Yʉanes 4 - Kálara Zyɛ̌m Edwán é mpʉ̌n

Yesʉs bé e sile Samari

¹ OFarizyɛŋ, bé a be ó si joʼo lɔɔ ó, Yesʉs a be ó lé edulo ompʉn le edù bʉr é buobuo, laa Yʉanes.

² (É l'ocyecye, ntʉʼ Yesʉs nye mʉr tɨʼ a dɨ dù bʉr. Ompʉn be, bé ó b'a dɨ dù bʉr.)

³ Ebe no, é jɔʼ Yesʉs a joʼo no e, nye ntɔʼ mʉa é lal Yʉda, lé ebâʼle to lal Galɨle.

⁴ Yé a kʉ be nye é nere-nere ó, nye cwɨŋɨ njɨ ɨ Samari.

⁵ Nye ntɔʼ to pyal kunokuno e yʉʉ nkana Samari bé lé ejebe ó, Sukar ɨ. Nye a be ó, nye mu kunokuno e peme Yakɔb a dwe mwan we Yoseb ɨ.

⁶ Edɛɛ e modibe mo Yakɔb, lé a be ó tɨ. Yesʉs ze di si nkpah edɛɛ, ebe, nye a be ó si cyɛʼ é cyen. Yé a be ó, yé mu lé eto saa teme moho.

⁷ Guu sile Samari, wé ze pyal, lé eze daa modibe. Yesʉs, nye e we ó: «Dweʼ me modibe. Me ónyʉl.»

⁸ Tina, yé ó, ompʉn be, bé a be ó si to nkana, lé eto bwamɔ mode.

⁹ Ebe no ó sile Samari a bula dî e nye ó: «Nyá? Wáa mbi gwɔɔ Yʉden, lé eze jaʼ me modibe, mɛm, sile Samari ɨ?» (Tina, yé ó, oYʉden bé e boo bʉr o Samari, bé abe lé ebɨlan e bɨsɔʼɔ bɨmpwar.)

¹⁰ Yesʉs ntɔʼ lɛɛ e nye ó: «Nkʉ go be ó be, gʉa etʉm Zyɛm lé entɨh-ntɨh bʉr ɨ, ndwe e mʉr lé ejaʼ go modibe nɛʼɛ, mpa go ô jaʼ nye modibe lé esah ɛ. Nye si ngbaa dwe nteme go ma.»

¹¹ Mʉma, nye e nye ó: «Da, go abe e dɛa. Edɛɛ nteme, lé é bul jaa si. Go e nkul esa yé, ó modibe, mé saha, ze kœb bɨna kaʼ kʉ ɨ?

¹² Mpam ga yina Yakɔb ó b'a liʼe bɨh bɛɛ e l'edɛɛ lɨ. Nye mʉr tɨʼ a be ó si de modibe mo tɨ. Bwan ndwe e l'otir be, si de. No ó, zê go lé ebuʼla ó, go lé elaa Yakɔb ɛ?»

¹³ Yesʉs, nye e nye ó: «Mʉr nyiwɛh lé ede modibe maʼ ɛ, nye óbâʼle joʼo dweh modibe.

¹⁴ Sa gwar, mʉr nyiwɛh óde modibe me ódwe nye e, nye aŋa ka joʼo dweh modibe, ebe, modibe me ódwe nye e, mé ólihba eno é leme we tʉŋlʉ, gumo tiʼ molu mo mpoʼ mɨmɛh, yé ódɨ sah ɛ.»

¹⁵ Mʉma, nye e nye ó: «Da, dweʼ me modibe mo maa, me nkʉʼ di, aka bâʼle joʼo dweh modibe, nkʉ bâʼle ze wâʼ lé eze daa modibe.»

¹⁶ Yesʉs, nye e nye ó: «Toʼ, to jebe njʉm go. Bɨn e nɔɔ bɨbɛh, bé òbula ze wâ.»

¹⁷ Mʉma, nye e nye ó: «Me abe e njʉm.» Yesʉs, nye e nye ó: «Yé ó no! Gɨ lwib ocyecye é jɔʼ go lɛɛ ó, go abe e njʉm ɨ,

¹⁸ ebe, go mu ó si bi ojʉm, pyal otɛn! No ó, mʉr bɨn e nɔɔ ndɨ é bananaʼ ɛ, nye ntʉʼ njʉm go. Gɨ kʉ lɛɛ ocyecye naa yɛɛ!»

¹⁹ Mʉma, nye e nye ó: «Da, go ó kʉ be ngwiha mɨlɔb! Mɨ bee no.

