Yʉanes 3 - Kálara Zyɛ̌m Edwán é mpʉ̌n

Yesʉs bé e Nikodɛm

¹ Yé a be ó e nuu Farizyɛŋ, die le Nikodɛm. Nye a be nteme ó tamamʉr é kul oYʉden.

² Nye a si ze pyal boo Yesʉs é pum. Nye e nye ó: «Yeʼle, bɨh bé egʉa ó, go ó yeʼle Zyɛm a ntɨh, lé eze yeʼle bɨh ɨ, ebe, nkʉ Zyɛm, nye abe e mʉr, mʉr waa, nye abe e nkul esa bɨdweʼle bɨ nkul mbi go lé esa ɛ.»

³ Yesʉs, nye e nye ó: «Me elɛɛ go cyecye ó nɛɛ: ǃɨ mʉr si be, abâʼle byɛl nɛʼɛ, nye abe e nkul ebee Jwɨ̀ʼa mo Zyɛm.»

⁴ Nikodɛm ze dî e nye ó: «Tamamʉr, nye e nkul ebâʼle byɛl wáa mbi? Zê nye e nkul eni é mo mo nyɔŋ we, ntɔʼ bâʼle byɛl ɛ?»

⁵ Yesʉs, nye e nye ó: «Me elɛɛ go cyecye ó nɛɛ: ǃɨ mʉr si be, apa byɛl mbyɛla modibe e waa Sisim nɛʼɛ, gʉŋa ó, mʉr waa, nye ákwoʼ ni é jwɨ̀ʼa mo Zyɛm.

⁶ Sa mamʉr lé ebya ɛ, yé ó njɨ mamʉr bɨpuno e motié. To kœb ó, Mbɨambɨa Sisim ó ndɨ ebya mʉr ndɨ e sisim ndɨ kublakubla ɛ.

⁷ Atwɨra nkʉ me elɛɛ go ó: “Yé ekʉ jala ó, bɨn bâʼla byɛl.”

⁸ Pubo, wé elaa ó, gumo wé lé ekpɛl ɨ. Gwɔɔ kʉ ka joʼo ó njɨ duu pubo, agʉa yɛɛ nko wé lé eduho, ndwe e nko wé lé eto e. Yé ó jwɨʼ gwar e mʉr nyiwɛh lé ebyɛl é zi mo Mbɨambɨa Sisim ɨ.»

⁹ Nikodɛm, nye e nye ó: «Wáa mbi bɨsa byaa ndɨ e nkul esyɛɛlɨ ɨ?»

¹⁰ Yesʉs, nye e nye ó: «Gwɔɔ yɛɛ njwɨʼ yeʼle motie é bwa b'Ɨzraɛl, zê yé abana go lé egʉa mɨlɔb mɨnɨ ɛ?

¹¹ Me elɛɛ go cyecye ó nɛɛ: bɨh bé elwib é mɨlɔb bɨh lé egʉa ɛ. Bɨh bé eboʼlo nteme ó, é lɔb sa bɨh a bee e. Sa gwar, bɨn bé akpɛl mɛʼle lɔɔ wih.

¹² Bɨn l'apa buʼla é jɔʼ me lé elɛɛ bɨn bɨsa lé esyɛɛlɨ é si nwaʼ ɛ, zê bɨn bé óbul buʼla ó, é jɔʼ me ólɛɛ bɨn byaa lé esyɛɛlɨ é jobo kʉ ɨ?

¹³ Abe e mʉr ngwar ndɨ si pa bere, to pyal é jobo kʉ, pie Mwan mo Mʉr, mʉr a duho é jobo kʉ, ze kaʼ é si nwaʼ ɛ.

¹⁴ Jwɨʼ gwar e gwar mpʉ Moyiz a nʉa kpɛʼa nyʉa nkoho, pɛn é lɨ, bɨn ye kʉ é feha si ɨ, jwɨʼ gwar e gwar yaa nteme ó Mwan mo Mʉr lé ejala le ebɨnɔ kʉ ɨ.

¹⁵ Nye óbɨnɔ kʉ no ó, é l'efu ó, mʉr nyiwɛh ójyɛʼ taa buʼo ye boo nye e, biʼe tiʼ molu mo mpoʼ mɨmɛh.

¹⁶ «Zyɛm a be ó si bul laŋle kpɛl bʉr o si nwa. Ebe no ó nye a ntɨh Etiʼe e Mwan le ó, waa nyiwɛh ójyɛʼ taa buʼo boo nye e, aka dim. Nye biʼe tiʼ molu mo mpoʼ mɨmɛh.

¹⁷ Nye a baantɨh Mwan we kaʼ é si nwaʼ ó, nye ntaʼ, ze dwe bʉr o tɨʼ mobe. Nye a ntɨh nye ó, nye dweʼ bʉr bɨbɛh tiʼ molu mo mpoʼ mɨmɛh dumo e nye.

