Yʉanes 14 - Kálara Zyɛ̌m Edwán é mpʉ̌n

Mʉr lé egwɨm to boo Zyɛm ɨ, nye ekumo tɨʼ cwɨɨ é Yesʉs

¹ Yesʉs, nye e be ó: «Asyɛl ga ba. Bɨn bɨ jyɛʼ taa buʼo yin boo Zyɛm. Jyɛʼɛ ga nteme ye boo me.

² Me paʼ to komlo bɨn modia gumo bɨn bé óto di ɨ. Mbɛr mo Sɔŋ wam, wé ó, é buo modia. Nkʉ yé a be ó be, abe no nɛʼɛ, mpa me a baalɛɛ e bɨn ó, me óto komlo bɨn modia gʉ.

³ É jɔʼ me óbe si to, sil to komlo bɨn modia maa ɛ, me óbula ze nʉa bɨn é l'efu ó, bɨn toʼ, to di gumo me ódi ɨ.

⁴ Bɨn bé egʉa zi lé eto nko me lé eto e.»

⁵ Tomas, nye e nye ó: «Da, bɨh bé agʉa nko go muno to e. A bɨh bɛɛ, bé ódweʼe zi waa nyá ɛ?»

⁶ Yesʉs, nye e nye ó: «Me ó ndɨ zi. Me ó ndɨ é l'ocyecye. Me ó ndɨ Etin e tiʼ. Mʉr, nye abe e nkul eto nko Sɔŋ wam ndɨ ɨ, cwɨɨ é nuu zi fih, nkʉ yé abe é me.

⁷ Nkʉ bɨn bé a be ó be, gʉa me nɛʼɛ, mpa bɨn bɨ bɛa gʉa nteme Sɔŋ wam. Taare é banana, bɨn mu ó si gʉa nye. Bɨn nteme bɨ bee nye!»

⁸ Filip, nye e nye ó: «Da, lɛʼla bɨh Sɔŋ go. Bim yaa jala e bɨh.»

⁹ Yesʉs ze bɨha e nye ó: «A bɛa bɨna bɨ di ga! No ó, Filip, go dina ó apa gʉa me? Mʉr mu si bee me e, nyi bee nteme Sɔŋ wam. A, ebe yé go lɛɛ ó: “Lɛʼla bɨh Sɔŋ go” e?

¹⁰ Zê go abuʼla ó, me ó é zyɛŋa wih boo Sɔŋ wam ɛ? Sɔŋ wam, nye etiʼe ó, é me. Lwib me lé elwib e bɨn bɨbɛh ɛ, me alwib ye njɨ é nkul wam me mʉr tɨ. Sɔŋ wam, mʉr bɨh e nɔɔ lé edi ɨ, nye ó ndɨ eloŋlo bɨsyɛɛla bye.

¹¹ Buʼla ga me é jɔʼ me lé elɛɛ ó: “Me ó é zyɛŋa wih boo Sɔŋ wam; Sɔŋ wam, nye etiʼe ó, é me” e. Yé be ó, bɨn bé abuʼla lɔɔ wam waa nɛʼɛ, buʼla ga be ebe bɨsyɛɛla byam.

¹² «Me elɛɛ bɨn cyecye ó nɛɛ: mʉr lé ejyɛʼ taa buʼo ye boo me e, nye ósa nteme bɨsyɛɛla me lé esa ɛ. Nye nteme ósa byaa ndɨ é laŋle bwaʼ ɛ, ebe, me ebula, to gumo Sɔŋ wam ndɨ ɨ.

¹³ Me óntɨh bɨn sa yiyɛh bɨn bé ódî le ejaʼ Sɔŋ wam, pere e die lam ɨ. É mbi waa ó bʉr, bé ógumlo Zyɛm Sɔŋ ebe Mwan mo Zyɛm ɨ.

¹⁴ ǃBɨn si jaʼ sɔʼɔ, pere e die lam nɛʼɛ, me ódwe bɨn ya.»

Zea Mbɨambɨa Sisim

¹⁵ «ǃBɨn si kpɛl me nɛʼɛ, bɨn nteme, bé ódu mɨtiila me lé etiile bɨn ɨ.

¹⁶ Me ódî Sɔŋ wam ó, nye ntɨhɨ bɨn nuu mʉr ókamle e bɨn mpʉ mo me e. Nye óze di e bɨn é jɔʼ yiyɛh.

