Títos 1 - Kálara Zyɛ̌m Edwán é mpʉ̌n

Moswɨhlɨ

¹ Mɛm Pol, syɛl mosa mo Zyɛm, ndwe e lʉmlʉ mo Yesʉs-Krɨst ó lé etile go kalara nwa. Me esea syɛɛ yaa é l'efu e bʉr o Zyɛm a pɛh ɛ, ó me gbaʼ be nkul é monyʉl, ó bé jyɛʼɛ taa buʼo yɔɔ boo Zyɛm. Me elɛʼle be ocyecye ndɨ esa ó, mʉr dwaaba Zyɛm ɨ.

² É mbi waa ó bé ódi e mbɛla ó, bé óbi tiʼ molu mo mpoʼ mɨmɛh, yaa yé a bɛa kɛʼɔ be, kʉ e si l'apa cyeŋɔ ɛ. Zyɛm ó b'a kɛʼ be tiʼ yaa, nyɛɛ waa ndɨ abe lé elɛɛ mpʉl ɨ.

³ Nye a ka lomlo mpaŋla tiʼ molu mo mpoʼ mɨmɛh waa ó, é jɔʼ nye a jala le egʉŋɔ é kpɛhla ɛ. Zyɛm, Tiʼbʉr ga wina, a gwih bʉr lɔɔ we ó, cwɨɨ é zi wam. Nye a ntɨh me wa ó, me baʼla we.

⁴ Me etile ó, gwɔɔ Tit, ndɨ me mwan é nko paʼ buʼo yina ɛ. Mocyɛʼ mo mpom le motala mo Zyɛm Sɔŋ bé e Yesʉs-Krɨst, Tiʼbʉr ga wina, mé swɨŋɨ é go.

Ecyel e bʉr é bɨdia é mɨmbɛr mɨ Zyɛm tʉŋlʉ

⁵ Me a liʼe go tina Krɛt ó, go nkʉʼ fwahle syɛɛ yé a buʼo gʉʼ ɨ. Syɛɛ yaa, yé a be ó, go pɛhɛ ocyɛb be efoʼ é mɨmbɛr mɨ Zyɛm, lé ecyel-cyel be é bɨnkana bibyɛh, lé esa mpʉ me a lomo go e.

⁶ Go ópɛh cyɛb efoʼ é mbɛr Zyɛm ó, mʉr ndɨ adweŋɔ mobe e. Nye diʼe njɨ e mʉma ngwar. Bwan be, bé diʼe bʉr o ndɨ ejyɛʼ taa buʼo yɔɔ boo Yesʉs ɨ. Bé ajala le ejwɨ̂ʼlɨ e bɨsyɛɛla bɨ ebebe. Yé ambɨa ó, bʉr toora be, ebe, bé é lele mɨlʉ, nkʉ ó, bé ekaŋa e l'osɔŋ bɔɔ.

⁷ Yé ejala ó, mʉr lé edi é dia mbɔʼlʉ é mbɛr Zyɛm we e, nye diʼe waa ndɨ adweŋɔ mobe e, ebe, mbɔʼlʉ é mbɛr Zyɛm, nye ambɨa, be mʉr pyeh, nkʉ kpɔɔ, nkʉ fufwɔʼ monwoʼ, nkʉ mʉr ndɨ é feha ɛ, nkʉ waa lé esaa bɨsa é mozi ndɨ ozyɛhozyɛh ɛ.

⁸ Yé ejala ó, nye beʼ mʉr lé egʉa bɨlan e l'ojyoo e. Leme we, wé duʼo njɨ embɨa. Nye kœʼœ ebò e cyen é mpaŋ pɨʼ. Nye diʼe cɨcyel, e leme é sɔɔɔ é mih mo Zyɛm. Nye gʉŋa emɛr leme.

⁹ Yé ejala ó, nye mɛrɨ sikʉlʉ bé a taare dwe nye e, é kpɨɨɨa. Lɔɔ waa, wé ó lɔɔ ebuʼla. No ó nye óbe e nkul egʉa dwe bʉʉ bʉr mpaŋ sikʉlʉ bɨna lé ejwɨʼ ga ɛ. Bʉr o ndɨ etɨ mɨlɛa ga mina ɛ, nye óbula dwe be mobe.

¹⁰ Bɨn ye, yé é buobuo bʉr o ndɨ epyeh Zyɛm ɨ. Bé é bul bwaʼ ó, njɨ mɨlɔɔ, bé nteme baanya-bɨkʉʉŋʉ. Bʉr baa, bé é kʉ bul buo ó, é nkɔm bʉr o ndɨ egwɨm yɨm bʉʉ bʉr ó, bé saʼ mpʉn ɨ.

¹¹ Yé ekʉ jala ó, go dibla be mɨnʉm. Bé egomlo mɨmbɛr mɨ bʉr é bebebebe zi, ndwe le eyeʼle sa ndɨ ajala ɛ. Bé esa no ó, é l'efu ó, bé biʼe myɛna ndɨ ambɨa ɛ, é zi sikʉlʉ yaa. Yé é bul sa yɛɛ fwon lé ebi myɛna no!

¹² Nuu mʉr e sama yɔɔ, waa bé lé ekʉ nʉa mpʉ ngwiha mɨlɔb ɨ, a lɛɛ ó: «Bʉr o Krɛt, bé ó mɨmpʉmpʉl é jɔʼ yiyɛh. Bé é bebe ó mpʉ otir o montiʼ. Bɨ jyɛnba lé encyehbe. Bé ó baancyadoʼ!»

¹³ Mboʼla waa, wé ó kʉ be cyecye! No nteme ó me ndɨ elɛɛ e go ó, dweʼ be mobe. Bé óbɛm baʼle mpaŋ sikʉlʉ bɨna lé ejwɨʼ ga é lɔb buʼo ga yina ɛ.

¹⁴ Bé gwaʼa lé ejoʼlo bɨsa mɨlɔɔ mɨ oYʉden. Bé kaʼ gwaʼ lé edu motie le mompene, maa ndɨ eduho é bʉr o b'a bɛa bene ocyecye e.

¹⁵ Sa yiyɛh, yé mu ó mpuban é l'efu e bʉr mu si pubɔ ɛ. Sa gwar, é bʉr o b'a lœʼ monyʉl mɔɔ, baa dina l'apa jyɛʼ taa buʼo yɔɔ boo Zyɛm ɨ, yé abe e sa gwar ndɨ mpuban é nko paʼ wɔɔ. Bɨsa bibyɛh, byé ó be é lwaʼbe lwaʼbe, ebe, bé a si lœʼ ocyoo wɔɔ, ndwe e mɨpɛhla myɔɔ.

¹⁶ Bé ekʉ boʼlo ó, bé egʉa Zyɛm. Sa gwar, bɨsyɛɛla byɔɔ, byɛɛ yɛɛ lé ekʉ lɛʼle ó, bé dina ó lé ekʉ lɛʼle ó, bé agʉa nye. Bʉr baa, bé é lwaʼbe. Bé ó baajoʼo-motɨɨ. É bɨsyɛɛla bɨ ncwɨncwɨa bibyɛh mʉr ndɨ bɛm sa ɛ, abe e syɛɛla gwar bé ndɨ e nkul ekoʼo e.