Yʉanes 5 - Kálara Zyɛ̌m Edwán é mpʉ̌n

Yesʉs lé etiʼ mbʉmbʉʼ

¹ Nuu ma jɔʼ, nye osi laa pie bɨsyɛɛla bɨnɨ nɛʼɛ, lʉʉ ebʉʼ le oYʉden ntɔʼ pyal. Yesʉs ze to Yerʉsalɛm.

² To kœb ó, é nkana Yerʉsalɛm, yé e bœh ejwɨ̀a kunokuno e l'Eniŋlɨ e bwa o bɨntœme, bœh yaa lé ejebɔ é lwib arameyɛŋ ó, Betzata. Bɨsikuo bɨtɛn, byé a be ó tɨʼ é mompàh mo bœh yaa.

³ É bɨsikuo byaa si ó buobuo mɨsyoblʉ, myé a dɨ ja ɛ. Baʼ, bé a be ó ontim, bʉʉ, baanya-bɨjyɛm, bʉʉ nteme, bʉr o b'a be e bɨfum bɨ nyʉl é fwam-fwam ɨ. [Bé a be ó lé ebono jɔʼ modibe mo tɨ, mé ópɨʼba ɛ.

⁴ Ebe, nuu engles a be ó lé efulo é byʉʉ bɨjɔʼ, ze pyal é bœh ejwɨ̀a yaa, ze pɨʼ modibe mo tɨ. Syoblʉ efoʼ wé a fulo pie pɨʼa modibe waa ɛ, wé a be ó si tiʼe é nko paʼ esyɛb le, lé dam be láa.]

⁵ Nuu mʉr a be tɨʼ ɨ, a be ó si sia e l'esyɛb tɔɔ mɨmbu mowʉm molɛl e mwom.

⁶ Ngbaa le eka be, Yesʉs, nye osi to é bœh yaa nɛʼɛ, nye ntɔʼ bee mʉr nɨ njaʼa si, gʉa nteme ó, nye a bɛa ó duma e l'esyɛb laa ɛ. Nye ze dî e mʉr nɨ ó: «Zê go lé egwɨm tiʼe ɛ?»

⁷ Syoblʉ waa, wé e nye ó: «Da, a vwaʼ e mɛm, mʉr ndɨ abe mʉr toʼ, to fil me é bœh é jɔʼ modibe lé epɨʼba ɛ! É jɔʼ yiyɛh me ejwɨʼla saa eto duba ɛ, nuu mʉr, nye etaare to pyal, mɛm fuo diibe wâʼ mpʉ, aduba!»

⁸ Yesʉs, nye e nye ó: «Mʉŋa, nkɛŋɨ tɔɔ go, go à laa.»

⁹ Cye e cye yaa, mʉr nɨ ze tiʼe, ze nkɛɛ tɔɔ we, ntɔʼ taare cyen. Yé a syɛɛlɨ ó, é moho saba.

¹⁰ Ebe no ó oYʉden, bé a lɛɛ e mʉr a tiʼɔ ó: «Muh, yé ó moho saba. No ó motie ga mɨna, mé amɛʼle ó, go nkɛŋɨ tɔɔ go.»

¹¹ Nye ó: «Mʉr tiʼ me e, ô lɛɛ me ó: “Nkɛŋɨ tɔɔ go. Go laŋa.”»

¹² Bé e nye ó: «Zê lɛɛ e go ó: “Nkɛŋɨ tɔɔ go. Go laŋa” ɛ?»

¹³ Sa gwar, mʉr a tiʼɔ ɛ, a baagʉa die e mʉr a tiʼ nye e, ebe, Yesʉs a si laa, ntɔʼ ni é ntuntuma bʉr yé a be gumo yaa ɛ.

¹⁴ Jɔʼ ze laa ba, Yesʉs ze to bɔma e mʉr waa é guu paʼ jahla bii mo Zyɛm. Nye e nye ó: «Me elɛɛ go ó, é jɔʼ yi, go mu ó si tiʼe. Daʼ sa syem. Sa ndɨ é laŋle bebe e, yé amu jaa pyal go.»

¹⁵ Mʉr nɨ ze laa, to gwih oYʉden ó: «Mpa mʉr tiʼ me e, nye be ó, Yesʉs!»

¹⁶ Ebe no ó oYʉden, bé a ze tíile Yesʉs ɨ, ebe, nye a si bana sa mbi syɛɛla yaa é moho saba.

¹⁷ No ó Yesʉs a ze lɛɛ e be ó: «Sɔŋ wam, nye esea ó, é jɔʼ yiyɛh, ze pyal é banana. Mɛm nteme, me esea no.»

