۱-کُرِنتھِیوں 14 - پنجابی نواں عہد نامہ نظرثانی شدہ چھپائی

رُوح دِیاں نِعمتاں دے بارے ہور بیان

¹ مُحبّت دے طالب رہو۔ تے رُوحانی نِعمتاں دی چاہ رکھو۔ خاص کر ایس گلّ دی پئی نبُوّت کرو۔

² کیوں جو جیہڑا اوپری زبان وِچ گلّ کر دا اے۔ اوہ بندیاں نال گلّاں نئیں کر دا سگوں خُدا نال۔ ایس لئی پئی اوہدی کوئی نئیں سمجھدا بھانویں اوہ اپنی رُوح دی راہِیں بھیت دِیاں گلّاں آکھدا اے۔

³ پر جیہڑا نبُوّت کر دا اے۔ اوہ بندیاں دی ترقی تے نصِیحت تے تسلّی دِیاں گلّاں آکھدا اے۔

⁴ جیہڑا اوپری زبان وِچ گلّاں کر دا اے۔ اوہ اپنی ترقی کر دا اے۔ تے جیہڑا نبُوّت کر دا اے۔ اوہ کلِیسیا دی ترقی کر دا اے۔

⁵ بھانویں مَیں ایہہ چاہناں آں پئی تُسی سارے اوپری زبان وِچ گلّاں کرو۔ پر بُہتا ایہو ای چاہناں آں پئی نبُوّت کرو۔ تے جے اوپری زبان بولن والا کلِیسیا دی ترقی دے لئی ترجمہ نا کرے تے نبُوّت کرن والا اوہدے نالوں وَڈا اے۔

⁶ سو بھراؤ جے مَیں تُہاڈے کول آ کے اوپری زبان وِچ گلّاں کراں تے اِلہام یا عِلم یا نبُوّت یا تعلِیم دِیاں گلّاں نا کراں تے تُہانوں مَیتھوں کِیہ فائدہ ہوئے گا؟

⁷ ایسے طرح بے جان شیواں وی جِنہاں وِچوں اواز نِکلدی اے۔ بھانویں بانسری بھانویں بربط جے ایہناں دِیاں اَوازاں وِچ فرق نا ہوئے تاں جو کُجھ پُھوک ماریا یا وجایا جاندا اے۔ اوہ کِیویں پچھانیاں جاوے؟

⁸ تے جے تُرہی دی اواز صاف نا ہوئے۔ تے کون لڑائی دے لئی تیاری کرے گا؟

⁹ ایسے طرح جے تُسی وی زبان توں صاف گلّ نا آکھو تاں جو کُجھ آکھیا جاندا اے کِیویں سمجھیا جائے گا؟ تُسی وَا نال گلّاں کرن والے ٹھیرو گے۔

¹⁰ دُنیا وِچ کِنیاں ای وَن سَووَنِیاں بولیاں بھانویں ہون۔ پر اوہناں وِچوں کوئی وی بے معنے نا ہوئے گی۔

¹¹ سو جے مَیں کِسے بولی دے معنے نا سمجھاں تے بولن والے دے بھانے مَیں اوپرا ٹھہراں گا۔ تے بولن والا میرے بھانے اوپرا ہوئے گا۔

¹² سو جد رُوحانی نِعمتاں دی چاہ رکھدے ہو تاں ایہہ کوشش کرو پئی تُہاڈیاں نِعمتاں دے وَدھن نال کلِیسیا دی ترقی ہوئے۔

¹³ ایس لئی جیہڑا اوپری بولی وِچ گلّاں کر دا اے۔ اوہ دُعا منگے پئی ترجمہ وی کر سکے۔

¹⁴ سو جے مَیں کِسے اوپری بولی وِچ دُعا منگاں تے میری رُوح تے منگدی اے۔ پر میری عقل نکمّی اے۔

¹⁵ سو کِیہ کرناں چاہیدا اے؟ مَیں رُوح نال وی دُعا منگاں گا تے عقل نال وی دُعا منگاں گا۔ رُوح نال وی گاواں گا تے عقل نال وی گاواں گا۔

¹⁶ نئیں تے جے تُوں رُوح نال ای حمد کریں گا تے ناواقِف بندہ تیری شُکر گُزاری اُتّے آمِین کِس طرح آکھے گا؟ ایس لئی پئی اوہ نئیں جان دا پئی توں کِیہ آکھنا ایں۔

¹⁷ تُوں تے بے شک چنگی طرح نال شُکر گُزاری کرنا ایں پر دُوجے دی ترقی نئیں ہوندی۔

¹⁸ مَیں خُدا دا شُکر کرنا آں پئی مَیں تُہاڈے سبھناں نالوں وَدّھ بولیاں بولنا آں۔

¹⁹ پر کلِیسیا وِچ اوپری بولی وِچ دَس ہزار گلّاں آکھن نالوں مَینُوں ایہہ بُہتا چَنگا لگدا اے پئی ہورناں نُوں سکھان دے لئی پنج ای گلّاں آکھاں۔