¹⁸ Mʉr lé ejyɛʼ taa buʼo ye boo Mwan mo Zyɛm ɨ, nye aŋa ka dweŋɔ mobe. To kœb ó, waa ndɨ asa no e, nyiha, nyi bɛa dweŋɔ mobe, ebe, nye apa jyɛʼ taa buʼo ye boo Etiʼe e Mwan mo Zyɛm.

¹⁹ «Mobe maa, mé ódweŋɔ ó, ebe, myɛn, wi ze pan, ze pyal é si nwa. Bʉr bɛɛ bula kpɛl edurʉ, laa myɛn, ebe, bɨsyɛɛla byɔɔ, byé é bebe.

²⁰ Mʉr nyiwɛh lé esa ebebe e, nye enwim myɛn waa. Nye abe lé eze fum myɛn lé epan ɨ, ebe, nye ekpɛɛ ó, ebebe le, lé amu jaa gwiha kʉl, bʉr ntɔʼ dwe nye mobe tɨ.

²¹ Waa nyiwɛh lé ekœʼ ebò e cyen é l'ocyecye e, nye ekpɛl to nko myɛn lé epan ɨ, bʉr nkʉʼ bee ó, bɨsyɛɛla bye, byé eduho ó, é gwɨma mo Zyɛm.»

Yesʉs bé e Yʉanes Ndubʉr

²² Jɔʼ ze laa ba, Yesʉs bé e l'ompʉn be, ze to é lal Yʉda. Bé ze ja gʉʼ bwa molu. Nye a be ó lé edù-dù bʉr.

²³ Yʉanes nteme a be ó, lé edù bʉr é l'ebʉm e Ayɨnɔn, kunokuno e Salim, ebe, modibe, mé a be ó é buo tɨ. Bʉr ze taare lé eto boo Yʉanes lé eto nʉa ndubo.

²⁴ (É jɔʼ yaa, yé a be ó, Yʉanes l'apa gbaŋɔ é mbʉʼ.)

²⁵ Bé dina tina nɛʼɛ, bʉʉ ompʉn mo Yʉanes ze taare lé edo, bé e nuu Yʉden é mbi bé lé ejala le epuba mobebe e.

²⁶ Bé ze to nko Yʉanes a be e, ze dîŋɔ e nye ó: «Yeʼle, zê go lé eka toŋlo mʉr go a seʼle-seʼle é sama bʉr yé a be bɨna ga dibe Yʉrdɛŋ nkɔm-nkɛɛ ɛ? Banana, nyɛɛ nteme mu ó lé edù bʉr! Bʉr nteme mu kʉ ka to ó njɨ boo nye!»

²⁷ Yʉanes, nye e be ó: «ǃƗ Zyɛm si bene lé edwe mʉr sɔʼɔ nɛʼɛ, nye abe e nkul ebi ye.

²⁸ Bɨn bʉr o tɨ, bé egʉa ó, me a si bɛa boʼlo é mih mɨn ó, ntʉʼ mɛm ndɨ Lœma mulo mo Zyɛm. Me sɔʼɔ ó njɨ mʉr Zyɛm a taare lomo dolo e.

²⁹ Mʉr ndɨ e mʉma ɛ, nye ó njɨ mbɛl mʉma. Fo we nyɛɛ, nye ecyɛb-cyɛb ó, é puuu... joʼlo, ó nye nkʉʼ gʉa joʼlo ecel mo mbɛl. Nye ebul soho ecel le! Ebe no ó me lé ebul soho é bananaʼ ɛ.

³⁰ Yé ekʉ jala ó, kum we, nye bwaʼ bwaʼa; waa wam twaʼbe twaʼba.

³¹ «Mʉr a duho é jobo kʉ ɨ, nye ó ndɨ elaa bʉr bɨbɛh. Mʉr si nwa, nye ekʉ joʼo ó njɨ mompaŋla mo si nwa. Nye elwib-lwib ó, njɨ mɨlɔb mɨ ka. Mʉr lé eduho é jobo kʉ ɨ, nyiha ó ndɨ elaa bʉr bɨbɛh.

³² Nye eboʼlo ó sa nye a bee le ejoʼo e. Sa gwar, bʉr l'amɛʼle joʼo mpaŋla we.

³³ É jɔʼ mʉr lé emɛʼle joʼo nye e, nye elɛʼle tɨʼ ó, Zyɛm ó ndɨ cyecye.

³⁴ Mʉr Zyɛm a lomo e, nye lé entɛŋ ó, mokan mo Zyɛm, ebe, Zyɛm ó lé elomlo nye Mbɨambɨa Sisim, ntinɨ e ntinɨ.

³⁵ «Zyɛm Sɔŋ, nye ekpɛl Mwan we. Nyi bɛa gba sa yiyɛh é jwɨ̀ʼa ye.

³⁶ Mʉr lé ejyɛʼ taa buʼo ye boo mwan waa ɛ, nye ó ngo bi tiʼ molu mo mpoʼ mɨmɛh. No ó, waa ndɨ esa Mwan mo Zyɛm ebɨh ɨ, nye aŋa bi tiʼ molu mo mpoʼ mɨmɛh yaa, ebe, Zyɛm ókpaa empime e nye.»