Yʉanes 21 - Kálara Zyɛ̌m Edwán é mpʉ̌n

Yesʉs lé ebâʼle lɛʼle nyʉl é jɔʼ lɛl

¹ Jɔʼ ze laa ba, Yesʉs ze bâʼle lɛʼle ompʉn be nyʉl. Yé a be ó é maŋ mo Tiberias. Mbi nye a lɛʼle be nyʉl ɨ, wé ó wi.

² Yé a be ó, bʉʉ bʉr é l'esama le ompʉn be, bé osi to é nkpah maŋ. Tɨʼ é sama yaa, yé a be ó Simɔn Pyɛr e Tomas (waa bé ejebe-jebe ó, Egbah ɛ), bé e Natanaɛl (mʉr Kana, lal Galɨle), ndwe e mɨsoho mo Zebede, ka kɛl bʉʉ ompʉn oba.

³ Simɔn Pyɛr, nye e be ó: «Me mu ó lé eto é gbà kaʼ dibe.» Bé e nye ó: «Ncʉʼ ga! Bɨna to ga bɨbɛh!» Bé ze kable é byɛl, ntɔʼ toŋɔ é maŋ. Pum nɨ wiwɛh, bé a baajʉ sɔʼɔ.

⁴ Ngbaa le eka be, yé mu é molama mo mɛn nɛʼɛ, bé ze bee Yesʉs cɨcyel é l'ebʉm laa. Sa gwar, ompʉn be, bé a baadweʼe nye.

⁵ Yesʉs, nye e be ó: «Bwan ɔɔ! Bɨn bé apa jʉ fu ngwar, zê yé abe no ɛ?» Bé e nye ó: «Eee, yé ó no ɔɔ!»

⁶ Nye ó: «Filɨ ga be kʉa é nko paʼ mbo ejʉm ɔɔ! Bɨn bé óbee ɔɔ!» Bé ze fil kʉa é nko paʼ waa, bé ntɔʼ kœb ó, bé a baaka koʼo lé edwih kʉa é modibe, nye osi loŋlo e l'ofu.

⁷ Mpʉn Yesʉs a bul kpɛl ɨ, nye e Pyɛr ó: «Da ó nɨ!» Jɨh tɨʼ Simɔn Pyɛr a kʉ joʼo ó, «Yé ó Da», nye ntɔʼ ze bwar len kʉr we, ebe, nye a be ó fufwah. Nye ntɔʼ ze guho nyʉl é modibe maŋ.

⁸ Bʉʉ ompʉn ntɔʼ duʼo byɛl, lé eze le edulo kʉa lwɨŋla e l'ofu. (Bé a baacɛra e l'ebʉm, kwoʼ be omɨra mowʉm bu.)

⁹ É jɔʼ bé a syel byɛl, bere tin ɨ, bé a kœb ó, duro, lé osi tirɔ, e mbuba fu tɨʼ ndwe e bler.

¹⁰ Yesʉs, nye e be ó: «Ntaʼ ga e bʉʉ ofu é baa bɨn jʉ onɨ.»

¹¹ Simɔn Pyɛr ze kable é byɛl, dwih kʉa lwɨŋla e l'ofu onɨnɨ nter e l'ofu mowʉm motɛn e l'olɛl (153). Dam be bim ofu baa, kʉa a baanyɛɛ!

¹² Yesʉs, nye e be ó: «Ntaʼ, ze de ga cyam-ekaʼ.» Abe e mpʉn ngwar a dî e nye ó: «Yé gwɔɔ zé?», ebe, bé a be ó si gʉa ó, yé ó bana kʉ be Da Yesʉs.

¹³ Yesʉs ze nʉa bler, pɛ̂ʼ be ya bɨpeh, ze dwe nteme be ofu.

¹⁴ É mbi nɨ ó Yesʉs a lɛʼle ompʉn be nye mʉr tɨʼ pie pɛ̀ha foo we.

