Yʉanes 1 - Kálara Zyɛ̌m Edwán é mpʉ̌n

Mɨlɔb mɨ efoʼ

¹ É l'etɔɔrʉ, mʉr a be die «Lwib» ɨ, a bɛa ó be. Lwib bé e Zyɛm ó b'a be. Lwib a be ó Zyɛm.

² No ó Lwib bé e Zyɛm, bé a bɛa be ó é l'etɔɔrʉ.

³ Zyɛm a cye sa yiyɛh ó, é zi mo Lwib. Abe e yʉʉ sɔʼɔ yé a syɛɛ, Lwib abe.

⁴ Tiʼ, yé a be ó é Lwib. Tiʼ yaa, yé ó b'a pɛn myɛn é bʉr.

⁵ Myɛn, wé epan é l'edurʉ; edurʉ l'ákwoʼ mara we.

⁶ Zyɛm ze ntɨh mʉr, die le Yʉanes.

⁷ Nye a be ó mboʼla, lé eze boʼlo é lɔb myɛn waa. Nye a ze ó, bʉr bɨbɛh, bé jyɛʼɛ taa buʼo yɔɔ boo Zyɛm ebe lɔɔ we waa.

⁸ Ntʉʼ nye mʉr tɨʼ a be myɛn. Nye a kʉ ka ze ó njɨ lé eze boʼlo é lɔb myɛn waa.

⁹ Myɛn waa wé ome ó b'a kʉ be mpaŋ myɛn. Wé epan é si nwa, lé eze kʉn mʉr nyiwɛh.

¹⁰ Lwib a be ó é si nwa. Zyɛm a cye si waa ó, é zi we. To kœb ó, bʉr o ndɨ egumo e si nwaʼ bɛɛ, bé a baadweʼe nye.

¹¹ Nye a ze ó, é lal we. Sa gwar, jyɛɛ ye, anʉa nye.

¹² Dam be no, bʉr o b'a nʉa nye e duu, jyɛʼɔ taa buʼo yɔɔ boo nye e, bé ó nye a dwe nkul ó, bé diʼe bwan mo Zyɛm ɨ.

¹³ Bé a baabyɛl bwan mo Zyɛm é zi bɨpuno, nkʉ é gwɨma bɨpuno byɔɔ, nkʉ ebe gwɨma mo mʉrʉm. Bé a byɛl ó byɛlɨ no, ebe gwɨma mo Zyɛm.

¹⁴ Lwib a be ó si byɛl mʉr. Nye a si tiʼe paʼra ga wina. Bɨh bɨ bee moncɛnba me, moncɛnba mo Etiʼe e Mwan mo Zyɛm. Nye a duho boo Sɔŋ we ó, nye mu bɛa be lwɨŋla e ncwɨncwɨa e l'ocyecye mo Zyɛm.

¹⁵ Yʉanes a si boʼlo é lɔb we, le etuno ó: «Nye ó mʉr me a lwib e bɨn, tiibe e nye e. Me a lɛɛ bɨn ó: “Waa lé eze me pihe ó ndɨ elaa me, ebe, mɛm l'apa byɛl, nyɛɛ a bɛa ó be.”»

¹⁶ Bɨh bɨbɛh, bé a be ó si bi embɨa le, ndwe e mpwaʼ ncwɨncwɨa we ndɨ elaa ncwɨncwɨa a taare lɛʼlɔ ɛ.

¹⁷ Zyɛm a si tiile bɨna ga motie, cwɨɨ é Moyiz. No ó, ncwɨncwɨa we e l'ocyecye byɛɛ, byé a ze é bɨna ga ó, dumo e Yesʉs-Krɨst.

¹⁸ Abe e mʉr ngwar ndɨ si pa bee Zyɛm Sɔŋ. Etiʼe e Mwan e kpɛl le, lé ome, waa ndɨ nteme Zyɛm ɨ, ó b'a lɛʼle bɨna ga Zyɛm.

Mɨtuno mo Yʉanes Ndubʉr

¹⁹ OYʉden o Yerʉsalɛm, bé a be ó si lomo opara, bé e bʉr be eveh mo Levi boo Yʉanes ó, bé toʼ, to dî e nye ó: «Gwɔɔ, go zé?»

