۱-کُرِنتھِیوں 4 - پنجابی نواں عہد نامہ نظرثانی شدہ چھپائی

مسِیح دے رسُول

¹ بندہ سانُوں اجیہا جانے پئی اسی مسِیح دے سیوائے تے خُدا دے بھیتاں دے مُختِیار آں۔

² تے ایتھے مُختِیار وِچ ایہہ گلّ ویکھی جاندی اے۔ پئی دیانتدار ہوئے۔

³ پر میرے بھانیں ایہہ نکمّی جیہی گلّ اے۔ پئی تُسی یا کوئی بندیاں دی عدالت مَینُوں پرکھے۔ سگوں مَیں آپ وی اپنے آپ نُوں نئیں پرکھدا۔

⁴ کیوں جو میرا دِل تے مَینُوں ملامت نئیں کر دا پر اوہدے توں مَیں راستباز نئیں ٹھہردا۔ سگوں میرا پرکھن والا خُداوند اے۔

⁵ سو جد تِیکر خُداوند نا آوے۔ ویلے توں پہلاں کِسے کمّ دا فیصلہ نا کرو اوہو ہنیرے دِیاں چُھپیاں ہویاں گلّاں نُوں روشن کر دے گا۔ تے دِلاں دے منصُوبے ظاہر کر دے گا۔ اوس ویلے ہر اِک دی وڈیائی خُدا ولّوں ہوئے گی۔

⁶ تے بھراؤ! مَیں ایہناں گلّاں وِچ تُہاڈی خاطر اپنا تے اُپلّوس دا ذِکر مِثال دے طَور کِیتا اے۔ تاں جو تُسی ساڈی راہِیں ایہہ سِکھّو پئی لِکھے ہوئے توں اگانہہ نا لنگھ جاؤ۔ پئی کوئی اِک دے نال ہو کے دُوجے دے برخلاف شیخی نا مارے۔

⁷ تیرے وِچ تے دُوجے وِچ ونڈ کون کر دا اے۔ تے تیرے کول کیہڑی اجیہی شے اے۔ جیہڑی تُوں نئیں لئی تے جد اوہ لئی ہوئی اے۔ تے فخر کیوں کرناں ایں؟ پئی لئی نئیں؟

⁸ تُسی تے پہلاں توں ای رجّے ہوئے اوہ۔ تے پہلاں توں ای دَولت والے اوہ۔ تے تُساں ساڈے بِناں بادشاہی کِیتی تے چَنگا سی پئی تُسی بادشاہی کر دے تاں جو اسی وی تُہاڈے نال بادشاہی کر دے۔

⁹ میری سمجھ وِچ خُدا سانُوں رسُولاں نُوں ساریاں توں چھیکڑلا بنا کے قتل ہون والیاں وانگُوں دھریا اے۔ کیوں جو اسی دُنیا تے فرِشتیاں تے بندیاں واسطے اِک تماشہ بن گئے آں۔

¹⁰ اسی مسِیح دی خاطر مُورکھ آں۔ پر تُسی مسِیح وِچ عقل والے ہو اسی ماڑے آں تے تُسی زور والے۔ تُسی عِزّت والے اسی بے عِزّت آں۔

¹¹ اسی ایس ویلے تِیکر بُھکھے تریہائے تے ننگے آں۔ تے ہُورے کھاندے تے آوارہ آں۔

¹² تے اپنے ہتّھاں نال محنت کرنے آں لوک بُرا آکھدے نیں اسی دُعا دینے آں۔ اوہ دُکھ دیندے نیں اسی سہنے آں۔

¹³ اوہ بدنام کر دے نیں اسی تَرلے کرنے آں۔ اسی اَج تِیکر دُنیا دے کُوڑے تے سبھناں دی مَیل آں۔

¹⁴ مَیں تُہانوں شرمندیاں کرن لئی ایہہ گلّاں نئیں لِکھدا سگوں پیارے پُتر جان کے مَت دینا آں۔

¹⁵ کیوں جو جے مسِیح وِچ تُہاڈے اُستاد دَس ہزار وی ہون۔ تَد وی تُہاڈے رُوحانی پئیو بتھیرے نئیں۔ ایس لئی پئی مَیں ای اِنجِیل دی راہِیں مسِیح یِسُوع وِچ تُہاڈا پئیو بنیا۔

¹⁶ سو مَیں تُہاڈی مِنّت کرنا آں پئی میرے وانگر بنو۔

¹⁷ ایس لئی مَیں تِیمُتِھیُس نُوں تُہاڈے کول گھلّیا۔ اوہ خُداوند وِچ میرا پیارا تے دیانتدار پُتر اے۔ تے میرے اوہناں مسِیحی طریقیاں دا تُہانوں چیتا کراوے گا۔ جِنہاں دی مَیں ہر تھاں دی کلِیسیا وِچ تعلِیم دینا آں۔

¹⁸ کئی اجیہی شیخی مار دے نیں۔ پئی جیویں مَیں تُہاڈے کول آؤنا ای نئیں۔

¹⁹ پر خُداوند دی مرضی ہوئی تے مَیں تُہاڈے کول چھیتی آواں گا۔ تے شیخی خوریاں دِیاں گلّاں نُوں نئیں سگوں اوہناں دی قُدرت نُوں معلُوم کراں گا۔

²⁰ کیوں جو خُدا دی بادشاہی گلّاں اُتّے نئیں سگوں قُدرت اُتّے قیم اے۔

²¹ تُسی کِیہ چاہندے ہو؟ پئی مَیں سوٹا لے کے تُہاڈے کول آواں یاں مُحبّت تے حلِیمی نال؟