Títos 3 - Kálara Zyɛ̌m Edwán é mpʉ̌n

Dɨʼe sa mɨmpaŋ bɨsyɛɛla

¹ Jɨmɨ bʉr bɨtoŋla é mɨlɔb mi: bé filɨ monyʉl mɔɔ si é mih mo bʉr o ndɨ e nkul mojwɨ̀ʼa ɛ. Bé saʼ be mojoʼo. Mɨleme, myé diʼe be é ntɨɨɨŋ ó, bé sa ó be bɨsyɛɛla bɨ ncwɨncwɨa mɨmbi mimyɛh.

² Bé beʼ l'afœʼ nuu mʉr. Bé l'ayi sa bɨtom. Bé diʼe é tala njwɨr. Bé tala njwɨr e bʉr bɨbɛh.

³ Ebe, bɨna bé a taare be ga nteme ó no: bɨgʉ, baajoʼo-motɨɨ, si gʉmla é bebebebe zi. Bɨna bé a di-di ga ó, molʉa mo Syem, lé edu bɨgwɨma mɨmbi mɨmbi. Bɨna bé a tiʼe-tiʼe ga ó, lé enwim bʉr. Bɛɛ nteme lé enwim bɨna. Bɨna bé a be ó lé esiila ga nteme paʼra ga wina.

⁴ É jɔʼ yaa ó Zyɛm, Tiʼbʉr ga wina a ka lɛʼle bɨna ncwɨncwɨa we e.

^5-6 Nye a dwe bɨna ga tiʼ molu mo mpoʼ mɨmɛh ó, é zi njwɨʼa-nkoo we. Nye a baadwe bɨna ga nkɔb tiʼ yaa é lɔb mɨmpaŋ bɨsyɛɛla bɨna bé a dɨ sa é l'ocɨcyel ga wina ɛ. Yé a be ó, ebe puba nye a pubo bɨna ga cwɨɨ é Sisim we e. Wé ó b'a sa ó, bɨna byɛlɨ ga mbyɛla edwan, le esa ó, bɨna beʼ modwan mo bʉr. Nye a si ntɨh bɨna Sisim we é ntuʼ-ntu-ntuʼ, dumo e Tiʼbʉr ga wina Yesʉs-Krɨst.

⁷ Nye a dwe bɨna tiʼ molu mo mpoʼ mɨmɛh ó, bɨna pʉʼa ga é nkar, sɔba é feerɨ ebe ncwɨncwɨa we. Bɨna ga mu ó baa nye a kɛʼ tiʼ molu mo mpoʼ mɨmɛh ɛ. Nkɛʼ waa ó lé esa ó, mɨleme ga mina, myé loŋla e mbɛla.

⁸ Lɔɔ nɨ, wé ó lɔɔ ebuʼla. Me ekpɛl ó, go boʼla e bʉr ó, wé ó tɨʼ cyecye. Yé ó ngo sa ó, bʉr o b'a jyɛʼ taa buʼo yɔɔ boo Zyɛm ɨ, bé dɨʼe sa mɨmpaŋ bɨsyɛɛla ɛ. Bɨsyɛɛla byaa, byé e nyɔm é nko paʼ bʉr bɨbɛh.

⁹ Cɛra e bʉr o ndɨ epere motwii mpʉ bɨgʉ, le edî motia ndɨ abe e nyɔm ɨ. Bé ajala le epu mɨlɔb si é lɔb bɨláa-ntan nkʉ é lɔb motie mo Zyɛm, ebe, mɨlɔb mɨnɨ, myé ó mbɛh e mbɛh.

¹⁰ ǃƗ mʉr si gba nyʉl lé esa mpɔʼa monkɔm nɛʼɛ, go à bal nye é jɔʼ efoʼ ndwe é jɔʼ mba. Pie tɨ, tiʼa nduula e nyiha!

¹¹ Go ejala le egʉa ó, mbi mʉr waa, wé ekœʼ ebò e cyen ozyɛhozyɛh. Nyi sa syem. Lwib ye, yé mʉr tɨʼ ó ndɨ edwe nye mobe.

Motɨɨ mo epihe ndwe e moswɨhlɨ

¹² Me ólomlo go Artemas, nkʉ Tisikos. Jɨh tɨʼ nuu mʉr ngwar tɨʼ ópyal go ye, saŋa zi eze kœb me é nkana Nikopolis, ebe, mɨ tiʼe é leme wam ó, me lɛŋ kolo ó tɨ.

¹³ Saŋa zi egul Zenas, mʉr nkɔm ga wina, bé e Apolos, bé toʼ é cyen yɔɔ. Saʼ ó, bé l'ayi luʼo ba e yʉʉ sɔʼɔ e yʉʉ temezi.

¹⁴ Yé ejala ó, bʉr o ndɨ paʼra ga wina ɛ, bé jwɨʼɨ lé esa mɨmpaŋ bɨsyɛɛla. Ebe no ó bɨn bé ógʉa egul baanteʼenteʼe, é mbi ndɨ ó bɨn beʼ l'aka baʼ mobo e.

¹⁵ Sama yam yiyɛh, yé esoho go. Soha ofo ga bɨna, baa ndɨ é bul kpɛl bɨh é zyɛŋa ga wina ɛ. Mocyɛʼ mo mpom mo Zyɛm, mé swɨŋɨ é bɨn bɨbɛh.