Rôm 3 - Kálara Zyɛ̌m Edwán é mpʉ̌n

Mɨtiʼa mo Zyɛm, myé ó njɨ é l'ocɨcyel

¹ Yé be no nɛʼɛ, wáa nyɔm mʉr ndɨ e we é jɔʼ nye ndɨ mbyɛla Yʉden ɨ? Esaŋɔ mpʉn nteme lé e wáa nyɔm?

² Yé e nyɔm é mozi mɨmɛh! Gumo nyɔm we ndɨ enyin ɨ, yé ó, Zyɛm a taare timle mɨngwiha mɨlɔb mye ó, bɨh oYʉden, ó bɨh baʼla mye.

³ No ó, bɨna bé ólɛɛ ga é yé, tiibe e bʉr o b'a baajyɛʼ taa buʼo yɔɔ boo Zyɛm ɨ? Zê elele e mɨleme lɔɔ, lé ó e nkul ekamle Zyɛm lé edira monkɛʼ me ɛ?

⁴ Hɨʼɨ, yé abe ba no. Dam be ó, bʉr bɨbɛh, bé ó mɨmpʉmpʉl, Zyɛm nyɛɛ, nye ekʉ ka lɛɛ ó njɨ ocyecye: «É l'efu ó, go nkʉʼ dweŋɔ mokebe é jɔʼ bʉr lé ejoʼo mokan mo e. ǃBé si jwɨʼla saa epur go é mpah mɨlɔb nɛʼɛ, gwɔɔ, go óbi mokebe.»

⁵ Nuu mʉr óbɛm lɛɛ ó: «Bɨsyɛɛla bɨ ozyɛhozyɛh ga bɨna, byé egul Zyɛm ó, nye lɛʼla bʉr mpʉ nye ndɨ cɨcyel ɨ.» Bɨna bé óka lɛɛ ga é yé? Bɨna bé óbɛm yɨm nkpaa lé eko tɨʼ ó: «Zê Zyɛm, nye akœʼ é l'ozyɛhozyɛh é jɔʼ nye lé ekpaa empime e bɨna ga ɛ?» (Gumo me lé elwib nɨ, me elwib ó, é mpʉ mɨzɨze mɨ bʉr lé elwib ɨ!)

⁶ Hɨʼɨ, yé abe ba no, ebe, nkʉ Zyɛm be ó be, l'abe e nkam lé edwe bɨna ga mobe ebe mɨsyem nɛʼɛ, mpa nye abe e nkul etiʼe bʉr bɨbɛh mɨlɔb.

⁷ Yé nteme, yé ó mpʉ bé ndɨ e nkul elɛɛ ó: «Yé be ó, mpʉl wam, nye egʉa lɛʼle ocyecye mo Zyɛm, ndwe le esa ó, bʉr gumla nye nɛʼɛ, ebe yé nye lé edwe me mobe, le elɛɛ ó, mɨ sa syem ɨ?»

⁸ Bɨn bɛɛ, bʉr o ndɨ elwib no e, ebe yé bɨn ndɨ aka to dolo lé elɛɛ nteme ó: «Bɨna saʼ ga ebebe, embɨa nkʉʼ buo pie tɨʼ» ɨ? Bʉʉ bʉr, bé efœʼ me é jɔʼ bé lé elɛɛ ó, me a si bana lɛɛ bɨsa mokan maa. Zyɛm ókab bʉr onɨ mɨmbi bɨntɨʼa lé ejala e be e!

Abe e mʉr ndɨ cɨcyel

⁹ Yé be no nɛʼɛ, zê bɨh oYʉden o ndɨ elaa bʉʉ bʉr é mih mo Zyɛm? Hɨʼɨ, yé abe ba no. Me be ó si dwe oYʉden ndwe e bʉr o ndɨ abe oYʉden ɨ, mobe. Mɨsyem myɔɔ, myé ejwɨʼ ó bɨbɛh.

¹⁰ Yé ó mpʉ yé ndɨ tila é Kalara Zyɛm ɨ. Yé ó tila ó: «Abe e mʉr ndɨ cɨcyel. Abe e mʉr ngwar.

¹¹ Abe e mʉr lé egʉa sa ndɨ cɨcyel ɨ. Abe e mʉr lé esaa Zyɛm.

¹² Bʉr bɨbɛh, bé a si gʉmla é bebebebe zi. Bɨbɛh, bɨ dwè ntuʼ é jɔʼ gwar. Abe e mʉr lé ecwɨa e bʉʉ bʉr. Abe e mʉr ngwar.

¹³ Mɨnʉm myɔɔ, myé é bebe, laa mofoo bé lwanbe kʉ gwii ɨ. Mɨnʉm myɔɔ, myé ekʉ ka lwib ó njɨ bɨkʉʉŋʉ. Sa lé eduho é mɨnʉm myɔɔ ɛ, yé ó mpʉ ful gurokɔɔ.

¹⁴ Bɨlwib byɔɔ, byé ó lwɨŋla e mosyomlʉ ndwe e modwie.

¹⁵ Bé ekpahbe fim mɨkam ó, njɨ lé eto jʉ bʉr.