¹⁸ Ebe lɔɔ we waa ó oYʉden, bé a to dolo lé esaa ó, bé jʉ ó nye e. Bé a baasaa ejʉ nye njɨ ebe mpene moho saba nye a ntaa ɛ. Bé a saa nteme ó, bé jʉ ó nye ó, ebe, nye a lɛɛ ó, Zyɛm, nye ó Sɔŋ we, anta nye. Bʉr baa, bé a bee no ó, nye ejwɨʼa e Zyɛm.

¹⁹ Ebe no ó Yesʉs a bâʼle nʉa lwib, lɛɛ e be ó: «Me elɛɛ bɨn cyecye ó nɛɛ: Mwan mo Zyɛm, nye abe lé esa yʉʉ sɔʼɔ e nkul we nye mʉr tɨ. Nye esa ó, njɨ syɛɛla nye lé ebɛa bee Sɔŋ we lé esa ɛ, ebe, syɛɛla yiyɛh Zyɛm Sɔŋ lé esa ɛ, yé nteme ó Mwan mo Zyɛm lé esa ɛ,

²⁰ ebe, Zyɛm Sɔŋ, nye ekpɛl Mwan mo Zyɛm. Nye elɛʼle nye sa nye mʉr tɨʼ lé esa ɛ. Nye ólɛʼle nye bɨsyɛɛla nye óka to le esa-sa ɛ. Byé ólaa byaa bi, bɨn nkʉʼ bul jehe,

²¹ ebe, jwɨʼ gwar mpʉ Sɔŋ lé epɛ̀h bʉr é mofoo, dwe be tiʼ ɨ, no nteme ó Mwan mo Zyɛm ótiʼ baa nye lé ekpɛl ɨ.

²² Zyɛm Sɔŋ, nye abe lé etiʼe bʉr mɨlɔb. Nye a be ó si bɛa ntɛŋ Mwan mo Zyɛm nkul mojwɨ̀ʼa ó, nye tiʼa mɨlɔb mimyɛh,

²³ ó bʉr bɨbɛh, bé dwiibɨ Mwan mo Zyɛm jwɨʼ gwar e gwar é mbi bé lé edwiibɨ Zyɛm Sɔŋ ɨ. Mʉr ndɨ adwiibɨ Mwan mo Zyɛm ɨ, nye adwiibɨ nteme Zyɛm Sɔŋ, mʉr a ntɨh nye e.

²⁴ «Me elɛɛ bɨn cyecye ó nɛɛ: mʉr ójoʼo lwib yam le ejyɛʼ taa buʼo ye boo mʉr a ntɨh me e, nyi bi tiʼ molu mo mpoʼ mɨmɛh. Zyɛm, nye aŋa ka dwe nye mobe. Nyi bɛa dwihɔ é l'efie, ntɔʼ dweŋɔ tiʼ molu mo mpoʼ mɨmɛh.

²⁵ Me elɛɛ bɨn cyecye ó nɛɛ: ewala, lé eze—lé mu ó si pyal—jɔʼ odwè, bé ójoʼo twii Mwan mo Zyɛm ɨ. Baa bé ójoʼo nye e, bé óbi tiʼ molu mo mpoʼ mɨmɛh,

²⁶ ebe, jwɨʼ gwar e gwar é mbi Zyɛm Sɔŋ ndɨ e tiʼ njʉmdia é nye mʉr tɨʼ tʉŋlʉ ɨ, no nteme ó nye a sa ó, Mwan mo Zyɛm diʼe e tiʼ yaa ɛ.

²⁷ Nye nteme a si ntɛŋ Mwan we nkul mojwɨ̀ʼa ndɨ ó, nye tiʼa bʉr mɨlɔb ɨ, ebe, nyɛɛ ó ndɨ Mwan mo Mʉr.

²⁸ «Mʉr atwɨra ga. Ewala, lé eze: jɔʼ odwè bɨbɛh ndɨ é mofoo ɨ, bé ójoʼo twii mo Mwan mo Mʉr,

²⁹ bé ntɔʼ pàh é mofoo e. Baa b'a sa embɨa ɛ, bé ópàh, ntɔʼ bi tiʼ molu mo mpoʼ mɨmɛh. Bʉr o b'a sa ebebe e, bɛɛ, bé ópàh nteme, ntɔʼ tiʼɔ mɨlɔb le edweŋɔ mobe.

