۱-کُرِنتھِیوں 6 - پنجابی نواں عہد نامہ نظرثانی شدہ چھپائی

ہم اِیمان مسِیحیاں دے خلاف مُقدّمے

¹ تُہاڈے وِچوں کِسے نُوں ایہہ دلیری اے۔ پئی جد دُوجے دے نال مُقدّمہ ہوئے۔ تے فیصلے دے لئی بے دِیناں کول جاوے۔ تے پاک لوکاں کول نا جائے؟

² تُسی نئیں جان دے پئی پاک لوک دُنیا دا نیاں کرن گے؟ سو جد تُساں دُنیا دا نیاں کرنا اے۔ تے نِکّے توں نِکّے جھگڑیاں دے وی نبیڑیاں دے قابل نئیں ہو۔

³ تُسی نئیں جان دے پئی اسی فرِشتیاں دا نیاں کراں گے؟ تے ایس دُنیا دے مُعاملے دا فیصلہ نا کریئے؟

⁴ سو جے تُہاڈے وِچ دُنیا دے مُقدّمے ہون۔ تے اوہناں نُوں مُنصف مُقرّر کرو گے۔ جیہڑے کلِیسیا وِچ حِقیر سمجھے جاندے نیں؟

⁵ مَیں تُہانوں شرمندیاں کرن لئی ایہہ آکھنا آں۔ سَچ مُچ تُہاڈے وِچ اِک وی سیانا نئیں۔ جیہڑا اپنے بھراواں دا فیصلہ کر سکے؟

⁶ سگوں بھراواں بھراواں وِچ مُقدّمہ ہوندا اے۔ سو اوہ وی بیدیناں اگّے۔

⁷ پر اصل وِچ تُہاڈا وَڈا نُقص ایہہ اے۔ پئی آپو وِچ مُقدّمہ بازی کر دے ہو۔ ظُلم سہنا کیوں نئیں ہَچھّا سمجھدے۔ نُقصان کیوں نئیں منظُور کر دے؟

⁸ سگوں تُسی آپ ای ظُلم کر دے تے نُقصان پُہنچاندے ہو۔ تے اوہ وی بھراواں نُوں۔

⁹ تُسی نئیں جان دے۔ پئی بدکار خُدا دی بادشاہی دے وارث نا ہون گے؟ فریب نا کھاؤ۔ نا حرامکار خُدا دی بادشاہی دے وارث ہون گے۔ نا بُت پرست نا زناہی۔ نا لُچّے۔ نا مُنڈے باز۔

¹⁰ نا چور نا لالچی نا شرابی نا گالاں کڈھن والے نا ظالم۔

¹¹ تے کئی تُہاڈے وِچ اجیہے اے سن وی۔ پر تُسی خُداوند یِسُوع مسِیح دے ناں اُتّے تے ساڈے خُدا دے رُوح نال دھوئے گئے تے پاک ہوئے تے راستباز ٹھہرے۔

اپنے بدن خُدا دے جلال لئی اِستعمال کرو

¹² سارِیاں شیواں میرے واسطے روا تے نیں پر سارِیاں شیواں فائدے والیاں نئیں۔ سارِیاں شیواں میرے لئی روا تے نیں۔ پر مَیں کِسے شے دے قابُو وِچ نا ہوواں گا۔

¹³ کھانے ڈِھڈ لئی نیں تے ڈِھڈ کھانیاں لئی۔ پر خُدا اوہنوں تے اوہناں نُوں فنا کرے گا۔ پر بدن حرامکاری لئی نئیں سگوں خُداوند لئی اے۔ تے خُداوند بدن لئی۔

¹⁴ تے خُدا نے خُداوند نُوں جوالیا۔ تے سانُوں وی اپنی قُدرت نال جوالے گا۔

¹⁵ تُسی نئیں جان دے پئی تُہاڈے بدن مسِیح دے انگ نیں؟ سو مَیں مسِیح دے انگ لے کے کسبی دے انگ بناواں؟ کدی نئیں۔

¹⁶ تُسی نئیں جان دے پئی جیہڑا کسبی نال رلیا ہویا اے اوہدے نال اِک تَن ہو جاندا اے؟ کیوں جو اوہ آکھدا اے پئی اوہ دونویں اِک تَن ہون گے۔

¹⁷ تے جیہڑا خُداوند دی صُحبت وِچ رہندا اے اوہ اوہدے نال اِک رُوح ہو جاندا اے۔

¹⁸ حرامکاری توں نسّو جِنّے گُناہ بندہ کر دا اے اوہ بدن توں باہر نیں پر حرامکار اپنے بدن دا وی گُناہگار اے۔

¹⁹ تُسی نئیں جان دے پئی تُہاڈا بدن پاک رُوح دی ہیکل اے جیہڑا تُہاڈے وِچ وَسدا اے۔ تے تُہانوں خُدا ولّوں مِلیا اے۔ تے تُسی اپنے نئیں۔

²⁰ کیوں جو مُل لَئے گئے ہو۔ سو اپنے بدن نال خُدا دا جلال ظاہر کرو۔