¹⁷ Nye ó ndɨ Sisim Ocyecye. Bʉr o ndɨ egumo e si nwaʼ ɛ, bé abe e nkul enʉa nye é monyʉl mɔɔ, ebe, bé abe e nkul ebee nye, nkʉ gʉa nye. Bɨn ó ndɨ egʉa nye, ebe, nye edi ó, bɨn e boo nɔɔ. Nye nteme, nye ó é l'esama lɨn.

¹⁸ «Me ákwoʼ liʼe bɨn bwɔɔnul. Me óbula ze kœb bɨn

¹⁹ Yi liʼ ba titia: bʉr o ndɨ egumo e si nwaʼ ɛ, bé aŋa ka bee me. Sa gwar, bɨn bɛɛ, bé ókʉ bee me. Bɨn nteme, bé óbi tiʼ molu mo mpoʼ mɨmɛh ebe tiʼ me ndɨ e ye e.

²⁰ Dobo laa, bɨn bé ógʉa ó, me ó ɨ Sɔŋ wam, ndwe nteme, bɨn bé ó ɨ me, mɛm ɨ bɨn.

²¹ «Mʉr lé ebaʼle mɨtiila myam le edu mye e, nye ó ndɨ ekpɛl me. Waa nyiwɛh ndɨ ekpɛl me e, nye ó waa Sɔŋ wam ókpɛl ɨ. Me nteme ókpɛl nye. Me ópyal boo nye.»

²² Yʉd (abe yɛɛ Yʉdas yaa Iskariot), nye e nye ó: «Da, ebe yé go ópyal njɨ boo bɨh, aka pyal boo bʉr o si nwaʼ ɛ?»

²³ Yesʉs ze bɨha e nye ó: «Mʉr lé ekpɛl me e, nye óbaʼle sikʉlʉ me a dwe bɨn ɨ, ndwe le edu ye. Sɔŋ wam ókpɛl nye. No ó, bɨh e Sɔŋ wam, bé óze boo nye, ze komlo odia wih tɨ.

²⁴ Mʉr ndɨ akpɛl me e, nye adu mokan me lé elɛɛ ɛ. Sa bɨn lé ejoʼo me lé elɛɛ nɨ, yé abe lɔɔ wam. Yé eduho ó boo Sɔŋ wam, mʉr a ntɨh me e.

²⁵ «Me elɛɛ bɨn bɨsa bɨnɨ ó, é jɔʼ bɨna ga dina ɛ.

²⁶ Mʉr ndɨ ekamle e bɨn ɨ, nye ó Mbɨambɨa Sisim. Sɔŋ wam ólomlo bɨn wa ó, é die lam. Nye óyeʼle bɨn sa yiyɛh, lé ejɨm bɨn bɨtoŋla é lɔb sa yiyɛh me a lɛɛ-lɛɛ bɨn ɨ.

²⁷ «Motala ó me lé eliʼe bɨn e ma ma. Motala mam ó me lé edwe bɨn ma. Me adwe bɨn motala mam mpʉ bʉr o si nwaʼ lé edweela bɨsɔʼɔ, ka bula dɛn bye e. Asyɛl ga ba. Ajoʼo ga bʉa.

²⁸ «Bɨn bé a be ó si joʼo mpʉ me a lɛɛ e bɨn ó: “Me muno ze fiʼ. Me óbula ze, ze pyal gumo bɨn bé óbe e.” Nkʉ bɨn bé a be ó be, kpɛl me cyecye nɛʼɛ, mpa bɨn mu ó lé esoho, le egʉa ó, me efiʼ ó, to boo Sɔŋ wam, ebe, Sɔŋ wam ó lé elaa me.

²⁹ Me elɛɛ bɨn bɨsa bɨnɨ, byé l'apa syɛɛ ó, bɨn gʉŋa. ǃByé óbe si syɛɛ nɛʼɛ, bɨn bé óbuʼla é jɔʼ yaa.

³⁰ Me aŋa ka bâʼle bul lwib e bɨn, ebe, “njwɨɨ mbi jɔʼ yi”, nye mu ó lé eze. Nye abe e nkul ejwɨɨ yɛɛ e mɛm.

³¹ No ó, yé ekʉ jala ó, bʉr bɨbɛh, bé gʉŋa ó, me ekpɛl Sɔŋ wam, le nteme ó, me esa ó, njɨ mpʉ nye a tiile me motie e. Mʉŋa ga si, bɨna pʉʼa ga wâ.»