²⁰ Yʉanes a si bɨha e be é kpɛŋlɛm. Nye a baakɛla. Nye ó: «Me abe Lœma mulo mo Zyɛm.»

²¹ No ó bʉr baa, bé a bâʼle dî e nye ó: «Yé be no nɛʼɛ, gwɔɔ, go zé ɛ? Zê go ó ndɨ Élie ɛ?» Nye ó: «Hɨʼɨ, me abe Élie.» Bé ntɔʼ dî ó: «Zê go ó ngwiha mɨlɔb, waa Moyiz a bɛa tile, tiibe e nye nwa ɛ?» Nye ó: «Hɨʼɨ, me abe nye.»

²² No ó bé a ka dî e nye ó: «A gwɔɔ, go zé?... A bɨh toʼ, to lɛɛ bʉr o lomo bɨh ɨ! Yé go ndɨ elɛɛ, tiibe e mbi mʉr go?»

²³ No ó Yʉanes a ze bɨha e be ó: «Mpʉ ngwiha mɨlɔb Ezayi a tile e: “Me ó twii lé etuno é feha si, waa lé elɛɛ ó: ‘Cyelɨ ga mozi mo Da é liim ɔɔ!’”»

²⁴ Tina, yé ó, oFarizyɛŋ, bé ó b'a cen mɨlʉmlʉ myaa.

²⁵ No ó bé a ze dî e nye ó: «No, yé ó, go abe Lœma mulo mo Zyɛm, abe Élie, abe nteme ngwiha mɨlɔb waa. Yé be no nɛʼɛ, ebe yé go lé edù bʉr ɨ?»

²⁶ Yʉanes, nye e be ó: «Mɛm, me edù bɨn ó e modibe. Yé e nuu mʉr lé ecyɛb wâʼ é sama yin, waa bɨn ndɨ agʉa ɛ.

²⁷ Nye ó lé edu me é koo pihe. Me abe mbi mʉr lé ejala le etii nye mɨkol mɨ osilpah be e.»

²⁸ Sa nɨ yiyɛh, yé a syɛɛlɨ ó, ɨ Betani, é guu pɨn dibe Yʉrdɛŋ nkɔm-nkɛɛ, gumo Yʉanes a dù-dù bʉr ɨ.

Ndubo mo Yesʉs

²⁹ É mɛn tɨ, Yʉanes ka bee ó, Yesʉs lé eze boo nye! Yʉanes ze lɛɛ ó: «Mbe ga: Ma Ntœme mo Zyɛm lé edwih mɨsyem mɨ bʉr bɨbɛh nwa ɛɛ!

³⁰ Lɔb we ó me a lɛɛ-lɛɛ bɨn wi ɔɔ! Wé ó: “Nuu mʉr, nye edu me é koo pihe. Mʉr waa ó lé elaa me, ebe, mɛm l'apa byɛl, nyɛɛ a bɛa ó be.”

³¹ Mɛm mʉr tɨʼ a baataare gʉa nye. Me a ze ó, nye nkʉʼ gʉa nyin é bwa b'Ɨzraɛl tʉŋlʉ. Ebe no ó me a ze dù bʉr e modibe e.»

³² Yʉanes a boʼlo nteme ó: «Me a si bee Mbɨambɨa Sisim lé eduho é jobo kʉ, nwɨɨla e l'epɨba, ze fulo é baaa, ze di nye é nyʉl.

³³ Mɛm mʉr tɨʼ a baataare gʉa nye. No ó, Zyɛm, waa a lomo me ó, me ntaʼ, ze dù bʉr e modibe e, a tɨe me ó: “Mʉr go óbee Sisim wam fulo, ze bebre nye é nyʉl ɨ, mʉr waa ó ndɨ edù bʉr é Mbɨambɨa Sisim.”

³⁴ Mɨ bana bee no. No ó me lé eboʼlo ó: “Mʉr nwa, nye ó bana kʉ be Mwan mo Zyɛm” ɨ.»

Yesʉs lé ejebe mpʉn be efoʼ be

³⁵ É mɛn tɨ, Yʉanes a be ó si bâʼle ze gumo yaa, bé e bʉʉ ompʉn be oba.

³⁶ É jɔʼ nye a bee Yesʉs lé elaa ɛ, nye ze bâʼle lɛɛ ó: «Mbe ga: Ma Ntœme mo Zyɛm ó nwa!»