³⁰ Me abe e nkul esa yʉʉ sɔʼɔ njɨ e nkul wam me mʉr tɨ. Me etiʼe mɨlɔb ó, njɨ mpʉ Zyɛm lé elɛɛ me e. Etiʼ e mɨlɔb lam, lé ó cɨcyel, ebe, me abe lé esa gwɨma yam, njɨ yaa mo mʉr a ntɨh me e.»

Oboʼla mo Yesʉs

³¹ «Nkʉ me be ó be, be lé eboʼlo lɔb wam me mʉr tɨʼ nɛʼɛ, mpa mboʼla waa, wé abe cyecye.

³² Sa gwar, yé e nuu mʉr lé eboʼlo lɔb wam ɨ. Mɛm, me egʉa ó, mboʼla nye lé eboʼlo, tiibe e me e, wé ó cyecye.

³³ Bɨn bʉr o tɨ, bé a si lomo bʉr e motia boo Yʉanes. Nye nteme a si boʼlo cyecye.

³⁴ É paʼ wam, me agwɨm ó, mʉr boʼla mokan mam. Me ebâʼle lɛɛ bɨn mokan maʼ ó, ebe, me egwɨm ó, bɨn biʼe tiʼ molu mo mpoʼ mɨmɛh.

³⁵ Yʉanes a be ó mpʉ twima elama lé ekʉn bɨn zi ɨ. Bɨn ze kpɛl ó, bɨn soha tɔɔ ma jɔʼ, cye yiyɛh myɛn elama laa, lé a be lé epɛn myɛn ɨ.

³⁶ «Sa gwar, mɛm, me e mboʼla fih, pie waa mo Yʉanes. Nyɛɛ, nye edwe mboʼla ndɨ elaa waa mo Yʉanes é modile e, ebe, bɨsyɛɛla Sɔŋ wam a dwe me ó, me ntaʼ, ze fwahle e, byé ó me lé esa ɛ. Byé eboʼlo, tiibe e me ó, Sɔŋ wam ó b'a ntɨh me.

³⁷ Ndwe nteme, Sɔŋ wam, mʉr a ntɨh me e, nye mʉr tɨʼ a be ó si boʼlo é lɔb wam. Bɨn bé apa joʼo twii we, nkʉ bee mpʉ nye lé enyin ɨ.

³⁸ Mokan mo Sɔŋ wam, mé asea bɨn é mɨleme, ebe, bɨn bé ajyɛʼ taa buʼo yin boo me, mɛm, mʉr nye a ntɨh bɨn ɨ.

³⁹ Bɨn bé egba monyʉl lé ejwɨʼ Kalara Zyɛm é dwiii, bɨn lé ebee ó, tɨʼ ó bɨn bé óbi tiʼ molu mo mpoʼ mɨmɛh ɛ. To kœb ó, Kalara Zyɛm ngwar e ngwar waa ó ndɨ eboʼlo é lɔb wam!

⁴⁰ Sa gwar, bɨn bé amɛʼle lé eze boo me, ó bɨn ntaʼ, ze bi tiʼ molu mo mpoʼ mɨmɛh.

⁴¹ «Me abe lé esaa ebi kum lé eduho é bʉr ɨ.

⁴² Sa gwar, me egʉa bɨn: me egʉa ó, bɨn bé akpɛl Zyɛm!

⁴³ Mɛm a ze ó, é die mo Sɔŋ wam, bɨn l'amɛʼle nʉa me e duu. Sa gwar, ǃɨ nuu mʉr si ka ze é die le nye mʉr tɨʼ nɛʼɛ, mʉr waa ó bɨn bé ónʉa e duu.

⁴⁴ Bɨn bé ebul kpɛl bi kum ó, njɨ paʼra win. Bɨn bé akpɛl bi kum lé eduho boo Zyɛm nye ome e. Yé be no nɛʼɛ, a, bɨn bé ójyɛʼ taa buʼo yin boo Zyɛm nyá ɛ?

⁴⁵ «Sa gwar, atoŋlo ga ó, me ópur bɨn é mih mo Da. Moyiz, mʉr bɨn bé a jyɛʼ taa buʼo yin boo nye e, nye ó ngo pur bɨn.

⁴⁶ Nkʉ yé be ó be cyecye ó, bɨn bé ebuʼla lɔɔ mo Moyiz nɛʼɛ, mpa bɨn mu ó lé ebuʼla nteme me, ebe, nye a tile ó, lɔb wam.

⁴⁷ Bɨn pa taare kar ebuʼla sa nye a tile e, a dwɛʼra e lɔɔ wam? Yé aŋa bana bɨn.»