Yesʉs bé e Pyɛr

¹⁵ Ngbaa be, bé mu si de cyam-ekaʼ nɛʼɛ, Yesʉs ze dî e Simɔn Pyɛr ó: «Simɔn, mwan mo Yʉanes, zê go lé ekpɛl me, laa bim bʉr baʼ ɛ?» Nye ze mɛʼle ó: «Eee, Da, go egʉa ó, me ekpɛl go.» Yesʉs, nye e nye ó: «Kobla bwa o bɨntœme byam.»

¹⁶ Nye ze dî e nye é jɔʼ mba ó: «Simɔn, mwan mo Yʉanes, zê go lé ekpɛl me ɛ?» Nye e nye ó: «Eee, Da, go egʉa ó, me ekpɛl go.» Yesʉs, nye e nye ó: «Kobla daa e bɨntœme lam.»

¹⁷ Pie tɨ, nye ze bâʼle dî e nye é jɔʼ lɛl ó: «Simɔn, mwan mo Yʉanes, zê go lé ekpɛl me ɛ?» Pyɛr ntɔʼ liʼ é gœʼra-gœʼra e mocyɛʼ mo nyʉl, ebe, Yesʉs a si bâʼle dî e nye é jɔʼ lɛl ó: «Simɔn, mwan mo Yʉanes, zê go lé ekpɛl me ɛ?» Nye e nye ó: «Da, go egʉa sa yiyɛh! Go ekʉ gʉa nteme ó, me ekpɛl go!» Yesʉs, nye e nye ó: «Kobla daa e bɨntœme lam.

¹⁸ Me elɛɛ go cyecye ó nɛɛ: é jɔʼ go a be, go dina ma soho e, go mʉr tɨʼ ó b'a tiile-tiile kana go, to nko go a kpɛl ɨ. Sa gwar, é jɔʼ go óbe, go mu si jwɨm ɨ, go óbɨr mobo, mʉr fih ze tiile go kana, to e go nko gwɔɔ ndɨ akpɛl to e.»

¹⁹ (Yesʉs a lwib no ó, lé elɛʼle mbi efie Pyɛr ódwè e. Mbi efie we waa, wé ósa ó, bʉr dweʼ Zyɛm kum.) Yesʉs, nye e nye ó: «Duʼo me.»

²⁰ Pyɛr ze dwibra, dwɛʼ pihe nɛʼɛ, nye ze bee mpʉn Yesʉs a bul kpɛl ɨ, lé edu be é koo pihe. (Nye ó b'a jyɛʼ lʉ é bɨr mo Yesʉs é jɔʼ bé a be lé ede é l'ebʉʼ ɨ. Nye nteme ó b'a dî ó: «Da, zé ókɛha go ɛ?»)

²¹ Mbea Pyɛr a bee nye lé edu be e, nye e Yesʉs ó: «Da! A waa nwaʼ nyɛɛ, nye ósa nyá ɛ?»

²² Yesʉs, nye e nye ó: «ǃMe si kpɛl ó, nye diʼe tɨʼ, to pyal é dobo me óbula ze nɛʼɛ, go e wáa lɔb tɨ? Gwɔɔ, duʼo me!»

²³ Taare é jɔʼ yaa, ze pyal é muh é dobo lɨ, lɔɔ, wi ze myɛma é l'esama le obuʼla ó, mpʉn waa, nye aŋa ka dwè. To kœb ó, Yesʉs a baalɛɛ Pyɛr ó: «Nye ákwoʼ dwè!» Nye a kʉ ka lɛɛ ó njɨ: «ǃMe si kpɛl ó, nye diʼe tɨʼ, to pyal é dobo me óbula ze nɛʼɛ, gwɔɔ, go e wáa lɔb tɨ?»

²⁴ Mʉr lé eboʼlo le etile bɨsa biʼ ɨ, nye ó ndɨ mpʉn we waa! Bɨh bé ekʉ gʉa ó, bɨsa nye lé eboʼlo e, byé ó cyecye.

²⁵ Yesʉs a be ó si sa byʉʉ bɨsyɛɛla é buobuo. Mbea wam, wé ó, nkʉ bɨsyɛɛla byaa, byé a be ó be, taŋlɔ bibyɛh nɛʼɛ, me abuʼla ó si nwaʼ a ngbaa koʼo ebeʼe le okalara o mɨtɔɔlʉ myaa.