Rôm 4 - Kálara Zyɛ̌m Edwán é mpʉ̌n

Dweʼle mo Abraham

¹ É paʼ mobyɛl ga mɨna, bɨna ga bé ó e sɔŋ mpam, Abraham. É mpʉ yé ndɨ no e, bɨna kaʼ lɛɛ ga é yé, tiibe e sa nye a bi ɨ?

² Nkʉ Abraham a be ó be, bi mokebe é mih mo Zyɛm ebe mɨmpaŋ bɨsyɛɛla bye nɛʼɛ, mpa nye a si bi sa edoʼo e tɨ. Sa gwar, nye a baangbaa doʼo e bye é mih mo Zyɛm,

³ ebe, yé ó tila é Kalara Zyɛm ó: «Abraham a si jyɛʼ taa buʼo ye boo Zyɛm. Zyɛm ze bee buʼo ye mbɨmbɨa, nye ntɔʼ nʉa nye mpʉ cɨcyel mʉr.»

⁴ Bɨna bé egʉa ga ó, ǃɨ syɛl mosa si sea syɛɛ nɛʼɛ, sa masa we ódwe nye pie syɛɛ yaa ɛ, yé ó nye myɛna. Nye anʉa myɛna mo syɛl mosa we mpʉ mɨndwɛa nye a bi ebe edwɛna mo masa we e.

⁵ To kœb ó, mʉr ngwar é sama bʉr o ndɨ asa mɨmpaŋ bɨsyɛɛla ɛ, nye óbɛm jyɛʼ taa buʼo ye boo Zyɛm, ebe, nye ó waa ndɨ edwe bʉr o ndɨ adwaabe nye e, mokebe e. Zyɛm óbee mpʉ nye ndɨ ejyɛʼ taa buʼo ye boo nye e, ntɔʼ nʉa buʼo ye mpʉ bɨsyɛɛla bɨ ocɨcyel.

⁶ Jwɨʼ gwar e gwar yaa nteme ó David a lɛɛ ɛ. Nye esʉ mocyɛʼ mo mpom é mʉr a dweŋɔ mokebe é mih mo Zyɛm, waa a baasa mɨmpaŋ bɨsyɛɛla ɛ.

⁷ David a tile ó: «Ontɔɔ o motie Zyɛm a pɛʼ bɨbaa bɨ ebebe byɔɔ ɛ, bé e mocyɛʼ mo mpom. Bé ó baa Zyɛm a fol mɨsyem myɔɔ ɛ.

⁸ Mocyɛʼ mo mpom, mé ó e mʉr Da óbe, aláa bɨbaa bɨ ebebe nye a niʼe é lɔb mɨsyem mye e, ebe, byé óbe ó si pɛʼɔ.»

⁹ Zê mocyɛʼ mo mpom me maa, mé ó njɨ é l'efu e bʉr o b'a taare saŋɔ mpʉn ɨ? Hɨʼɨ, bʉr o b'a baasaŋɔ mpʉn ɨ, bé ósʉŋɔ nteme mocyɛʼ mo mpom, ebe, bɨh si kʉ lwanbe lɛɛ wâʼ ó, Abraham a si jyɛʼ taa buʼo ye boo Zyɛm. Zyɛm ze bee buʼo ye mbɨmbɨa, nye ntɔʼ nʉa Abraham mpʉ cɨcyel mʉr.

¹⁰ É yáa jɔʼ Zyɛm a bee buʼo mo Abraham, ntɔʼ nʉa nye mpʉ cɨcyel mʉr ɨ? Zê yé a be ó jɔʼ nye a be si sil saŋɔ mpʉn ɨ? Zê yé a be ó jɔʼ nye a baapa saŋɔ mpʉn ɨ? Yé a be ó jɔʼ nye a baapa saŋɔ mpʉn ɨ!

¹¹ Sɛa mpʉn, wé a cyelɔ é nko paʼ mo Abraham ó, mpʉ dweʼle. Wé a be ó dweʼle, sa lé elɛʼle ó, nye a be ó si bi mokebe ebe taa buʼo nye a jyɛʼ boo Zyɛm ɨ, nye l'apa saŋɔ mpʉn. Zyɛm a dwe nye mokebe no ó, nye nkʉʼ be sɔŋ é l'efu e bʉr bɨbɛh ndɨ ejyɛʼ taa buʼo yɔɔ boo nye, baa l'apa saŋɔ mpʉn ɨ. Nye enʉa be e boo nɔɔ mpʉ ocɨcyel o bʉr.

¹² Nye nteme óbe ó sɔŋ é l'efu e bʉr o ndɨ ejyɛʼ taa buʼo yɔɔ boo Zyɛm é jɔʼ bé ndɨ si saŋɔ mpʉn ɨ. Bé abe lé esaŋɔ mpʉn nye ome. Bé ó baa ndɨ esaŋɔ mpʉn ndwe le ekœʼ ebò e cyen mo Abraham, laa nye a kœʼ, nye l'apa saŋɔ mpʉn ɨ.

