Rôm 16 - Kálara Zyɛ̌m Edwán é mpʉ̌n

Moswɨhlɨ mo Pol

¹ Me ekpɛl ó, bɨn gʉŋa kɛl ga wina Febe. Nye ó ndɨ diakɔn é mbɛr Zyɛm ndɨ ɨ Kɛŋkrɛyas ɨ.

² É jɔʼ nye óze gʉʼ bɨn ye e, bɨn bé à beŋle nye mbɨmbɨa é die mo Da Yesʉs, mobeŋla lé ejala e mɨsaŋ mɨ bʉr mo Zyɛm ɨ. Dweʼ ga nye sa yiyɛh yé ósa nye sɔɔlʉ ɨ, ebe, nye mʉr tɨʼ a si fuʼo bʉr é buobuo ndwe e mɛm mʉr tɨʼ nteme.

³ Soha ga me Priska bé e njʉm we Akilas, bʉr o nwan yam ndɨ é l'empomo e syɛɛ egwar é zyɛŋa wih boo Yesʉs-Krɨst ɨ.

⁴ É jɔʼ me a ngbaa dwè e, bé a si tiʼ me. Bé a be ó, bé dwè be, jala e me, é l'efu le etiʼ me. Bɨh e mɨmbɛr mɨ Zyɛm ndɨ ɨ mɨlal mɨ bʉr o ndɨ abe oYʉden ɨ, bɨh bé ebul dwe be ekiba tɨ.

⁵ Soha ga nteme bʉr o mbɛr Zyɛm ndɨ eze gwɨhla é mbɛr wɔɔ ɛ. Me esoho mɨɔ kpɛl wam Epayɨnetɔs. Nye ó b'a be mʉr efoʼ é lal Azia lé ejyɛʼ taa buʼo ye boo Krɨst ɨ.

⁶ Me esoho nteme Maaria, mʉma a bul sea bɨn syɛɛ ɛ.

⁷ Me esoho nteme mɨmbyɛl myam, Andronikus bé e Yʉnias. Bɨh e boo nɔɔ ó b'a be é mbʉʼ. Bé ó b'a taare jyɛʼ taa buʼo yɔɔ boo Krɨst e me. Bé é bul gʉŋɔ boo sama mɨlʉmlʉ mo Da.

⁸ Me esoho nteme mɨɔ kpɛl wam Amplɨatɔs ndɨ é zyɛŋa ga wina boo Da Yesʉs ɨ.

⁹ Me esoho Urbanos, mʉr bɨh e nɔɔ ndɨ é l'empomo e syɛɛ egwar é zyɛŋa wih boo Yesʉs-Krɨst ɨ. Me esoho nteme mɨɔ kpɛl wam Stakus.

¹⁰ Me esoho Apelɛs. Nye ó é zyɛŋa wɔɔ boo Krɨst. Nye ó é bul seʼlɔ. Me esoho nteme bʉr o mbɛr bʉr mo Aristobul.

¹¹ Me esoho mbyɛl wam Erodion. Me esoho nteme bʉr o mbɛr bʉr mo Nasisʉs, baa ndɨ é zyɛŋa wɔɔ boo Da Yesʉs ɨ.

¹² Me esoho nteme Trifɛna bé e Trifosa, bʉba lé esea lelelele syɛɛ mo Da ɛ. Me esoho nteme mɨɔ kpɛl wam Pɛrsis. Nye a si gba nyʉl lé esea e Da.

¹³ Me esoho Rufus, mʉr Zyɛm a pɛh ɛ. Me esoho nteme nyɔŋ we, ndɨ me nteme ayo e.

¹⁴ Me esoho nteme Asinkrit, Flegon bé e Ermes, le Patrobas, le Ermas ndwe e bʉʉ obuʼla bé e boo nɔɔ ndɨ gumo gwar ɨ.

¹⁵ Me esoho nteme Filolɔg bé e Yʉlia. Soha ga me nteme Nereus bé e kɛl, le Olɛmpa. Me esoho nteme myʉʉ mɨsaŋ mɨ bʉr mo Zyɛm mimyɛh bé e boo nɔɔ ndɨ gumo gwar ɨ.

