Rôm 15 - Kálara Zyɛ̌m Edwán é mpʉ̌n

¹ Bɨna ga, bʉr o b'a nʉa pim é buʼo e, bé ejala le edihbe bʉr o ndɨ é cyɛʼ buʼo e. Bɨna bé ajala le esaa ga mɨnyɔm ga mina.

² Mʉr nyiwɛh é sama ga yina, nye saʼ syɛɛla mɨɔ we mʉr ókpɛl ɨ. Nye saʼ yaa yé óbɛm be e nyɔm é nko paʼ mɨɔ we waa, ó nye gwɨa é buʼo e.

³ Dam be Krɨst nye mʉr tɨ, nye a baasaa nyɔm we. Yé ó mpʉ yé ndɨ tila é Kalara Zyɛm é lʉ mo Krɨst ɨ. Yé ó tila ó: «Baanya-molwɨɨ lé elwɨɨ-lwɨɨ go e, bé mu ka lwɨɨ ó me!»

⁴ Sa yiyɛh ndɨ tila é Kalara Zyɛm ɨ, yé a tilɔ no ó, é l'efu ó, bɨna jwɨʼɨ ga bɨsikʉlʉ ndɨ tɨʼ ɨ. Kalara waa, nye egba bɨna ga nkul é monyʉl. Nkul waa, ndwe e bihbe bɨna lé ebi ga ɛ, byé esa ó, mɨleme ga mina, myé lwɨŋlɨ e mbɛla.

⁵ Zyɛm ó ndɨ esa ó, bɨna saʼ ga bihbe. Nye nteme ó lé egba bɨna ga nkul é monyʉl. Nye cyɛba bɨn é mɨleme, ó bɨn diʼe e mbi pɛhla ngwar, waa Yesʉs-Krɨst ótɨe bɨn ɨ,

⁶ é l'efu ó, bɨn diʼe twii ngwar lé egumlo Zyɛm, waa ndɨ Sɔŋ mo Tî ga wina Yesʉs-Krɨst ɨ.

⁷ É mpʉ yé ndɨ no e, beŋla ga paʼra win mpʉ Yesʉs-Krɨst a beŋle bɨn ɨ. Saʼ ga no é l'efu ó, bʉr dwiibɨ Zyɛm, duho tɨ.

⁸ Me eboʼlo bɨn lɔɔ wi: Krɨst a si dwir nye mʉr tɨʼ syɛl mosa é l'efu le oYʉden. Nye a sa no ó, é l'efu le elɛʼle bɨh mpʉ Zyɛm ndɨ mʉr ocyecye e. Nye esa bɨh syɛɛla yaa ó, lé edira monkɛʼ Zyɛm a liʼe bɨmpam bih e ma ɛ.

⁹ Nye a ze sea nteme ó, é l'efu e bʉr o bɨkul bɨfih, ó byé gʉŋa mpʉ Zyɛm lé ejwɨʼ bʉr nkoo e, byé nkʉʼ gumlo nye tɨ. Yé ó tila é Kalara Zyɛm ɨ. Yé ó tila ó: «Ebe no, me ógumlo go teme bɨkul bɨfih. Me ójɛɛ go osam lé eseʼle die lo.»

¹⁰ Zyɛm, nye elɛɛ nteme ó: «Bɨn bʉr o ndɨ abe oYʉden ɨ, soha ga, bɨn e boo kul bʉr mo Zyɛm.»

¹¹ Yé nteme, yé ó tila ó: «Dwiibɨ ga Da, bɨn bʉr o ndɨ abe oYʉden ɨ. Seʼla ga nye, bɨn bɨkul bibyɛh.»

¹² Ngwiha mɨlɔb Ezayi a lɛɛ nteme ó: «Nuu mʉr mpoŋbʉr mo Yese óbyɛl mpʉ ntoʼdu, ntɔʼ jwɨ̀ʼ bʉr o ndɨ abe oYʉden ɨ. Mɨleme myɔɔ, myé óloŋlo e mbɛla ó, ebe, bé ebono nye.»

¹³ No ó, Zyɛm lé egba bʉr mbɛla é mɨleme e, nye cyɛba bɨn é mɨleme, ó bɨn soha é jɔʼ yiyɛh. Mɨleme min, myé loŋla e motala ebe buʼo yin. No ó myé óloŋlo e mbɛla ebe nkul mo Mbɨambɨa Sisim ɨ.

Cyen mo Pol boo bʉr o ndɨ abe oYʉden ɨ

¹⁴ Obɨɔ ga bam aa! Mɨ kʉ gʉa ó, bɨn bé ó lwɨŋla e ncwɨncwɨa ndwe e ngwɨa. Bɨn mu ó e nkul edweela motɨɨ paʼra win.

¹⁵ Dam be no, me si tile bɨn kalara nwaʼ ó e l'ojʉjʉ é leme. Byʉʉ bɨpeh bɨ tɨ, byé be lé etilɔ ó, é l'efu le ejɨm bɨtoŋla bin. Me etile bɨn no ó, ebe ncwɨncwɨa Zyɛm a lɛʼle me e.

¹⁶ Nye a be ó si sʉ me mocyɛʼ mo mpom, ó me diʼe syɛl mosa mo Yesʉs-Krɨst é l'efu e bʉr o ndɨ abe oYʉden ɨ. Me mu ó mpʉ para lé eliŋ bʉr baa mɨndwɛa Zyɛm lé ebee mbɨmbɨa é zi Mbɨambɨa Sisim ɨ. Syɛɛ para me lé esa nɨ, yé ó é zi esa tuno é lɔb Mbɨambɨa Lɔɔ ndɨ eduho boo Zyɛm ɨ.

¹⁷ No ó, é zyɛŋa wih boo Yesʉs-Krɨst, me e nkul edoʼo e syɛɛ-Zyɛm me lé esa ɛ.

¹⁸ Me aŋa lwib sa fih, njɨ syɛɛ Yesʉs-Krɨst a sea é zi wam, ó me dula bʉr o ndɨ abe oYʉden ɨ, pyal e be é mih mo Zyɛm. Bé mu ó lé esa nye mojoʼo ebe bɨlwib me a lwib-lwib ɨ, ndwe e bɨsyɛɛla me a sa-sa ɛ.

¹⁹ Zyɛm a be ó si sa bɨdweʼle bɨ nkul we ndwe e bɨsa bɨ jehe é zi wam é nkul mo Mbɨambɨa Sisim. Me a ze sa tuno é lɔb Mbɨambɨa Lɔɔ lé etiibe e Yesʉs-Krɨst ó, bɨgumo bibyɛh, taare ɨ Yerʉsalɛm, to pyal é Iliri.

²⁰ Leme, wé a be ó me é ntɨɨɨŋ ó, me lɛŋɨ Mbɨambɨa Lