Yʉanes 12 - Kálara Zyɛ̌m Edwán é mpʉ̌n

Yesʉs lé elœmɔ mulo Betani

¹ Yé a be ó, ebʉʼ e Paska, lé osi liʼ lé esyɛɛ e molu tobo. Yesʉs ze to Betani, kwar mo Lazar, mʉr nye a pɛ̀h é foo e.

² Bé ze cyel dina é die mo Yesʉs. Marta a be ó lé eka bʉr mode. Lazar bé e Yesʉs, bé a be ó é sama bʉr o b'a be ondindil lé ede e.

³ Maaria ze nʉa ma ntaʼ labina yé a be é mbɨa monumo e. Yé a be ó é lele tɔɔ, sɛa e mpaŋ nard! Nye ze lœm mokʉ mo Yesʉs ya, ze pim me e mpuo lʉ we. Mbɛr wiwɛh ze loŋlo e monumo maa.

⁴ Yé a be ó e nuu mpʉn we, die Yʉdas Iskariot. (Nye waa ó b'a be ó, nye ókɛha Yesʉs ɨ.)

⁵ Nye ze lɛɛ ó: «Yé kʉ jala ó, bɛma labina bɛma bɛma é tɔɔ mɨsaŋ mɨ odenie mɨnter mɨlɛl, ntɔʼ dwe baanteʼenteʼe! Ebe yé yé baasaŋɔ no e?»

⁶ (Nye a baalɛɛ no ebe nkʉnkoo nye a joʼo baanteʼenteʼe e. Nye a kʉ ka lwib no ó njɨ, ebe, nye a be ó ndiblʉ. Nye ó b'a baʼle ekuro lɔɔ, lé edíbe-díbe sa bʉr, bé a gba-gba tɨʼ ɨ, cyel é we mpɨʼ.)

⁷ Yesʉs, nye e nye ó: «Antɨʼ ga nye. Nye esa syɛɛla nɨ ó, tiibe e moho dɨla yam.

⁸ Bɨn e baanteʼenteʼe ó ndɨ é jɔʼ yiyɛh. Bɨna bɛɛ, bé ákwoʼ di ga jɔʼ yiyɛh.»

Bʉm ejʉŋɔ Lazar

⁹ Buobuo oYʉden ntɔʼ joʼo ó, Yesʉs a be ó Betani. Bé a baaka to gʉʼ njɨ é l'efu le ebee Yesʉs. Yé a be nteme ó, é l'efu ó, bé paʼ kʉ to beɔ Lazar e mih, nyɛɛ mʉr Yesʉs a pɛ̀h é foo e.

¹⁰ Ojwɨɨ be opara, bé a ka bà jwɨʼ ó, mpʉ bé lé ejala le ejʉ nteme Lazar ɨ,

¹¹ ebe, é lɔb we ó, buobuo oYʉden, bé a bɔʼa e be, ka jyɛʼ taa buʼo yɔɔ boo Yesʉs ɨ.

Epyal mo Yesʉs: Nyaʼ-nɔn, nye ó odumo o Yerʉsalɛm!

¹² É mɛn tɨ, buobuo bʉr o b'a fwal é l'ebʉʼ ɨ, mpʉ bé a joʼo ó, Yesʉs lwanbe pyal ɨ Yerʉsalɛm ɨ,

¹³ bé ze nʉa mobo molen, ze toŋɔ, to bɔmɔ e nye, le elɛɔ ó: «Kɛɛɛɛɛɛ!» «Mocyɛʼ mo mpom, mé swɨŋɨ é waa lé eze e die mo Da nwa ɔɔ!» «Seʼla ga njwɨɨbʉr lal Ɨzraɛl!»

¹⁴ Yesʉs ze kœb ma jakah, ze kable nye é koo, lé esa syɛɛla yé a be tila é Kalara Zyɛm ɨ. Yé ó tila ó:

¹⁵ «Bʉr o nkana Sion, ajoʼo ga bʉa. Mbe njwɨɨbʉr go lé eze e? Nye ó ndindil é ma jakah kʉ.»

¹⁶ Ompʉn be, bé a baataare joʼo peh Kalara Zyɛm yaa. Bé a ka ze gʉa ye ó, pie jɔʼ Yesʉs a bula bi kum we e. É dobo laa ó bé a taare lé egʉa ó, mpa ogwiha o mɨlɔb, bé a tile-tile bɨsa bɨnɨ bibyɛh ó, tiibe e nye! Bé a ze gʉa nteme ó, bé bʉr o tɨ, bé a sa nye bɨsyɛɛla bɨnɨ ó, kʉ be mpʉ byé a bɛa be mɨtila é Kalara Zyɛm ɨ.

¹⁷ Bʉr bɨbɛh, bé a be gumo Yesʉs a behe Lazar, pɛ̀h nye é foo e, ze to le etaŋle sa yiyɛh bé a bee e.