Bʉr o ndɨ ejyɛʼ taa buʼo yɔɔ boo Zyɛm ɨ, Zyɛm, nye edira nkɛʼ we é l'efu lɔɔ

¹³ Zyɛm a kɛʼ Abraham bé e l'onta be ó, nye ódwe be si nwaʼ nyiwɛh, jala e nkɔb wɔɔ. Nye a baalɛɛ no ebe mbi Abraham a du motie me e. Nye a liʼe be e boo nɔɔ e nkɛʼ waa ó, ebe mokebe nye a láa ó, Abraham mu e me, maa nye a bi ebe taa buʼo nye a jyɛʼ boo Zyɛm ɨ.

¹⁴ Nkʉ bʉr, bé be ó be, be e nkul ebi si tiila, jala e nkɔb wɔɔ ebe mbi bé lé edu motie nɛʼɛ, mpa buʼo ga yina, yé abe e nyɔm é guu paʼ. Mpa nkɛʼ Zyɛm a liʼe bɨna ga e wa ɛ, nyi dwè ntuʼ.

¹⁵ É jɔʼ Zyɛm lé etiile bʉr motie e, bé entaa motie maa, Zyɛm, nye ntɔʼ kpaa empime. Nkʉ motie, mé a be ó be, abe nɛʼɛ, mpa ntaŋa motie nteme, wé abe.

¹⁶ Ebe no ó Zyɛm a dwe Abraham bé e l'onta be, tiʼ molu mo mpoʼ mɨmɛh ebe taa buʼo bé a jyɛʼ boo nye e. Tiʼ molu mo mpoʼ mɨmɛh Zyɛm a kɛʼ bɨna ga ɛ, yé ó sa lé elɛʼle ncwɨncwɨa we e. Nkɛʼ waa, wé ó sa ebuʼlɔ é paʼ bʉr o mpoŋbʉr mo Abraham bɨbɛh. Yé a baadwɛʼ njɨ mʉr a du motie e. Yé a dwɛʼ nteme ó, mʉr a be e buʼo gwar mo Abraham ɨ. Yé ó, ebe, Abraham, nye ó sɔŋ ga wina, bɨna ga bɨbɛh.

¹⁷ Yé ó mpʉ yé ndɨ tila é Kalara Zyɛm ɨ. Yé ó tila ó: «Me ósa ó, go diʼe sɔŋ buobuo bɨkul.» Nye ó kʉ be sɔŋ ga wina, ebe, nye a be ó si jyɛʼ taa buʼo ye boo Zyɛm, waa lé epɛ̀h bʉr é mofoo e. Zyɛm ó ndɨ esa ó, sa yé a baataare be e, yé beʼ.

¹⁸ Sa Abraham a baajala le ebuʼla ó, yé e nkul epyal ɨ, nye a si buʼla sa gwar e gwar yaa e mbɛla wé a be nye é leme e. Nye ntɔʼ fuʼla sɔŋ buobuo bɨkul. Zyɛm a kɛʼ nye ó: «Mpoŋbʉr go óbuo, jala e baatwitwɛn.»

¹⁹ Abraham ze buʼla nkɛʼ waa. Buʼo ye yaa, yé a baacyɛʼ, dam be mɨmbu nter (100) mye. Nye a be ó si pahle tiʼ ye, bee ó, nye a be ó, nye mu kunokuno le edwè, le ebee nteme ó, Sara a be ó kun.

²⁰ Nye a baagwaʼ ejyɛʼ taa buʼo ye boo Zyɛm. Buʼo ye, yé ó b'a lɨl nye. Nye ze dwiibɨ Zyɛm ebe nkɛʼ waa.

²¹ Nye a kʉ gʉa ó, Zyɛm a be ó e nkul edwe nye sa nye a kɛʼ nye e.

²² No yé a tilɔ ó: «Zyɛm ze bee buʼo ye mbɨmbɨa, nye ntɔʼ nʉa nye mpʉ cɨcyel mʉr.»

²³ Mokan maa, «nye ntɔʼ nʉa nye mpʉ cɨcyel mʉr», mé a baatilɔ njɨ é l'efu le, nye ome.

²⁴ Mé a tilɔ nteme ó, é l'efu ga lɨna, bʉr o b'a jyɛʼ ga taa buʼo yina boo Zyɛm ɨ. Zyɛm, mʉr a pɛ̀h Tî ga wina Yesʉs é foo e, ónʉa bɨna ga ó, mpʉ ocɨcyel o bʉr.

²⁵ Nye waa bʉr, bé a kɛha ɛ. Nye ze jala e motie bɨna bé a ntaa ga ɛ. Pie tɨ, Zyɛm ze pɛ̀h nye é foo ó, bɨna biʼe ga mokebe é nye pɛʼɛ bɨna ga é nkar, ó bɨna sɔba ga é feerɨ.