²⁰ بھراؤ! تُسی سمجھ وِچ بچّے نا بنو۔ بُریائی وِچ تے بچّے رہو پر سمجھ وِچ جوان بنو۔

²¹ توریت وِچ لِکھیا اے۔ پئی خُداوند آکھدا اے مَیں اوپریاں زباناں تے اوپریاں ہونٹھاں نال ایس اُمّت نال گلّاں کراں گا۔ تَد وی ایہہ میری نا سُنن گے۔

²² سو اوپریاں زباناں اِیمانداراں لئی نئیں سگوں بے اِیماناں لئی نِشان نیں۔ تے نبُوّت بے اِیماناں لئی نئیں سگوں اِیمانداراں لئی نِشان اے۔

²³ سو جے ساری کلِیسیا اِک تھاں وِچ اکٹّھی ہوئے۔ تے ساریاں دے سارے اوپریاں زباناں بولن تے ناواقِف بے اِیمان لوک اندر آ جان۔ تے اوہ تُہانوں پاگل نا آکھن گے؟

²⁴ پر جے سارے نبُوّت کرن تے کوئی بے اِیمان یا ناواقِف اندر آ جائے۔ تے سارے اوہنوں قائل کر دین گے۔ تے سارے اوہنوں ازما لین گے۔

²⁵ تے اوہدے دِل دے بھیت ظاہر ہو جان گے تے اوہ مُنھ پرنیں ڈِگّ کے خُدا نُوں سجدہ کرے گا۔ تے اوہ اِقرار کرے گا۔ پئی بے شک خُدا تُہاڈے وِچ اے۔

کلِیسیا وِچ ترتیب

²⁶ سو بھراؤ! کِیہ کرنا چاہیدا اے؟ جد تُسی اکٹّھے ہوندے ہو تے ہر اِک دے دِل وِچ زبُور یا تعلِیم یا مُکاشفہ یا اوپری زبان یا ترجمہ ہوندا اے۔ سبھ کُجھ رُوحانی ترقی دے لئی ہونا چاہیدا اے۔

²⁷ جے اوپری بولی وِچ گلّاں کرنِیاں ہون تے دو دو یا وَدّھ توں وَدّھ تِنّ تِنّ بندے واری واری نال بولن۔ تے اِک بندہ ترجمہ کرے۔

²⁸ تے جے کوئی ترجمہ کرن والا نا ہوئے تے کلِیسیا وِچ چُپ کِیتی رکھّے تے اپنے دِل نال تے خُدا نال گلّاں کرے۔

²⁹ نبیاں وِچوں دو یا تِنّ بولن تے باقی اوہناں دے کلام نُوں ازمان۔

³⁰ پر جے دُوجے کولدے بَیٹھے ہوئے اُتّے وحی اُترے تے پہلا چُپ کر جائے۔

³¹ کیوں جو تُسی ساریاں دے سارے اِک اِک کر کے نبُوّت کر سکدے ہو تاں جو سارے سِکھّن تے سبھناں نُوں نصِیحت ہوئے۔

³² تے نبیاں دِیاں رُوحاں نبیاں دے تابعیاں نیں۔

³³ کیوں جو خُدا گڑبڑی دا نئیں سگوں امن دا بانی اے۔ جیویں پاک لوکاں دِیاں سارِیاں کلِیسیاواں وِچ اے۔

³⁴ زنانِیاں کلِیسیا دی مجلس وِچ چُپ کِیتیاں رہن کیوں جو اوہناں نُوں بولن دا حُکم نئیں سگوں تابعیاں رہن جیویں توریت وِچ وی لِکھیا اے۔

³⁵ تے جے کُجھ سِکھنا چاہن تے اپنے گھر وِچ اپنے اپنے خصماں نُوں پچُھّن۔ کیوں جو زنانی دا کلِیسیا دی مجلس وِچ بولنا شرم دی گلّ اے۔

³⁶ خُدا دا کلام تُہاڈے وِچوں نِکلیا اے؟ یا نِرا تُہاڈے کول ای اَپڑیا اے؟

³⁷ جے کوئی اپنے آپ نُوں نبی یا رُوحانی سمجھے تے ایہہ جان لَئے پئی جیہڑیاں گلّاں مَیں تُہانوں لِکھنا آں اوہ خُداوند دے حُکم نے۔

³⁸ پر جے کوئی نا جانے تے نا جانے۔

³⁹ سو بھراؤ! نبُوّت کرن دی چاہ رکھو۔ تے بولیاں بولن توں منع نا کرو۔

⁴⁰ پر سارِیاں گلّاں دُرستی تے ٹھیک طریقے نال ہون۔