Rôm 5 - Kálara Zyɛ̌m Edwán é mpʉ̌n

Bɨna ga e boo Zyɛm mu ó twii

¹ Zyɛm mu ó si dwe bɨna ga mokebe ebe taa buʼo bɨna lé ejyɛʼ boo Krɨst ɨ. Ebe no ó bɨna ga e boo Zyɛm mu mbɨmbɨa, dumo e Tî ga wina Yesʉs-Krɨst ɨ.

² Yesʉs-Krɨst ó b'a kar zi é l'efu ó, Zyɛm nkʉʼ lɛʼle bɨna ga ncwɨncwɨa we. Bɨna mu ó lé ebi ga ncwɨncwɨa waa ó, é zi buʼo ga yina, lé ekʉ mɨɨla e mbɛla mu lé eloŋlo mɨleme ga mina ɛ. Bɨna bé ga e mbɛla é mɨleme ó, bɨna bé ópyal ga é dia kum mo Zyɛm.

³ Dam be mɨtuu e mɨndɛl bɨna lé ebɔma ga e mye e, bɨna bé ekʉ bana mɨɨla ga e mye, ebe, bɨna bé egʉa ga ó, baa lé edihbe mɨtuu ɨ, bé ójwɨʼ bihbe tɨ.

⁴ É jɔʼ bɨna bé óbe si di ga e bihbe waa ɛ, bɨna bé ócyɛb ga é nkʉʼʉ é mobʉbla. ǃBɨna si cyɛb ga é mobʉbla nɛʼɛ, mbɛla, wé óloŋlo mɨleme ga mina é tur.

⁵ ǃƗ mbɛla si loŋlo mʉr é leme nɛʼɛ, mʉr waa, nye aŋa ka bil fwon, ebe, Zyɛm, nyi lɛʼle bɨna ga mpʉ nye lé ekpɛl bɨna ga ɛ. Nye a lɛʼle bɨna ga no ó, é zi Mbɨambɨa Sisim, waa nye a ntɨh bɨna ga ɛ.

⁶ Molu pihe, é jɔʼ bɨna bé a baapa bi nkul ɨ, Krɨst a ka ze jala e mobyaʼ ga mɨna, bɨna bʉr o b'a baadwiibɨ Zyɛm ɨ. Nye a dwè ó, é mpaŋ jɔʼ Zyɛm a bɛa pɛh ɛ.

⁷ Bɨna bé egʉa ga ó, yé é bul kɔbla ó, nuu mʉr mɛʼla ó, nye jala e mʉr fih, mʉr waa dam be cɨcyel mʉr. Dam be no, nuu mʉr óbɛm tiʼe é leme we ó, nye ka ó fuo jala yɛɛ e mʉr ndɨ é mbɨa ɛ.

⁸ Yesʉs-Krɨst nyɛɛ a dwè, jala e bɨna ga ó, é jɔʼ bɨna bé a be ga lé ekʉ sa njɨ mɨsyem ɨ! No ó Zyɛm ndɨ elɛʼle bɨna ga kpɛl ye e.

⁹ Yesʉs pa taare pyɛl motié me, ntɔʼ dwè é l'efu ó, nye dweʼ bɨna ga, osyɛl be ebebe, mokebe, a dwɛʼra e sa nye ósa bɨna ga ɛ! Nye ókʉ baʼle bɨtiʼ ga bina é jɔʼ Zyɛm ókpaa empime e bʉʉ bʉr ɨ.

¹⁰ É jɔʼ bɨna bé a be ga bʉr o dɔm mo Zyɛm ɨ, Mwan mo Zyɛm a si dwè é l'efu ga lɨna, lé esa sàa paʼra ga wina boo Zyɛm. Krɨst pa taare cwɨa e bʉr o dɔm be, a dwɛʼra e bɨna ga, bʉr o sàa waa! Zyɛm ókʉ baʼle bɨna ga bɨtiʼ ó, é zi nkul ndɨ é tiʼ mo Mwan we e.

¹¹ Yé abe njɨ no, yé ome: bɨna mu lé emɨɨla ga nteme ó, dumo e Tî ga wina Yesʉs-Krɨst, é zyɛŋa ga wina boo Zyɛm. Nye ó b'a sa sàa paʼra ga wina boo Zyɛm é jɔʼ yi.

¹² Ebe no ó syem, wé a duho é mʉr ngwar, ze jʉŋla é si nwaʼ ɛ. Syem waa, wé ó b'a daʼre efie é bʉr, lé emɛr bʉr bɨbɛh, ebe, bʉr bɨbɛh, bé a be ó si sa syem.