²⁰ Bɨmpam bih, byé a ze ó wâʼ é l'ecwɨʼ lɨ, lé eze dwiibɨ Zyɛm. No ó, bɨn oYʉden bɛɛ, bé elɛɛ ó, gumo mʉr lé ejala le edwiibɨ nye e, yé ó njɨ Yerʉsalɛm.»

²¹ Yesʉs, nye e nye ó: «Buʼla me: ewala lé ópyal é jɔʼ bɨn bé óbe, aka to Yerʉsalɛm, nkʉ é l'ecwɨʼ lɨ, ó bɨn dwiibɨ Zyɛm.

²² Bɨn bʉr o Samari, bɨn bé apa kʉ gʉa mʉr bɨn ndɨ edwiibɨ ɨ. Bɨh oYʉden ó ndɨ egʉa nye, ebe, tiʼ molu mo mpoʼ mɨmɛh, yé eduho ó, é l'oYʉden.

²³ Sa gwar, ewala, lé eze—lé mu ó si pyal—jɔʼ mɨmpaŋ mɨ ompʉn, bé ódwiibɨ Zyɛm Sɔŋ é mɨsisim myɔɔ é l'ocyecye e, ebe, nye esaa ó, bʉr o dwiibɨ nye é mbi waa ɛ.

²⁴ Zyɛm, nye ó sisim. Ebe no, bʉr o ndɨ edwiibɨ nye e, bé ekʉ jala le esa no é mɨsisim myɔɔ, é l'ocyecye.»

²⁵ Mʉma, nye e nye ó: «Me egʉa ó, waa ndɨ Messie ɨ, óze—no, yé ó waa ndɨ ejebɔ ó, Krɨst: Lœma mulo mo Zyɛm ɨ. É jɔʼ nye óze e, nye ógʉa yeʼle bɨna ga bɨsa bɨnɨ bibyɛh.»

²⁶ Yesʉs, nye e nye ó: «Me ó ndɨ nye, mɛm, mʉr lé elwib e go nwa!»

²⁷ É jɔʼ yaa ó ompʉn mo Yesʉs, bé a ze bula, duho nkana ɛ. Bé ze jehe lé ebee nye lé elwib e mʉma nɨ. Abe e mʉr a dî yɛɛ ó: «Go lé esaa yé e nye?» Nkʉ ó: «Bɨn e nɔɔ bé elab yé?»

²⁸ Ebe no ó mʉma nɨ a liʼe dɛa modibe ye, bula to nkana, to jebe bʉr ɨ. Nye ó:

²⁹ «Ntaʼ, ze bee ga me wiʼ ɔɔ! Mʉr nwaʼ, nyi lɛɛ me sa yiyɛh me a sa yi ɔɔ! Zê nye óbɛm be Lœma mulo mo Zyɛm ɨ?»

³⁰ Bʉr ze tɨbla, lé eduho nkana, toŋɔ nko nye a be e.

³¹ É jɔʼ mʉma a be, nye dina gʉʼ ɨ, ompʉn mo Yesʉs, bé a be ó lé elɛɛ e nye ó: «Yeʼle, paʼ de.»

³² Yesʉs, nye e be ó: «Me e sa ede bɨn ndɨ agʉa ɛ.»

³³ Ebe no ó ompʉn, bé a to le edîila paʼra wɔɔ ó: «Zê nuu mʉr be ó si ze nye e mode ɛ?»

³⁴ Yesʉs, nye e be ó: «Mode mam, mé ó, me saʼ gwɨma mo mʉr a ntɨh me e, le efwahle syɛɛ nye a lɛɛ ó, me ntaʼ, ze sea ɛ.

³⁵ Bɨn bé elɛɛ ó: “Yi liʼ ongɔn onâ, jɔʼ eto é mɨngol, yé òpyal.” No ó, mɛm, me elɛɛ bɨn ó nɛɛ, paʼ dwɛʼ ga bɨpeme. Yé mu ó si pyal jɔʼ eze é mɨngol!

³⁶ Mʉr lé eze é mɨngol ɨ, nye ebi ó myɛna me. Sa nye lé esyɛŋ é mobeʼe e, yé ódi njʉmdia e njʉmdia. No ó, mbèl mompœʼ, bé e mʉr lé eze é mɨngol ɨ, bɨbɛh, bé esoho jwɨʼ gwar,

³⁷ ebe, yé cyecye ó: “Nwaʼ, nye eli, bè; nuu, nye eze é mɨngol.”

