Yʉanes 18 - Kálara Zyɛ̌m Edwán é mpʉ̌n

Yesʉs, nyi naʼɔ mobo é nyʉl

¹ Jɔʼ Yesʉs a sil lwib no e, bé e l'ompʉn be ze laa, toŋɔ pɨn ndwaŋ Kedron nkɔm-nkɛɛ. Peme, yé a be ó gʉ. Bé e l'ompʉn be ze to diŋɔ tɨ.

² Yʉdas, mʉr a kɛha Yesʉs ɨ, a be ó lé ebɛa gʉa gumo yaa, ebe, Yesʉs bé e l'ompʉn be, bé a be ó lé eto gwɨhla-gwɨhla gʉ.

³ Yʉdas ze du be gʉ, bé e ntoo bɨzima ndwe e byʉʉ bɨpulʉm ojwɨɨ be opara bé e l'oFarizyɛŋ, bé a lomo e. Bé a be ó e mokʉa mo dɔm ndwe e molama; baʼ e motwim mo mpah.

⁴ Tina, yé ó, mpʉ Yesʉs a be lé egʉa sa yé ópyal nye e, nye ntɔʼ to nko bé a be e, ze dî e be ó: «Zé bɨn lé esaa ɛ?»

⁵ Bé e nye ó: «Yesʉs, mʉr Nazarɛt.» Yesʉs, nye e be ó: «Me ó nwa.» (Yʉdas, mʉr a kɛha nye e, nteme é sama.)

⁶ É jɔʼ Yesʉs a lɛɛ e be ó, «Me ó nwaʼ» ɛ, bé ze tubla e mɨkoo, to le eduma si e si omyacyɛŋ é nkɨŋlɨ.

⁷ Yesʉs ze bâʼle dî e be ó: «Zé bɨn lé esaa ɛ?» Bé ó: «Yesʉs, mʉr Nazarɛt.»

⁸ Yesʉs, nye e be ó: «Me si bɛa lɛɛ e bɨn ó, me ó nwa. Yé be ó, me ó waa bɨn lé esaa nɛʼɛ, birɨ ga be bʉr ba, bé toʼ.»

⁹ Yé a syɛɛlɨ no ó, lé edira mokan nye a bɛa lɛɛ ɛ. Mokan maa, mé a be ó: «Da, me a baadimle mʉr ngwar é sama bʉr go a ntɨh me e.»

¹⁰ No ó, Simɔn Pyɛr a be ó e fòŋ. Nye ze gœm we é pɔb, syɛh syɛl mosa mo njwɨɨ opara egwal le ejʉm é bem. (Syɛl mosa waa a be die ó, Malkus.)

¹¹ Yesʉs, nye e Pyɛr ó: «Fwama fòŋ go é pɔb. Zê go lé ejwɨʼ ó, me aŋa nyʉl bele Sɔŋ wam timle me yiʼ ɛ?»

Yesʉs é mih mo Anas

¹² Njwɨɨ bɨzima nɨnɨ bé e ntoo bɨzima ye, ndwe e bɨpulʉm bɨ oYʉden, ze naʼɔ Yesʉs mobo é nyʉl, kaʼɔ nye.

¹³ Bé a taare to e nye ó, é bii mo Anas. Tina, yé ó, Anas a be ó tǐ mo Kayɨfa, waa a be njwɨɨ opara é mbu waa ɛ.

¹⁴ Kayɨfa waa, nye ó b'a tɨe oYʉden ó: «Yé é mbɨa ó, mʉr ngwar dwèʼ jala e kul ga yina.»

Pyɛr lé ekɛla ó, nye abe mpʉn mo Yesʉs

¹⁵ Simɔn Pyɛr bé e nuu mpʉn, bé a be ó lé edu Yesʉs. Njwɨɨ opara ze dweʼe nyiha mpʉn. Ebe no ó bé a mɛʼle ó, bé e Yesʉs niʼe jɔʼ gwar é bii mo njwɨɨ opara ɛ.