¹⁶ Swɨhla ga mbɨmbɨa paʼra win, lé edwiila momuʼ, ndwia ndɨ ti ɨ. Bʉr o mɨmbɛr mɨ Zyɛm mo Krɨst mimyɛh, bé esoho bɨn.

Motɨɨ mo epihe ndwe e moswɨhlɨ

¹⁷ No ó, obɨɔ ga bam, me ejwɨʼla e bɨn ó nɛɛ: bɨn bé à di ncye é nko paʼ bʉr o b'a tɨ mɨlɛa mih é jɔʼ bɨh bé a dwe bɨn sikʉlʉ ɨ. Bé esa mpɔʼa monkɔm lé ekol obɨɔ bɔɔ ebɔʼ bé óbɨm é mɨleme e. Cɛra ga e be!

¹⁸ Mɨmbi mɨ bʉr myaa, ntʉʼ Tî ga wina Krɨst, bé lé esea. Bé ekʉ ka sea syɛɛ ó njɨ é l'efu e mɨmo myɔɔ! Bé edimle bʉr l'apa gʉa ebɛʼ paʼra embɨa e l'ebebe e, lé ekʉa be é zi lwib mopɨʼ ndwe e moseʼla.

¹⁹ Bɨn bɛɛ, bé esa Da mojoʼo, mpʉ bʉr bɨbɛh lé egʉa ɛ. No ó, me ebul soho ebe bɨn. Me ekpɛl nteme ó, bɨn diʼe e l'ocyoo é l'efu ó, bɨn saʼ embɨa. No ó, é nko paʼ ebebe, bɨn bé óbe ó ocɨcyel o bʉr.

²⁰ Zyɛm, waa lé edwe bʉr motala ɛ, nye ó ndɨ waa mu kunokuno le etíile Satan si e mokʉ mɨn ɨ. Mocyɛʼ mo mpom mo Tî ga wina Yesʉs, mé swɨŋɨ é bɨn.

²¹ Timote, mʉr nwan yam ndɨ é l'empomo e syɛɛ egwar ɨ, nye esoho bɨn. Mɨmbyɛl myam mi, Lʉsiʉs, Yasɔn, ndwe e Sosipatros, myé esoho nteme bɨn.

²² No ó, mɛm, Tɛrtios, ndɨ nkotila kalara nwaʼ ɛ, me esoho nteme bɨn é Da Yesʉs tʉŋlʉ.

²³ Gaywis, nye esoho bɨn nteme. Nye ebɨlan e me jwɨʼ gwar e gwar é mbi nye lé ebɨlan e bʉr o Mbɛr-Zyɛm bɨbɛh ɛ. Erast, mbɔʼlʉ ekuro e bɨmɔn bɨ nkana yiʼ ɨ, bé e mɨɔ ga wina Kwartos, bé esoho bɨn nteme.

²⁴ [Ncwɨncwɨa mo Tî ga wina Yesʉs-Krɨst, nye diʼe e bɨn bɨbɛh. Amɛn.]

Pol lé egumlo Zyɛm

²⁵ A bwaʼ nkul Zyɛm ndɨ e nye ee! Nkul waa ó mu lé elɨl bɨn lé edu mpʉ Mbɨambɨa Lɔɔ me lé elɛɛ ɛ, ndɨ ɨ. Mpaŋla waa, nye etiibe ó e Yesʉs-Krɨst. Nye edu nteme lwib odim yé a taare be mɨfela mɨmbu é buobuo,

²⁶ yaa nye a ka gwih bɨna ga ɛ. Mpaŋla waa a bɛa be ó tila é l'okalara be ogwiha o mɨlɔb. Bʉr o bɨkul bibyɛh, bé mu ka gʉa nye ó, é mpʉ Zyɛm a bɛa lɛɛ é l'efu lɔɔ ɛ. Zyɛm ndɨ njʉmdia e njʉmdia ɛ, a cen be mpaŋla lé etiibe e mʉr waa ó, bé nkʉʼ jyɛʼ taa buʼo yɔɔ boo nye, le esa nye mojoʼo.

²⁷ É Zyɛm nye ome, waa ndɨ Cɨcyoo lé elaa mɨcɨcyoo mimyɛh ɛ, kum diʼe e nye é zi mo Yesʉs-Krɨst, njʉmdia e njʉmdia. Amɛn.