Yʉ̂d 1 - Kálara Zyɛ̌m Edwán é mpʉ̌n

Moswɨhlɨ

¹ Mɛm, Yʉd, syɛl mosa mo Yesʉs-Krɨst, ndɨ nteme mɨɔ mo Jacques ɨ, ó lé etile bɨn kalara nwa. Me etile ó, bʉr Zyɛm Sɔŋ a jebe ndwe le ekpɛl, baa ndɨ ebaʼlɔ é zyɛŋa wɔɔ boo Yesʉs-Krɨst ɨ.

² Njwɨʼa-nkoo e motala ndwe e kpɛl, byé diʼe e bɨn é ntuʼ-ntu-ntuʼ.

Mɨmpʉmpʉl mɨ oyeʼle

³ Obɨɔ o kpɛl bam aa! Me a taare bee ó, sa ndɨ ekʉ jala ɛ, yé a be ó, me tila bɨn é lɔb tiʼ molu mo mpoʼ mɨmɛh, e mpʉ bɨna bé a bi ga tiʼ yaa mbi ngwar ɨ. No ó, me a ze bee ó, me ófuo ka tile bɨn ó, bɨn lwimla dɔm. Dɔm laa, lé ó, bɨna kamla ga e buʼo ga yina, yé diʼe mpʉ Zyɛm a bɛa ntɨh mɨsaŋ mɨ bʉr be ya ɛ.

⁴ Bʉʉ bʉr, bɨ ni é l'esama lɨn é myaaa, bɨn l'agʉa! Okalara lé edwe be mobe, le ekab be bɨntɨʼa byɔɔ ɛ, bɨ bɛa tilɔ. Bɛɛ, bé adwaabe Zyɛm. Bé edwe bɨn sikʉlʉ lé egomlo bʉr mo Zyɛm Sɔŋ ga wina é bebebebe zi, lé elɛɛ ó ncwɨncwɨa we, wé e nyɔm ó, bʉr saʼ bɨmala zam e l'ekomo. Bé nteme, bé ekɛla ó, Njwɨʼa ga wina Yesʉs-Krɨst, nye abe Tî ga wina boo nɔɔ.

⁵ Bɨn dam gʉa sa yaa, me paʼ jɨm bɨn bɨtoŋla é lɔb wi: Sa efoʼ, yé ó, é jɔʼ Da a dwih kul bʉr ye é lal Egipten ɨ, nye ze bana jʉ bʉʉ bʉr o tɨ, baa bɨbɛh bé a bene jyɛʼ taa buʼo yɔɔ boo nye e.

⁶ Sa mba, yé ó, toŋla ga nteme beengles, mpʉ bé a be, adihbe edi é bɨdia bɨ taʼa byɔɔ ɛ. Bé a si liʼe mɨmpaŋ bɨdia byɔɔ byaa, ntɔʼ saŋɔ bɨdia bɨfih, Zyɛm ntɔʼ gba be é l'edurʉ tʉŋlʉ, kaʼ be gʉ. Bé ódi mɨkɛʼa ó, njʉmdia e njʉmdia. É l'edurʉ laa ó bé lé ebono, to pyal é l'esie e mbi jɔʼ yi. É jɔʼ yaa ó Zyɛm ótiʼe be mɨlɔb ɨ.

⁷ Sa lɛl, yé ó, toŋla ga nteme bʉr o Sodɔm e Gomɔr, ndwe e bʉr o b'a di é bwa bɨnkana byé a be é nkɔra yaa ɛ. Bʉr baa, bé a si sa bɨmala, le edu mbi bʉr bé ndɨ ajala le ekœb é duo e. Bé a ka bi bɨntɨʼa ó, é siʼe tʉŋlʉ, yaa lé eduo njʉmdia e njʉmdia ɛ. Zyɛm a sa syɛɛla yaa ó, lé elɛʼle mpʉ bʉr ofih, bé ósia nteme e bɨntɨʼa é siʼe yaa ɛ.

Oyeʼle o mpʉl, bé esa lɔɔ Zyɛm ebɨh

⁸ É mbi ngwar e ngwar waa, bʉr onɨ, bé elɛɛ ó, sa lé edwe mɨnkar myɔɔ molele e, yé ó bɨlima bé lé ejɨm ɨ! Bé elœʼ monyʉl mɔɔ, le epyeh bʉr o ndɨ e jwɨɨ ɨ. Bé efœʼ nteme beengles ndɨ e kum ɨ.

⁹ É jɔʼ Moyiz a dwè, apa debe e, njwɨɨ beengles Mikaɛl, bé e Njwɨɨ moleme, bé a be ó lé etimle lɔb, lé egwɨm gʉa mpʉ muu mo Moyiz, wé ójala le edebe e. Nye a baalwɨɨ Njwɨɨ moleme. É jɔʼ Mikaɛl a ka pur nye e, nye a baakɛl molwɨɨ. Nye a kʉ ka lɛɛ ó njɨ: «Tî wih, nye ejala ó le ebâm e go.»

¹⁰ To kœb ó, bʉr onɨ, bé elwɨɨ-lwɨɨ ó, sa yiyɛh bé ndɨ ejeʼe e. Yaa bé lé egʉa ɛ, yé ó lé ebula dimle be! Bé ó kʉ be mpʉ otir, sa ndɨ apahle sɔʼɔ ɛ!

¹¹ A vwaʼ e bʉr baa, ebe, bé ekœʼ ebò e cyen mo Kan. Bé a fim mɨkam, ntɔʼ pɔhba ó, mpʉ mo Balam, ebe, bé a gwɨm-gwɨm ó, njɨ ebi myɛna. Bé a ka to dwè ó, mpʉ jyɛɛ mo Kore, bé a dwè é jɔʼ bé e boo nɔɔ, bé a kaŋa e Moyiz ɨ.

