Títos 2 - Kálara Zyɛ̌m Edwán é mpʉ̌n

Motɨɨ é l'efu le obuʼla

¹ Gwɔɔ, dɨʼe dwe bʉr sikʉlʉ é sa yiyɛh lé ejala e mpaŋ sikʉlʉ bɨna lé ejwɨʼ ga ɛ.

² Lɛŋɨ otamabʉr o Mbɛr-Zyɛm ó, bé ajala le efwaʼ monwoʼ. Bé diʼe e modile, lé ekœʼ ebò e cyen é mpaŋ pɨʼ. Bé beʼ baa lé ejyɛʼ taa buʼo yɔɔ boo Zyɛm, du mpʉ mpaŋ sikʉlʉ bɨna lé ejwɨʼ ga ɛ, ndɨ ɨ. Bé diʼe bʉr o ndɨ ecwɨa e bʉʉ bʉr ɨ, e baa ndɨ é bihbe e.

³ Lɛŋɨ mɨsile mɨ bʉba jwɨʼ gwar ó, bé kœʼœ mbi ebò e cyen ndɨ ejala e mʉr lé edwaabe Zyɛm ɨ. Bé l'ayi fœʼ bʉʉ bʉr. Bé l'ayi bɛble monwoʼ, nkʉ di molʉa mo tɨ. Bé dweʼ bʉr mɨmpaŋ motɨɨ.

⁴ No ó bé ólɛʼle mosehe mo bʉba mpʉ mé kpɛlɨ ojʉm bɔɔ, ndwe e bwan bɔɔ ɛ.

⁵ Mé gʉa pahle mɨlɔb. Mé diʼe é pememe. Mé sea é mɨmbɛr myɔɔ, lé ecwɨa e bʉr. Mé saʼ ojʉm bɔɔ mojoʼo. Ebe no ó bʉr, bé óbe, l'afœʼ lɔɔ Zyɛm ɨ.

⁶ Tɨa mɨsoho ó, myé gʉŋa nteme lé ekœʼ ebò e cyen é mpaŋ pɨʼ.

⁷ Kœʼœ ebò e cyen empa, lé esa mɨmpaŋ bɨsyɛɛla é buobuo. Sikʉlʉ yo, yé beʼ l'abe mbaʼra e bɨkʉʉŋʉ, ó bʉr beŋɨ go nteme e modile.

⁸ Lwib yo, yé duʼo mpaŋ sikʉlʉ bɨna lé ejwɨʼ ga ɛ. Ebe no ó bʉr bé óbe, akœb sa elɛɛ é l'ebebe, tiibe e lwib yo e. Bʉr o dɔm onɨ, bé óka joʼo fwon nteme, bé l'abe e sa ebebe bé ólɛɛ, tiibe e bɨna ga.

⁹ Molʉa, mé ejala le esa omasa bɔɔ mojoʼo é jɔʼ yiyɛh. Mé saŋa mozi ó, omasa bɔɔ, bé gʉa kpɛl bɨsyɛɛla byɔɔ. Mé l'ayi do e be.

¹⁰ Bé ajala le ejaa mobo é nko paʼ mobi mo omasa bɔɔ. Bé ejala le elɛʼle be ó, bé ó e nkul ebuʼla be ntinɨ e ntinɨ. Ebe no ó bé ósa ó, bʉr dwaaba sikʉlʉ bɨna lé edwe be, tiibe e Zyɛm, Tiʼbʉr ga wina ɛ.

Bʉr o ndɨ baa mo Yesʉs-Krɨst ɨ

¹¹ Zyɛm, nyi lɛʼle ncwɨncwɨa we é pono. Nye mu ó lé edwe bʉr bɨbɛh tiʼ molu mo mpoʼ mɨmɛh é zi ncwɨncwɨa we.

¹² Ncwɨncwɨa waa ó ndɨ edib bɨna ga zi egwɨma ebɨh é nko paʼ mo Zyɛm ndwe le ebene bɨgwɨma bɨ nyʉl bɨpuno, é l'efu le ekœʼ ebò e cyen lé ódwe bʉr mɨmpaŋ mɨpɛhla ɛ. Ebò e cyen laa, lé ó cɨcyel, le yaa ndɨ edu mpʉ Zyɛm lé ekpɛl ɨ, dam be é mbi jɔʼ yi.

¹³ Bɨna bé ódi ga no ó, lé ebono mʉr lé egba bɨna mbɛla é mɨleme, waa lé esʉ bɨna mocyɛʼ mo mpom ɨ. Nye ó Zyɛm nɨnɨ ga wina, Tiʼbʉr ga wina Yesʉs-Krɨst, waa óbâʼle lɛʼle bɨna ga moncɛnba me e.

¹⁴ Nye a si jala e bɨna ga, lé eze kʉr bɨna ga, le edwih bɨna ga é bɨbla ebò e cyen bɨna bé a dɨ kœʼ œ. Nyi pubo bɨna ga ó, bɨna diʼe kul bʉr ndɨ yaa ye e. Mɨleme, myé óbe ó bɨna ga é ntɨɨɨŋ ó, bɨna gba ga ó nyʉl lé esa mɨmpaŋ bɨsyɛɛla.

¹⁵ No ó go lé ejala le elwib e bʉr, le etɨe be e. Dweʼ bʉr mobe e nkul mojwɨ̀ʼa go ndɨ e nye e. Mʉr beʼ l'apyeh go.