³⁷ Mpʉ ompʉn mo Yʉanes, bé a joʼo sa nye a lɛɛ ɛ, bé ntɔʼ du Yesʉs.

³⁸ Yesʉs ze dwibra. ǃNye ka dwɛʼ pihe nɛʼɛ, bee be lé edu nye. Nye ze dî e be ó: «Bɨn bé esaa yé?» Bé e nye ó: «Gumo go lé edi ɨ, Rabbi!» (No yé edwirɔ ó: «Yeʼle».)

³⁹ Yesʉs, nye e be ó: «Ntaʼ ga, bɨn bé òbee.» No ó ompʉn baa, bé a to, to bee gumo Yesʉs a di-di ɨ. Bé ntɔʼ lɛŋ moho waa, bé e boo nɔɔ. (Yé a be ó, yé mu lé eto saa mowala monâ mo bii kʉʼ.)

⁴⁰ Nuu mpʉn é sama ompʉn oba bé a joʼlo lɔɔ mo Yʉanes, le edu Yesʉs ɨ, a be ó ncyom mo Simɔn Pyɛr, die le Andreas.

⁴¹ No ó, mʉr efoʼ Andreas a taare to kœb ɨ, a be ó tʉl we Simɔn. Nye e nye ó: «Bɨh bɨ bee waa ndɨ Messie ɨ!» (No yé edwirɔ ó: «Lœma mulo mo Zyɛm».)

⁴² No ó Andreas a ze to e Simɔn gumo Yesʉs a be e. Yesʉs ze dwɛʼ Simɔn é tʉʉʉŋ. Nye e nye ó: «Go ó Simɔn, mwan mo Yʉanes. Go óka jebɔ ó, Sefas» —no yé ó Pyɛr.

⁴³ É mɛn tɨ, Yesʉs ze tiʼe é leme we ó, nye ejala le eto é lal Galɨle. Nye ze bee Filip. Nye e nye ó: «Duʼo me.»

⁴⁴ (Filip a be ó mʉr Betsɛda, mpʉ mo Andreas bé e Pyɛr.)

⁴⁵ Pie tɨ, Filip ze to bee Natanaɛl. Nye e nye ó: «Bɨh bɨ bee mʉr lɔb we ndɨ tila é motie mo Moyiz, waa ogwiha o mɨlɔb, bé a tile, tiibe e nye e! Mʉr waa, nye ó Yesʉs, mwan mo Yoseb, mʉr Nazarɛt!»

⁴⁶ Natanaɛl, nye e Filip ó: «Zê Kalara Zyɛm, nye elɛɛ ó, yʉʉ mpaŋ sɔʼɔ, yé ó e nkul eduho Nazarɛt ɛ?» Filip, nye e nye ó: «Ntaʼ, ze bee.»

⁴⁷ É jɔʼ Yesʉs a bee Natanaɛl lé eze nko nye a be e, nye ó: «Go bana kʉ be cyecye mʉr Ɨzraɛl, abe e bɨkʉʉŋʉ!»

⁴⁸ No ó Natanaɛl a ze dî e Yesʉs ó: «Gwɔɔ, go egʉa me no é wáa paʼ?» Yesʉs, nye e nye ó: «Me be ó si bɛa bee go é jɔʼ go be é bene yʉʉ lɨ figye e. É jɔʼ yaa, Filip l'apa jebe go.»

⁴⁹ Natanaɛl, nye e nye ó: «Yeʼle, go ó bana kʉ be Mwan mo Zyɛm cyecye! Go ó ndɨ njwɨɨbʉr lal Ɨzraɛl!»

⁵⁰ Yesʉs ze dî e nye ó: «Zê go lé ejyɛʼ taa buʼo yo boo me ó, ebe, me be si lɛɛ e go ó, me si bee go é bene yʉʉ lɨ figye ɛ? Go óbâʼle bee bɨsa bɨnɨnɨ, laa yinɨ!»

⁵¹ Yesʉs ze ko tɨʼ ó: «Me elɛɛ bɨn cyecye ó nɛɛ: bɨn bé óbee jobo lé ebɔa mbɨembɨe e lʉ Mwan mo Mʉr, beengles mo Zyɛm lé ebere le efulo tɨ.»