¹² Jwɨʼ yɔɔ, yé entɨʼ nteme é nko paʼ win. Bé eze e mbʉl é mbɛr Zyɛm é jɔʼ bɨn, obuʼla, mu lé epuhba mobo e. Baʼ bʉr, bé ede-de ó, lɔʼba-lɔʼba, ajoʼɔ ba fwon. Bé ekʉ ka kaale ó njɨ myɔɔ mɨmo. Bé enwɨɨla ó e mɨnkur lé edwine é dwine dwine, l'anwɨɨ mpie e. Pubo ntɔʼ cen be é paʼ fih. Bé enwɨɨla nteme ó e bɨlɨ bɨ ndɨ esam, é sam, sam, agumo yɛɛ mpumo e, dam be ó é jɔʼ nkono. Byé edwè ó, zɔʼ ba, ebe, byé eka munɔ si.

¹³ Bé ebâʼle nwɨɨla nteme ó e l'oboʼo o maŋ, baa lé epyɛl mogul é ntomo-ntomo e. Bé esa ebebe, ajoʼɔ ba fwon. Pie tɨ, bé eka nwɨɨla ó e baatwitwɛn ndɨ adu bɨcye byɔɔ ɛ. Ebe no ó Zyɛm lé ekʉ baʼle-baʼle be bɨdia byɔɔ njɨ é l'edurʉ le ankom-nkom ɨ. Edurʉ laa, lé ódi-di no ó, njʉmdia e njʉmdia.

¹⁴ Enɔk a be ó mwan mo nura mo Adam. Nye a si gwih mɨlɔb mo Zyɛm lé etiibe e bʉr baa ɛ. Nye a lɛɛ ó: «Paʼ joʼo ga: Da óze ó e mɨsaŋ beengles be mowʉm mo otɔɔyin,

¹⁵ é l'efu ó, nye tiʼa bʉr bɨbɛh mɨlɔb le edwe bʉr bɨbɛh ndɨ adwaabe nye e, mobe. Mɨsyem myɔɔ, myé enyin é bɨsyɛɛla bɨ ebebe byɔɔ bibyɛh. Zyɛm ólɛʼle osyɛl o mɨsyem, baa ndɨ adwaabe nye e, mpʉ bé a sa syem lé elwib bɨlwib bɨ mpyoo, tiibe e nye e.»

¹⁶ Bʉr baa, bé ó jɔʼ yiyɛh lé elwib é bebebebe, tiibe e Zyɛm. Bé é jɔʼ yiyɛh ó, lé etine-tine nkɔb nye a dwe-dwe be e. Bé ekʉ ka du ó njɨ bɨgwɨma byɔɔ le elwib bɨlwib bɨ jaale. Bé ekʉa bʉr é zi moseʼla, bɛɛ lé egʉa ó, bé ódira nyɔm wɔɔ e moseʼla maa.

Vula lwib

¹⁷ Obɨɔ o kpɛl bam aa! Toŋla ga mokan mɨlʉmlʉ mo Tî ga wina Yesʉs-Krɨst, myé a bɛa lɛɛ bɨn ɨ.

¹⁸ Bé a lɛɛ e bɨn ó: «É l'esie e mbi jɔʼ yi, yé óbe ó e bʉr o pyeh, baa lé ekpɛl kœʼ ebò e cyen lé edu mpʉ bɨgwɨma byɔɔ ndɨ ɨ.»

¹⁹ Bɨha, bé ó ndɨ egba mpɔʼa monkɔm paʼra bʉr e bʉr. Bé edwia e bɨsa bɨ jobo yi. Mbɨambɨa Sisim, nye apa ntɨhɔ be.

²⁰ Obɨɔ o kpɛl bam aa! Gwɨa ga é buʼo ti yin. Dɨʼe jwɨʼla ga nteme e Zyɛm é zi mo Mbɨambɨa Sisim.

²¹ Gbaʼ ga monyʉl lé edi é kpɛl mo Zyɛm. Bona ga dobo Tî ga wina Yesʉs-Krɨst óbula ze e. Nye óze ó, ze jwɨʼ bɨna ga nkoo, le eliʼle bɨn, to pyal é tiʼ molu mo mpoʼ mɨmɛh.

²² Bʉr o ndɨ esoŋlo e, jwɨʼɨ ga be nkoo.

²³ Bʉr o b'a lʉŋa é siʼe onɨ, syɛbɨ ga be é siʼe yaa. Mɨleme min, myé joʼa be nkʉnkoo. Diʼe ga be ncye. Nwimɨ ga sa yiyɛh, to pyal é bɨdur bʉr o tɨʼ bé a bwar-bwar, byaa mu lɨra é l'ebebe e. Byé diʼe é mbea win mpʉ sa lɛɛ ó, bi bil mobar.

Ndwɛa kum epihe

²⁴ Kum, nye beʼ e mʉr ndɨ e nkul ekamle e bɨn ó, bɨn beʼ l'aduma, waa nteme ndɨ e nkul ecyel bɨn é mih me, waa ndɨ é moncɛnba ɛ, abe e sa ebebe nye a ngbaa nwahle bɨn e tɨ. Bɨn bé óbe nteme ó e bɨsʉhʉ é buobuo.

²⁵ Nye ome ó ndɨ Zyɛm, nye nteme Tiʼbʉr ga wina. Kum, mpwaʼ, nkul le jwɨɨ, byé dweŋɔ Zyɛm é zyɛŋa ga wina boo Tî ga wina Yesʉs-Krɨst. Byé a bɛa be ó mbi jɔʼ yiʼ apa taare. Byé dina ó tɨ, ze pyal é banana. Byé óto dolo njʉmdia e njʉmdia. Amɛn.