¹⁸ Ebe no ó mpampaʼ bʉr, bé a si mʉa ɨ Yerʉsalɛm, to bɔma e nye é Betani ɨ, ebe, bé a si joʼo tɔɔlʉ lé etiibe e dweʼle nkul nye a sa ɛ.

¹⁹ OFarizyɛŋ ze taare lé elwibla paʼra wɔɔ. Bé ó: «Mbe ga: bɨna bé aŋa koʼo ga nye! Bʉr bɨbɛh mu kʉ ka du mʉr ó njɨ nye!»

Bʉr o Grɛs, bé esaa Yesʉs

²⁰ Yé a be ó e ntuntuma bʉr yé a to Yerʉsalɛm ɨ. Bʉʉ bʉr o tɨ, bé a be ó bʉr o Grɛs. Bɨbɛh, bé a ze ó, é l'ebʉʼ, lé eze dwiibɨ Zyɛm.

²¹ Bé ze dihle kunokuno e Filip, mʉr Betsɛda ɨ Galɨle. Bé e nye ó: «Da, bɨh bé egwɨm bee Yesʉs.»

²² Filip, nyi laa, to lɛɛ Andreas, bɨbɛh oba ze to lɛɔ Yesʉs.

²³ Yesʉs, nye e be ó: «Banana, jɔʼ Mwan mo Mʉr lé ekʉ jala le ebi kum we e, yé mu ó si pyal!

²⁴ Me elɛɛ bɨn cyecye ó nɛɛ: bumo di gwar ó, cye yiyɛh yé l'apa bèŋɔ é bɨbwah ɨ. ǃƗ bumo si bèŋɔ é bɨbwah, pah nɛʼɛ, yé ógumo mpumo é buobuo.

²⁵ Mʉr nyiwɛh lé ekpɛl njɨ tiʼ ye e, nye ódimle ye. Mʉr lé enwim tiʼ ye é mbi jɔʼ yiʼ ɨ, nye ókʉ baʼle ye ndwe le ebi tiʼ molu mo mpoʼ mɨmɛh.

²⁶ ǃƗ mʉr si gwɨm sea e me nɛʼɛ, yé ekʉ jala ó, nye duʼo me. Gumo me ndɨ ɨ, gumo yaa ó syɛl mosa wam nteme, nye ódi ɨ. Waa nyiwɛh ósea e me e, Sɔŋ wam ókʉ seʼle nye.»

Mwan mo Mʉr óbɨnɔ kʉ

²⁷ «Banana, leme wam, wé ó me é mo é zaaama. No ó, me lɛŋɨ é yé? Zê me lɛŋɨ Sɔŋ wam ó, nye pɛʼɛ me é sa muno ze pyal me é bananaʼ yiʼ ɛ? Kar! Ebe sa nɨ ó me a ze e, ó me bɔma é jɔʼ mɨtuu.

²⁸ Me ókʉ ka lɛɛ ó njɨ “Da, dweʼ die lo kum é buobuo!”» Twii ze duho é jobo kʉ ó: «Me a si taare dwe le kum. No ó, me óbâʼle dwe le kum é buobuo.»

²⁹ Ntuntuma bʉr yé a be tɨʼ ɨ, yé a be ó si joʼo twii a duho é jobo kʉ ɨ. Baʼ bʉr, bé ntɔʼ lɛɛ ó: «Mpâm nkɛl-jobo ó nɨ!» Bʉʉ bɛɛ ze lɛɔ ó: «Hɨʼɨ, engles, nyi lwib e nye!»

³⁰ Yesʉs nyɛɛ ze nʉa lwib, lɛɛ e be ó: «Twii nɨ baajwɨ̂ʼ ebe me. Nye be lé ejwɨ̂ʼ ó, ebe bɨn!

³¹ Bananaʼ mu ó jɔʼ bʉr o ndɨ egumo e si nwaʼ ɛ, muno ze dweŋɔ mobe e! Banana, Njwɨɨ mbi jɔʼ yiʼ muno ze foŋɔ!

³² No ó, é wam paʼ, é jɔʼ me ópɛʼɔ é si nwa, bɨnɔ kʉ ɨ, me ódulo bʉr bɨbɛh nko me óbe e.»

³³ (Ekan enɨ, lé a be ó lé elɛʼle mbi efie nye ódwè e.)

³⁴ Ntuntuma bʉr, yé e nye ó: «Bɨh bé a si joʼo bab lé eláa é motie mo Zyɛm ó, Lœma mulo mo Zyɛm ódi njʉmdia e njʉmdia. Go ka lɛɛ ó, yé ekʉ jala ó, Mwan mo Mʉr, nye bɨnɔ kʉ. Go lɛɛ no é yé? Zé nyɛɛ ndɨ Mwan mo Mʉr waa ɛ?»

