایہہ آکھنا آں۔ پئی ویلا تنگ اے۔ سو اگّے نُوں چاہیدا اے۔ پئی وَوہٹِیاں والے اجیہے ہون۔ پئی اوہناں دِیاں وَوہٹِیاں نئیں۔

³⁰ تے رون والے اجیہے ہون جیویں نئیں روندے۔ تے خُوشی کرن والے اجیہے ہون جیویں خُوشی نئیں کر دے۔ تے مُل لین والے اجیہے ہون جیویں مال نئیں رکھدے۔

³¹ تے دُنیا دے کاروبار کرن والے اجیہے ہون پئی دُنیا ای دے نا ہو جان۔ کیوں جو دُنیا دا رُوپ بدلدا جاندا اے۔

³² سو مَیں ایہہ چاہناں آں۔ پئی تُسی بے فِکر رہو۔ جیہڑا وِیاہیا ہویا نئیں۔ اوہ خُداوند دے فِکر وِچ رہندا اے۔ پئی کِسے طرح خُداوند نُوں خُوش کرے۔

³³ پر وِیاہیا ہویا دُنیا دے فِکر وِچ رہندا اے۔ پئی کِسے طرح اپنی بیوی نُوں خُوش کرے۔

³⁴ وِیاہی ہوئی تے نا وِیاہی وِچ وی فرق اے۔ نا وِیاہی ہوئی خُداوند دے فِکر وِچ رہندی اے تاں جو اوہدا جِسم تے رُوح دونویں پاک ہون۔ پر وِیاہی ہوئی زنانی دُنیا دے فِکر وِچ رہندی اے پئی کِسے طرح اپنے بندے نُوں خُوش کرے۔

³⁵ ایہہ مَیں تُہاڈے فائدے لئی آکھنا آں۔ نا تُہانوں پَھسان لئی۔ سگوں ایس کر کے پئی جو کُجھ ٹھیک اے اوہو عمل وِچ آوے تے تُسی خُداوند دی سیوا وِچ بے فِکر لگے رہو۔

³⁶ تے جے کوئی ایہہ سوچ کرے پئی مَیں اپنی اوس کواری دِھی دا حق مارنا آں جِہدی جوانی ڈَھلدی جاندی اے۔ تے نالے لوڑ وی معلُوم کرے۔ تے اوہنوں اختیار اے ایہدے وِچ کوئی گُناہ نئیں اوہ اوہنوں ویاہ دے۔

³⁷ پر جیہڑا اپنے دِل وِچ پَکّا ہوئے۔ تے اوہنوں لوڑ وی نا ہوئے سگوں اپنے اِرادے نُوں پُوریاں کرن وِچ پَکّا ہوئے۔ تے دِل وِچ اِرادہ کر لیا ہوئے۔ پئی اوہ اپنی دِھی نُوں بے نکاحی رکھّے گا۔ اوہ چَنگا کر دا اے۔

³⁸ سو جیہڑا اپنی کواری دِھی نُوں ویاہ دیندا اے اوہ چَنگا کر دا اے۔ تے جیہڑا نئیں وِیاہندا اوہ اودُوں چَنگا کر دا اے۔

³⁹ جد تِیکر زنانی دا بندہ جِیوندا اے اوہ اوہدے وَس وِچ اے۔ پر جد اوہدا بندہ مر جائے تے جِہدے نال مرضی ہوئے ویاہ کر سکدی اے۔ پر نِری خُداوند وِچ۔

⁴⁰ پر جے جِہی اے اوہو جِہی رہے۔ تے میری رائے وِچ اوہ بُہتی چنگی رہے گی۔ تے مَیں سمجھنا آں۔ پئی خُداوند دا رُوح میرے وِچ اے۔