¹⁶ Gumo yiyɛh bé lé elaa ɛ, bé eliʼe pie koo wɔɔ ó njɨ mokwar é tiilʉ, liʼe bʉr é vwaʼ.

¹⁷ Bé agʉa zi edwe bʉr motala.

¹⁸ Bé agʉa edwaabe Zyɛm.»

¹⁹ Bɨna bé egʉa ga ó, sa yiyɛh ndɨ Kalara Zyɛm ɨ, yé ó é l'efu e bʉr o ndɨ é monkara mo mɛra motie e. Motie Zyɛm a tiile be e, mé epɨr bʉr bɨbɛh mɨnʉm, le edwe bɨbɛh mobe é mih me.

²⁰ Mʉr ákwoʼ bi mokebe é mih mo Zyɛm ebe mbi nye lé edu motie e. Motie, mé ekʉ ka sea syɛɛ ó njɨ yaa elɛʼle bɨna ga ó, bɨna ga bé ó bʉr o mɨsyem.

Mʉr, nye etiʼe ó, ebe buʼo ye

²¹ To kœb ó, banana, Zyɛm, nyi lɛʼle bʉr ó, bé e nkul ebi mokebe, abe ó, bé edu motie mo Moyiz. Nye mʉr tɨʼ a si kar zi fih é l'efu le edwe bʉr baa mokebe. Motie mo Moyiz ndwe e sikʉlʉ ogwiha o mɨlɔb, bé a dwe e, yé eboʼlo ó, zi waa, nye ódibɔ.

²² Zyɛm mu lé edwe bʉr mokebe é mih me ó, njɨ ebe taa buʼo bé lé ejyɛʼ boo Yesʉs-Krɨst ɨ. Zyɛm a kar zi waa ó, é l'efu e baa bɨbɛh lé ejyɛʼ taa buʼo yɔɔ boo nye e, ebe, bʉr bɨbɛh, bé ó jwɨʼ gwar.

²³ Bɨbɛh bé a be ó si sa syem. Kum mo Zyɛm mu ó si cɛra e be.

²⁴ Dam be no, Zyɛm, nye edwe be mokebe é mih me ó, é zi ncwɨncwɨa we, mʉr ajɛna sɔʼɔ. Nye edwe be mokebe maa ó, ebe, Yesʉs-Krɨst a si dwih be é mpila ebebe lɔɔ é pololo.

²⁵ Zyɛm a ntɨh Yesʉs ó, nye ntaʼ, ze dwè, jala e mɨsyem ga mina é l'efu ó, efie le nkʉʼ leʼe empime mo Sɔŋ. Nye a dwè ó, nye nkʉʼ kɛm bʉr, ó bé jyɛʼɛ taa buʼo yɔɔ boo nye é lɔb ndwɛa motié waa ɛ. É zea Yesʉs-Krɨst a ze e, Zyɛm a si lɛʼle mpʉ nye ndɨ cɨcyel ɨ. Mɨsyem bʉr, bé a bɛa sa-sa ɛ, Zyɛm a si bul dihbe mye, kʉ lɛŋ mye é buobuo, alwib.

²⁶ No ó, banana, nyi ka lɛʼle bʉr ó, nye mʉr tɨ, nye ó cɨcyel mʉr. Nye nteme, nye ó waa lé edwe bʉr o ndɨ ejyɛʼ taa buʼo yɔɔ boo Yesʉs ɨ, mokebe e.

²⁷ É mpʉ yé ndɨ no e, zê mʉr óbana to dolo lé edoʼo e bɨsyɛɛla bye nye mʉr tɨʼ ɛ? Hɨʼɨ, yʉʉ sɔʼɔ, yé abe no. Yé ndɨ ekamle bɨna lé edoʼo ga? Zê motie mo Zyɛm ó ndɨ ekamle bɨna ga lé edoʼo ɛ? Hɨʼɨ, sa ndɨ esa ó, bɨna beʼ l'aka doʼo ga ɛ, yé ó buʼo bɨna mu lé edu ga ɛ,

²⁸ ebe, mbea wih, wé ó, mʉr Zyɛm lé edwe mokebe e, nye ó waa lé ejyɛʼ taa buʼo ye boo Zyɛm ɨ. Nye adwe nye mokebe é dɔɔ mbaʼla motie we.

²⁹ Zê Zyɛm, nye ó njɨ waa oYʉden bé ome ɛ? Ntʉʼ nye ndɨ Zyɛm é l'efu e bʉr o bɨkul bɨfih nteme ɛ? Eee, nye ó kʉ be Zyɛm wɔɔ nteme,

³⁰ ebe, Zyɛm, nye ó njɨ ngwar! É nko paʼ bʉr o b'a saŋɔ mpʉn ɨ, nye edwe be mokebe ó, ebe taa buʼo bé lé ejyɛʼ boo Zyɛm ɨ. Nye edwe mokebe nteme ó, bʉr o b'a baasaŋɔ mpʉn ɨ, ebe buʼo gwar yaa.

³¹ É jɔʼ bɨh lé elɛɛ lɔɔ buʼo ga yina ɛ, zê bɨh bé lé egbɛɛ motie ɛ? Hɨʼɨ, yé abe ba no. Bɨh bé elɨl motie maa ó, lɨl lɨlɨ.