¹³ Zyɛm l'apa tiile bʉr motie, bé a be yɛɛ ó, lé esa mɨsyem. Sa gwar, Zyɛm a taare be ó, aláa ó, yé ó e mɨsyem é jɔʼ motie ndɨ, apa be e.

¹⁴ Dam be no, taare é Adam, to pyal é Moyiz, Efie, lé a be ó lé ejwɨʼ mʉr nyiwɛh. Yé cyecye ó, bʉr bɨbɛh bé a baasa syem mpʉ mo Adam, mʉr a taare ntaa etie mo Zyɛm ɨ. Adam, nye ó dweʼle, sa lé elɛʼle mʉr Zyɛm a tiʼe é leme we ó, nye óntɨh bɨna ga ɛ.

¹⁵ Sa gwar, ntaŋa etie mo Adam nɨ, wé abe mpʉ ndwɛa Zyɛm lé edwe bʉr edwɛna ɛ. Ntaŋa motie mo mʉr ngwar, wé a be ó si sa ó, bʉr dwèʼ é buobuo. To kœb ó, syɛɛla ncwɨncwɨa mo nuu mʉr ngwar, yé ó b'a bul dime sɔʼɔ. Ncwɨncwɨa mo Zyɛm ndwe e pɛʼa bɨbaa bɨ ebebe, bi pyal é bʉr, laa naa, lé ecwɨɨ e nuu mʉr ngwar, Yesʉs-Krɨst.

¹⁶ Mofuʼla mo ndwɛa mo Zyɛm, mé abe mpʉ mofuʼla mo syem mʉr gwar a sa ɛ. Yé cyecye ó, Zyɛm a be ó si dwe bɨna ga e boo nɔɔ mobe. Sa gwar, ndwɛa mo Zyɛm, wé a ntɨhɔ bɨna ga ó, pie ntaŋa motie é buobuo. Zyɛm ze sa ó, bɨna pʉʼa ga é nkar, sɔba é feerɨ.

¹⁷ No, yé ó, é jɔʼ mʉr ngwar nɨ a ntaa etie mo Zyɛm ɨ, Efie, lé a be ó si taare lé ejwɨʼ bʉr bɨbɛh é lɔb mʉr ngwar waa. Sa gwar, Zyɛm, nyi bul lɛʼle bʉr ncwɨncwɨa, laa naa. Bɨna mu ó si bi ga mokebe é mih me, ajɛna sɔʼɔ, le ebi nteme tiʼ molu mo mpoʼ mɨmɛh. Bɨna mu ó lé ecyɛb ga é nkʉʼʉ, apɨŋla é tiʼ yaa, dumo e mʉr ngwar, Yesʉs-Krɨst.

¹⁸ Jwɨʼ gwar e gwar mpʉ bʉr bɨbɛh, bé a dweŋɔ mobe, duho é mʉr ngwar a ntaa etie e, no nteme ó, mpaŋ syɛɛla mʉr ngwar a sa ɛ, yé ópɛʼ bʉr bɨbɛh é nkar ɨ. Bé ósɔba é feerɨ, ze bi tiʼ molu mo mpoʼ mɨmɛh.

¹⁹ Jwɨʼ gwar e gwar mpʉ mʉr ngwar a sa Zyɛm ebɨh, Zyɛm nyɛɛ ntɔʼ láa ó, bʉr é buobuo, bé mu ó osyɛl o mɨsyem ɨ, jwɨʼ gwar yaa nteme ó, é jɔʼ mʉr ngwar a sa Zyɛm mojoʼo e, Zyɛm a be ó si láa ó, buobuo bʉr, bé mu ó ocɨcyel o bʉr ɨ.

²⁰ Zyɛm a tiile bʉr motie é l'efu ó, bʉr ntaŋa motie é buobuo. Dam be no, é jɔʼ mɨsyem mɨ bʉr, myé a dɨ buo no e, é jɔʼ gwar e gwar yaa nteme ó Zyɛm a bul lɛʼle be ncwɨncwɨa we, laa naa ɛ.

²¹ Jwɨʼ gwar e gwar mpʉ Syem, wé a jwɨ̀ʼ bʉr, ntɔʼ jʉ be e, jwɨʼ gwar e gwar yaa nteme ó Ncwɨncwɨa mo Zyɛm mu lé ejwɨʼ bɨna ga ɛ. Nye edwe bɨna ga mokebe é mih me ó, nye nkʉʼ dwe bɨna ga tiʼ molu mo mpoʼ mɨmɛh dumo e Tî ga wina Yesʉs-Krɨst.