¹⁶ Tina, yé ó, Pyɛr nyɛɛ a liʼ ó é mpom mompah mé a be é bii ɨ. Nuu mpʉn, waa njwɨɨ opara a be lé egʉa ɛ, ze pyal kʉl, lwib e syɛl mosa mʉma a be cyela tɨʼ é vaa ɛ, mʉma waa ze niŋle nteme Pyɛr.

¹⁷ Mʉma a cyɛb é vaa ɛ, nye e Pyɛr ó: «Go, zê gwɔɔ nteme, go ó mʉr ngwar é l'ompʉn mo mʉr nwaʼ ɛ?» Pyɛr, nye ó: «Abe mɛm.»

¹⁸ Mpʉ yé a kʉ bul sa ejyoo e, osyɛl o mosa ndwe e bɨpulʉm bɨ oYʉden, bé a be ó si paʼra duro, lé edwablɔ siʼe. Pyɛr nteme a be ó tɨ, lé edwable siʼe, bé e boo nɔɔ.

Yesʉs lé ebɨha motia mo njwɨɨ opara

¹⁹ É mpʉ Yesʉs a toŋɔ e nye boo njwɨɨ opara Anas ɨ, Anas ze ntɛŋ nye motia é lɔb ompʉn be ndwe e sikʉlʉ nye a dwe-dwe be e.

²⁰ Yesʉs, nye e nye ó: «Me a baalɛɛ yʉʉ sɔʼɔ é l'efo. Me a kʉ dɨ lwib e bʉr bɨbɛh ó, é kpɛŋlɛm. Me a dwe bʉr sikʉlʉ yam ó, é mompah mɨnjwɨʼla mɔɔ, ndwe é jahla bii mo Zyɛm tʉŋlʉ, bɨgumo oYʉden lé egwɨhla jɔʼ yiyɛh ɛ.

²¹ Ebe yé go lé eka bâʼle dî me motia monɨ ɨ? Dîʼe bʉr o b'a joʼo-joʼo lɔɔ wam ɨ. Bé egʉa bɨsa me a lɛɛ-lɛɛ ɛ, mbɨmbɨa.»

²² É jɔʼ Yesʉs a sil lwib no e, nuu ma pulʉm a be kunokuno e nye e, kʉ ze jaa nye bɛh é l'emuʼ é kaaa. Nye e nye ó: «Zê mpʉnʉ ó go lé ebɨha e njwɨɨ opara ɛ?»

²³ Yesʉs, nye e nye ó: «Yé be ó, me si jeʼe elwib nɛʼɛ, lɛŋɨ be sa ebebe me lɛɛ ɛ. Yé be ó, me be ó si lwib mbɨmbɨa nɛʼɛ, go eŋmɛh me dɔɔ waa yé?»

²⁴ Anas ze bula cen nye kɛʼa monkara boo njwɨɨ opara Kayɨfa.

Pyɛr lé ebâʼle kɛla ó, nye agʉa Yesʉs

²⁵ Cye yiyɛh bé a di naa ɛ, Simɔn Pyɛr nyɛɛ a be ó njɨ gumo nye a be lé edwable siʼe e. Bé ze dî e nye ó: «Zê go nteme, go ó mpʉn mo mʉr nwaʼ ɛ?» Pyɛr ze kɛla. Nye e be ó: «Me abe nye!»

²⁶ Nuu syɛl mosa mo njwɨɨ opara a be ó mbyɛl mo mʉr Pyɛr a syɛh egwal ɨ. Nye e nye ó: «Zê me baasi bee go, bɨn e boo nɔɔ kaʼ peme ɛ?»

²⁷ Pyɛr ze bâʼle kɛla. Nye e nye ó: «Yé baabe mɛm.» Cye e cye yaa, zʉm kuo ze kwaʼle.

