Yʉanes 2 - Kálara Zyɛ̌m Edwán é mpʉ̌n

Zɔɔ eba ɨ Kana

¹ Molu molɛl, mé osi laa nɛʼɛ, zɔɔ eba ze bwalɔ ɨ kwar Kana é lal Galɨle. Nyɔŋ mo Yesʉs a be ó tɨ.

² Bé a si baŋle nteme Yesʉs bé e l'ompʉn be é zɔɔ waa.

³ É mpʉ monwoʼ mo rezɛŋ, mé a be si sɔr ɨ, nyɔŋ mo Yesʉs ntɔʼ lɛɛ e mwan ó: «Bé mu naa ó, aka be e monwoʼ.»

⁴ No ó Yesʉs a ze bɨha e nye ó: «Ayo! Go esaa yé e me? Ewala lam, lé dina ó apa pyal.»

⁵ No ó nyɔŋ a ze lɛɛ e l'osyɛl o mosa ó: «Saʼ ga sa yiyɛh nye ólɛɛ bɨn ɨ.»

⁶ Bé a be tina ó e mɨswɨɨ tobo myé a be mɨpiʼla é mokoʼ e. Mɨswɨɨ myaa ó b'a baʼle-baʼle modibe oYʉden, bé a pubo-pubo monyʉl mɔɔ e tɨʼ ɨ. Bé a sa no ó, lé edu mpʉ buʼo yɔɔ lé elɛɛ ɛ. Swɨɨ ngwar, wé a be ó, bɛm nʉa olira nter!

⁷ Yesʉs, nye e l'osyɛl o mosa ó: «Loŋla ga mɨswɨɨ mɨnɨ e modibe.» Bé ze loŋlo mye é tɨŋ tɨŋ.

⁸ Yesʉs, nye e be ó: «É jɔʼ nɨ, taara daale ga modibe monɨ. Bɨn toʼ, to dwe mʉr cyel zɔɔ ɛ, nye bobla.» Bé ze sa no.

⁹ É jɔʼ cyela zɔɔ a ka boblo e, nye ka joʼo nɛʼɛ, monwoʼ ó ma! (Nyɛɛ agʉa yɛɛ nko monwoʼ maa, mé a duho e. Osyɛl o mosa bé a daale modibe maa ɛ, bé ome ó b'a gʉa.) No ó cyela zɔɔ a ze jebe mʉrʉm a bɛa dobo laa ɛ.

¹⁰ Nye e nye ó: «Mʉr nyiwɛh, nye etaare dwe-dwe ó mbɨambɨa monwoʼ, pie tɨ, maa ndɨ paʼ tɨʼ ɨ, é jɔʼ bʉr, bé óbe, bé mu é mpur ɨ. Sa gwar, gwɔɔ be ó si komo mpaŋ monwoʼ, ze pyal é banana!»

¹¹ Yiha ó ndɨ dweʼle nkul we efoʼ Yesʉs a sa ɛ, nye ndɨ ɨ Kana, é lal Galɨle. Moncɛnba me, mé ze nyin é zi syɛɛla yaa. Ompʉn be, bé ntɔʼ bâʼle bul jyɛʼ taa buʼo yɔɔ boo nye.

¹² Pie tɨ, nye ze to nkana Kapernaʉm, bé e nyɔŋ, le obɨɔ, ndwe e l'ompʉn be. Bé ze to di gʉʼ bwa molu.

Yesʉs lé efo bʉr é jahla bii mo Zyɛm

¹³ Mpʉ ebʉʼ e Paska le oYʉden, lé a be, lé mu kunokuno le epyal ɨ, Yesʉs ze to Yerʉsalɛm.

¹⁴ Ngbaa le eka be, nye mu é jahla bii mo Zyɛm nɛʼɛ, nye ze kœb obɛma o bɨntɛɛ bé e le obɛma o bɨntœme le mopɨba e bʉr o b'a siila bɨmɔn ɨ, bɛɛ ondindil é l'oteble bɔɔ.

¹⁵ No ó Yesʉs a ze sa mbihe e mɨkol, ze kɛ̂m bʉr baa é jahla bii mo Zyɛm, kɛ̂m nteme bɨntœme ndwe e bɨntɛɛ byɔɔ, taare lé esʉ bɨmɔn byɔɔ si, le eloʼlo oteble bɔɔ si.

¹⁶ Nye e bʉr o b'a be lé ebɛma mopɨba ó: «Pɛʼɛ ga mopɨba mɨn mɨmɛh wâ! Daʼ liŋ ga Mbɛr mo Sɔŋ wam mpah engar!»

¹⁷ Ompʉn be ze toŋlo mpʉ yé a bɛa be tila é Kalara Zyɛm ó: «Me ekpɛl mbɛr go kpɛl apurapura!»

¹⁸ Ebe no ó oYʉden, bé a ze dî e nye ó: «Láa esima go ndɨ si pa sa mpʉ dweʼle, sa yé ólɛʼle bɨh ó, go a be ó si dweŋɔ nkul esa mbi nɨ ɨ?»

¹⁹ No ó Yesʉs a ze bɨha e be ó: «Buʼa ga Odia mo Zyɛm wi. Me óbâʼle fumo we njɨ molu molɛl!»

²⁰ No ó oYʉden, bé a lɛɛ e nye ó: «Ngbàa bɨh bé a taare lé efumo Mpah Zyɛm nwa, yé mu mɨmbu mowʉm monâ e tobo. No ó, go lɛɛ ó, gwɔɔ, go ókoʼo lé efumo we molu molɛl nyá ɛ?»

^21-22 (Ebe no, é jɔʼ Yesʉs a pàh é foo e, ompʉn be, bé a si toŋlo mokan me maa, ntɔʼ gʉa ó, mpa «Odia mo Zyɛm» Yesʉs a lɛɛ ɛ, a be ó nyʉl we nye mʉr tɨ! Bé ntɔʼ buʼla Kalara Zyɛm ndwe e bɨlwib mo Yesʉs.)

Yesʉs lé egʉa sa ndɨ mʉr é mo si ɨ

²³ É jɔʼ yiyɛh ebʉʼ e Paska laa, lé a bwalɔ-bwalɔ ɛ, Yesʉs a be ó ɨ Yerʉsalɛm. Buobuo bʉr ze jyɛʼɔ taa buʼo yɔɔ boo nye ebe bɨdweʼle bɨ nkul we bé a bee e.

²⁴ Yesʉs nyɛɛ a baabuʼla be, ebe, nye a be ó si gʉa bɨbɛh.

²⁵ Nye a baagwɨm ó, mʉr tɨa nye sɔʼɔ, tiibe e mʉr, ebe, nye mʉr tɨʼ a be ó si gʉa sa ndɨ ɨ leme mo mʉr ɨ, é kpɛhla.