³⁸ Me a lomo bɨn ó, bɨn toʼ é mɨngol é peme bɨn bé a be, ali, abè e. Bʉr ofih ó b'a li le ebè, bɨn bɛɛ ka ze biʼ e be.»

³⁹ Buobuo bʉr o Samari bé a be é nkana yaa ɛ, bé a si jyɛʼ taa buʼo yɔɔ boo Yesʉs, ebe, mʉma nɨ a be ó si boʼlo ó: «Nye be ó si lɛɛ me sa yiyɛh me a sa ɛ.»

⁴⁰ É jɔʼ bé a ze nko Yesʉs a be e, bé ze jwɨʼla e nye ó, bé e boo nɔɔ diʼe Sukar. Yesʉs ze ja tɨʼ molu moba.

⁴¹ Buobuo bʉr ntɔʼ jyɛʼ taa buʼo yɔɔ boo nye ebe lɔɔ Yesʉs a lɛɛ be e.

⁴² Bé e mʉma nɨ ó: «Banana, bɨh bé aka buʼla njɨ ebe lɔɔ go. Bɨh bʉr o tɨʼ, bɨ joʼo lwib ye, le ekʉ gʉa ó, é si nwaʼ nyiwɛh, nye ó ndɨ Tiʼbʉr é l'efu e si nwaʼ nyiwɛh.»

Yesʉs lé etiʼ mwan

⁴³ Yesʉs, nye osi ja mʉʉ molu moba nɛʼɛ, nye ze mʉa, lé eto Galɨle,

⁴⁴ ebe, Yesʉs nye mʉr tɨʼ a be ó si boʼlo ó: «Ngwiha mɨlɔb, nye abe lé edweŋɔ kum é lal we.»

⁴⁵ Ebe no, é jɔʼ nye a pyal gʉʼ ɨ, bʉr o Galɨle, bé a be ó si bɨlan e nye, ebe, bé a be ó si bee sa yiyɛh nye a sa ɨ Yerʉsalɛm é jɔʼ bɛɛ, bé a to jeme ebʉʼ ɨ.

⁴⁶ Pie tɨ, Yesʉs ze to Kana, nkana Galɨle, nko nye a liŋ modibe monwoʼ mo rezɛŋ ɨ. Yé a be ɨ Kapernaʉm ó, e nuu sabene. Mwan we ó b'a be lé esyɛb.

⁴⁷ É jɔʼ nye a joʼo ó, Yesʉs, nyi duho Yʉda, nye mu ó Galɨle e, nye ntɔʼ to nko Yesʉs a be e. Nye a to ó, to jwɨʼla e Yesʉs, ó bé e nɔɔ, bé toʼ Kapernaʉm, ó Yesʉs toʼ, to tiʼ nye mwan a be, nye mu tiʼ le efie e.

⁴⁸ Ebe no ó Yesʉs a lɛɛ e nye ó: «Bɨn bé óbe é jɔʼ yiyɛh ó, ajyɛʼ taa buʼo yin boo me cye yiyɛh bɨn l'apa bee bɨdweʼle bɨ nkul wam ndwe e bɨsa bɨ jehe e.»

⁴⁹ Sabene waa, nye e nye ó: «Da, ntaʼ, bɨna toʼ mbɛr wam cye yiyɛh mwan wam l'apa fil mɨswɨh mɨ epihe e.»

⁵⁰ Yesʉs, nye e nye ó: «Toʼ mbɛr go. Mwan go ótiʼe.» Mʉr nɨ ze buʼla lɔɔ Yesʉs a lɛɛ nye e, ze bula, to kwar we.

⁵¹ Nye mu temezi nɛʼɛ, ze bɔma e l'osyɛl o mosa be. Bé a be ó lé edu nye. Bé e nye ó: «Mwan go, nyi tiʼe!»

⁵² Ebe no ó nye a dî jɔʼ mwan a tiʼe e. Bé e nye ó: «Nye a tiʼe ó kʉʼ, é l'ewala egwar e bii kʉʼ. Ejyoo, lé a sie nye ó, é jɔʼ yaa.»

⁵³ Ebe no ó sɔŋ mwan waa a ka ze gʉa ó, yé a be ó é jɔʼ Yesʉs a lɛɛ e nye ó: «Mwan go ótiʼe» e. Bé e mbɛr bʉr we wiwɛh ze jyɛʼɔ taa buʼo yɔɔ boo Yesʉs.

⁵⁴ Lɨha, lé a be ó dweʼle nkul mba Yesʉs a sa pie jɔʼ nye a duho lal Yʉda, to di Galɨle e.