Yesʉs é bii mo ngoman Pilat

²⁸ Bé ze bula e Yesʉs é bii mo Kayɨfa, ze toŋɔ e nye é bii mo ngoman. Yé a be ó é dwine mɛn. OYʉden bɛɛ, bé a baani é bii mo ngoman, lé ekpɛɛ ó, syɛɛla yaa, yé ódulo mpir é monyʉl mɔɔ, bé ntɔʼ ka fib mode mo Paska.

²⁹ Ebe no ó Pilat a pyal kʉl, to nko bɛɛ, bé a be e. Nye ze dî e be ó: «Byáa bɨtoora bɨn lé etooro mʉr nwaʼ biʼ ɛ!»

³⁰ Bé e nye ó: «Nkʉ nye a be ó be, abe lé entaa motie nɛʼɛ, mpa bɨh bé aze e nye go ye.»

³¹ Pilat, nye e be ó: «Bɨn bʉr o tɨ, nʉŋa ga nye. Toʼ, to tiʼe ga lɔb we mpʉ motie mɨn lé elɛɛ ɛ.» OYʉden, bé e nye ó: «Yé ó kɔmlʉ ó, bɨh jʉʼo mʉr.»

³² Yé a syɛɛlɨ no ó, lé edira mokan Yesʉs a lɛɛ, tiibe e mbi efie nye a be ó, nye ódwè e.

³³ Pilat ze bula ni é mpah a be é bii ye e. Nye ze jebe Yesʉs, dî e nye ó: «Zê go ó ndɨ njwɨɨbʉr oYʉden ɛ?»

³⁴ Yesʉs ze bɨha e nye ó: «Zê go lé elɛɛ no ó, ebe, yé ó toŋla yo ɛ? Zê yé ó, ebe, bʉʉ bʉr, bé a si lɛɛ go lɔb wam ɛ?»

³⁵ Pilat ze dî e nye ó: «Zê me ó Yʉden ɛ? Bʉr o kul yo bé e l'ojwɨɨ be opara, bé ô ntɨh go wâ. Go a pa kʉ sa yɛɛ yé?»

³⁶ Yesʉs ze bɨha ó: «Jwɨ̀ʼa yam, yé abe é mbi jɔʼ yi. Nkʉ jwɨ̀ʼa yam be ó be, be yaa mbi jɔʼ yi nɛʼɛ, mpa osyɛl o mosa bam be ó, si lwimla lé ekamle bʉr lé ekɛha me é l'oYʉden. Sa gwar, yé abe no. jwɨ̀ʼa yam, yé abe ka.»

³⁷ Pilat, nye e nye ó: «No ó, go ó bana kʉ be njwɨɨbʉr!» Yesʉs ze bɨha ó: «Go mʉr tɨ, gɨ lɛɛ ó, me ó njwɨɨbʉr. Me a byɛl, ze kaʼ é si nwaʼ ó, lé eze lɛɛ bʉr ocyecye. Mʉr nyiwɛh lé egumo e mʉr lé elɛɛ ocyecye e, nye ejoʼo sa me lé elɛɛ ɛ.»

³⁸ Pilat ze dî e nye ó: «Ocyecye wɛɛ, wé yé?» Mpʉ Pilat a sil lwib no e, nye ze bâʼle pyal kʉl, to nko oYʉden, bé a be e. Nye ó: «É bɨpura bin, me abee sa ebebe nye pa kʉ sa ó, nye dweŋɔ mobe mo jala e l'efie e.

Bé etiʼe lɔb mo Yesʉs

³⁹ Sa gwar, bɨn yɛɛ bé e njwɨr ó, me birɨ mʉr ngwar é l'ebʉʼ e Paska. Zê bɨn bé lé egwɨm ó, me birɨ bɨn waa lé ejebɔ ó, “njwɨɨbʉr oYʉden” ɨ?»

⁴⁰ Bɨbɛh ze lwib lé eyɨm twii ó: «Hɨʼɨ, abe nye. Bɨh bé egwɨm ó, go birɨ bɨh Barabas.» No ó, Barabas nɨ a be ó zilngan.