۱-کُرِنتھِیوں 5 - پنجابی نواں عہد نامہ نظرثانی شدہ چھپائی

کلِیسیا وِچ حرامکاری

¹ ایتھوں تِیکر سُنن وِچ آیا اے۔ پئی تُہاڈے وِچ حرامکاری ہوندی اے۔ سگوں اِنج حرامکاری جیہڑی غیر قوماں وِچ وی نئیں ہوندی۔ پئی تُہاڈے وِچوں اِک بندہ اپنے پئیو دی بیوی رکھدا اے۔

² تے تُسی افسوس تے کر دے نئیں۔ تاں جو جِس ایہہ کمّ کِیتا اے۔ اوہ تُہاڈے وِچوں کڈھیا جائے۔ سگوں شیخیاں مار دے ہو۔

³ پر مَیں بھانویں جِسم ولّوں موجُود نئیں۔ پر رُوح ولّوں حاضر ہو کے موجُود وانگُوں۔ جیہا کرن والے دی بابت ایہہ حُکم دے دِتّا اے۔

⁴ پئی جد تُسی تے میری رُوح ساڈے خُداوند یِسُوع دی قُدرت نال اکٹّھے ہوؤ۔ تے جیہا بندہ ساڈے خُداوند یِسُوع دے ناں نال۔

⁵ جِسم دی ہلاکت لئی شیطان دے حوالے کِیتا جاوے تے جو اوہدی رُوح خُداوند یِسُوع دے دِن بچ جائے۔

⁶ تُہاڈا فخر کرنا چَنگا نئیں۔ تُسی نئیں جان دے ہو۔ پئی تھوڑا جیہا خمیر ساری تَون نُوں خمیرا کر دیندا اے؟

⁷ پرانا خمیر کڈھ کے اپنے آپ نُوں پاک کرو۔ تاں جو تازی تَون بن جاؤ۔ سو تُسی بے خمیر ہو۔ کیوں جو ساڈا وی فسح یعنی مسِیح قُربان ہویا۔

⁸ سو آؤ اسی عید کریئے نا پرانے خمیر نال تے نا بُرائی تے شرارت دے خمیر نال۔ سگوں صاف دِلی تے سچیائی دی بے خمیری روٹی نال۔

⁹ مَیں اپنے خط وِچ تُہانوں ایہہ لِکھیا سی۔ پئی حرامکاراں نال صُحبت نا رکھنا۔

¹⁰ ایہہ تے نئیں پئی بالکل دُنیا دے حرامکاراں یا لالچیاں یا ظالماں یا بُت پرستاں نال مِلنا ای نئیں۔ کیوں جو ایس طرح تُہانوں دُنیا وِچوں ای نِکلنا پَیندا۔

¹¹ پر تُہانوں مَیں ایہہ لِکھیا سی۔ پئی جے کوئی بھرا اکھوا کے حرامکار یا لالچی یا بُت پرست یا گالی کڈھن والا یا شرابی یا ظالم ہوئے تے اوہدے نال صُحبت نا رکھو سگوں اجیہے نال روٹی وی نا کھاؤ۔

¹² کیوں جو مَینُوں باہر والیاں اُتّے حُکم کرن دا کِیہ واسطہ اے؟ تُسی اندر والیاں اُتّے حُکم نئیں کر دے ہو؟

¹³ پر باہر والیاں اُتّے خُدا حُکم کر دا اے۔ سو اوس شریر بندے نُوں اپنے وِچوں کڈھ دیو۔