³⁵ Yesʉs, nye e be ó: «Njʉl, wé dina ó, lé epɛn myɛn bɨn ye tɔɔ ma jɔʼ. Kœʼœ ga é jɔʼ njʉl waa dina lé epɛn myɛn ɨ, ebe, edurʉ, lé amu jaa mara bɨn, ebe, mʉr lé eto le entime é l'edurʉ ɨ, nye agʉa nko nye lé eto e.

³⁶ Jyɛʼɛ ga taa buʼo yin boo me, mʉr ndɨ mpaŋ njʉl ɨ, cye njʉl wam, wé dina lé epɛn myɛn ɨ. Ebe no ó bɨn bé ófuʼla bʉr o myɛn ɨ.» É jɔʼ Yesʉs a sil lwib no e, nye ze laa, to fwab be.

OYʉden, bé ajyɛʼ taa buʼo yɔɔ boo Yesʉs

³⁷ Dam be ó Yesʉs a si bul sa bɨdweʼle bɨ nkul we é mih mɔɔ, oYʉden, bé a baajyɛʼ taa buʼo yɔɔ boo nye.

³⁸ Yé a syɛɛlɨ no ó, lé edira lɔɔ Da a bɛa lɛɛ é nʉm mo ngwiha mɨlɔb we Ezayi ó: «Da, zé a buʼla lɔɔ wih? Zé a bee é jɔʼ Da a lɛʼle be nkul we e?»

³⁹ Ebe no ó bé a be, abe e nkul ebuʼla ɛ, lé eduho é sa Ezayi a lɛɛ ɛ. Nye a lɛɛ ó:

⁴⁰ «Zyɛm a be ó si liŋ be ontim le elɨl be mɨleme, ó bé l'ayi ka bee e mih mɔɔ, nkʉ gʉa é kpɛhla, lé ebene ó, bé amu jaa dwibra, to nko nye ndɨ ɨ, ó nye joma be.»

⁴¹ Ezayi a lwib no ó, é jɔʼ nye a bee moncɛnba mo Lœma mulo mo Zyɛm ɨ. No ó nye a lwib-lwib é lɔb we e.

⁴² Dam be no, bʉʉ otamabʉr é kul oYʉden é buobuo, bé a be ó lé ekʉ jyɛʼ taa buʼo yɔɔ boo Yesʉs. Sa gwar, bé a baalɛɛ bʉr no. Bé a be ó lé ekpɛɛ oFarizyɛŋ, ebe, bé amu cyelɔ é pɨŋ, aka to é mompah mɨnjwɨʼla mɔɔ.

⁴³ Baanya-bʉa onɨ, bé a si sa no, ebe, bé a kpɛl-kpɛl ó, bʉr seʼla be, laa ó, Zyɛm seʼla be.

Yesʉs ó lé etiʼe mɨlɔb

⁴⁴ Yesʉs ze tuno ó: «Mʉr lé ejyɛʼ taa buʼo ye boo me e, nye ajyɛʼ ye njɨ boo me ɔɔ! Nye ejyɛʼ ye nteme ó boo mʉr a ntɨh me nwa ɔɔ!

⁴⁵ Mʉr lé ebee me e, nye ebee nteme mʉr a ntɨh me nwa ɔɔ!

⁴⁶ Me a ze kaʼ é si nwaʼ ó, me pɛnɨ bʉr myɛn, ó mʉr nyiwɛh lé ejyɛʼ taa buʼo ye boo me e, nkʉʼ duho é l'edurʉ, to é myɛn ɔɔ!»

⁴⁷ Nye ze lɛɛ ó: «ǃƗ mʉr si joʼo sikʉlʉ yam, abaʼle ye nɛʼɛ, nye e mobe. Sa gwar, ntʉʼ me ódwe nye ma, ebe, me a ze kaʼ é si nwaʼ ó, lé eze tiʼ bʉr, abe lé eze dwe bʉr o tɨʼ mobe.

⁴⁸ Mʉr nyiwɛh lé ecyɛl me, anʉa mokan mam e duu ɨ, nyiha, nye e mʉr ódwe nye mobe tɨʼ ɨ. Sikʉlʉ me mu si dwe bɨn ɨ, yé ó ngo dwe nye mobe é moho epihe, ntible-bɨkaŋa!

⁴⁹ Nye óbe ó e mobe, ebe, me a baalwib yʉʉ sɔʼɔ e me mʉr tɨ. Sɔŋ wam, mʉr a ntɨh me e, ó b'a tiile me mɨtiila dumo e sa me lé ekʉ jala le elɛɛ bɨn ɨ.

⁵⁰ Ndwe nteme, me egʉa ó, mɨtiila nye lé etiile e, myé ó ndɨ edwe bʉr tiʼ molu mo mpoʼ mɨmɛh. No ó, sa me lé elɛɛ ɛ, yé ó mpʉ Sɔŋ wam a lɛɛ me ya ɛ.»