Yʉanes 15 - Kálara Zyɛ̌m Edwán é mpʉ̌n

Yesʉs ó ndɨ etin e rezɛŋ

¹ «Me ó mpaŋ etin e rezɛŋ. Sɔŋ wam ó b'a bè le. Nye nteme ó ndɨ ebaʼle le.

² Mɨlɔɔ mɨ tɨʼ mimyɛh ndɨ agumo mpumo e, nye etiʼe mye. No ó, mɨlɔɔ mimyɛh ndɨ e mpumo e, nye etiʼe-tiʼe bɨntoʼdu lé epah tɨʼ ɨ, le ekomlo mye ó, myé guma mpumo é buobuo.

³ Motɨɨ me a dwe bɨn ɨ, mɨ pubo bɨn. Bɨn mu ó mɨpuba.

⁴ Diʼe ga ɨ me, mɛm nteme ɨ bɨn. Lɔɔ rezɛŋ, wé abe e nkul egumo mpumo wé ome, anara e l'etin. Yé be ó, bɨn bé anara e me nɛʼɛ, lɛɛ ó, bɨn nteme bé abe e nkul egumo mpumo.

⁵ «Me ó ndɨ etin e rezɛŋ; bɨn bɛɛ, bé ó mɨlɔɔ. Mʉr bɨh e nɔɔ ndɨ é zyɛŋa ɛ, nye ó ndɨ egumo mpumo é buobuo, ebe, ǃme baabe tɨʼ nɛʼɛ, gʉŋa ga ó, bɨn bé abe e nkul esa yʉʉ mpaŋ sɔʼɔ.

⁶ Mʉr bɨh e nɔɔ ndɨ abe é zyɛŋa ɛ, nye ómyahɔ kʉl mpʉ lɔɔ rezɛŋ ndɨ agumo e, wé lé emyahɔ ɛ. Wé efwâh. Bé ntɔʼ syɛŋ mɨlɔɔ myaa, é syɛŋ, syɛŋ, guho mye é l'ebeʼe e siʼe. Myé ntɔʼ sie lé ediʼe.

⁷ ǃBɨn si be é zyɛŋa wina, mokan mam loŋlo bɨn é mɨleme nɛʼɛ, dîʼe ga sa yiyɛh bɨn bé ókpɛl ɨ. Yé ósyɛɛ bɨn no.

⁸ Sɔŋ wam óbi kum ó, é jɔʼ bɨn bé ógumo buobuo mpumo, le edi ompʉn bam ɨ.

⁹ «Me ekpɛl bɨn mpʉ Sɔŋ wam lé ekpɛl me e. Diʼe ga é kpɛl yam tʉŋlʉ.

¹⁰ ǃBɨn si du mɨtiila me lé etiile bɨn nɛʼɛ, bɨn bé óbe ó bʉr me lé ekpɛl ɨ, ebe, mɨ du mɨtiila Sɔŋ wam a tiile me e. Me egʉa nteme ó, nye ekpɛl me.

¹¹ Me elɛɛ bɨn no ó, bɨn soha mpʉ me lé esoho e. Me ekpɛl ó, bɨsʉhʉ bin, byé diʼe ntinɨ e ntinɨ.

¹² Me etiile bɨn tiila ó, kpɛla ga paʼra win, mpʉ me a kpɛl bɨn ɨ.

¹³ Kpɛl ndɨ é bul laŋle bwaʼ ɛ, yé ó yaa mo mʉr lé edwe tiʼ ye é ziila e l'ofo be e.

¹⁴ ǃBɨn si du motie me lé etiile bɨn nɛʼɛ, kʉ gʉa ó, bɨn bé óbe ó ofo bam.

¹⁵ Me a taare jebe bɨn ó, osyɛl o mosa bam. No ó, me aŋa ka sa no, ebe, syɛl mosa, nye agʉa sa masa we lé esa ɛ. Me mu ó lé ejebe bɨn ó, ofo bam, ebe, mɨ gwih bɨn sa yiyɛh me a joʼo boo Sɔŋ wam ɨ.

¹⁶ Ntʉʼ bɨn bé a pɛh me. Mɛm ó b'a pɛh bɨn. Me ó b'a lomo bɨn ó, bɨn toʼ, to gumo mpumo. Mpumo waa ódi njʉmdia e njʉmdia. No ó, Sɔŋ wam ódwe bɨn sa yiyɛh bɨn bé ódî le ejaʼ nye, pere e die lam ɨ.

¹⁷ Etie me lé etiile bɨn ɨ, lé ó, bɨn kpɛla paʼra win.»

Bʉr o si nwa, bé mu lé eka bene ó, Yesʉs bé e l'ompʉn be.

¹⁸ «ǃƗ bʉr o ndɨ egumo e si nwaʼ si nwim bɨn nɛʼɛ, gʉŋa ga ó, bé a taare lé enwim ó me.

¹⁹ Nkʉ bɨn bé a be ó be, be bʉr o si nwaʼ nɛʼɛ, mpa bʉr o si nwa, bé a be ó si kʉ kpɛl bɨn, bʉr o ndɨ egumo e be e. To kœb ó, me a be ó si pɛh bɨn, pɛʼ bɨn é nkɔm bʉr o si nwa, gba bɨn é nkɔm wam. Ebe no ó bʉr o si nwaʼ mu si nwim bɨn ɨ.

²⁰ Toŋla ga sa me a lɛɛ bɨn ɨ: “Syɛl mosa álaa masa we é duu.” Yé be ó, bé a si tíile me nɛʼɛ, gʉŋa ga ó, bé ótíile bɨn nteme! Yé be ó, bé a si joʼo sikʉlʉ yam nɛʼɛ, gʉŋa ga ó, bé ójoʼo nteme yaa yin.

²¹ «Sa gwar, bé ótíile bɨn ó, é lɔb wam, ebe, bé agʉa mʉr a ntɨh me e.

²² Nkʉ me a be ó be, aze, ze lwib e be nɛʼɛ, mpa bé adweŋɔ mobe é lɔb mɨsyem myɔɔ. No ó, banana, bé aka be e nkar.

²³ «Mʉr lé enwim me e, nye enwim nteme ó Sɔŋ wam.

²⁴ Nkʉ me a be ó be, asa mbi bɨsyɛɛla nuu mʉr a baapa sa paʼra wɔɔ nɛʼɛ, mpa bé adweŋɔ mobe é lɔb mɨsyem myɔɔ. To kœb ó, banana, bɨ bee bɨsyɛɛla byam. Bé dina ó, lé ekʉ nwim bɨh e Sɔŋ wam.

²⁵ Sa gwar, bé esa no ó, lé edira lɔɔ ndɨ tila é l'okalara o motie bɔɔ ó: “Bé a nwim me ó, kʉ be mbɛh, bɨh e boo nɔɔ abe e lɔb.”

²⁶ «Mʉr ndɨ ekamle e bɨn ɨ, nye óze. Nye ó ndɨ Sisim Ocyecye, wé óduho boo Sɔŋ wam ɨ. Me ólomlo bɨn nya. Nye òduho boo Sɔŋ wam, ntɔʼ ze boʼlo lɔb wam.

²⁷ Bɨn bɛɛ nteme, bé óboʼlo lɔb wam waa, ebe, bɨna ga ó b'a be, duho é l'etɔɔrʉ.»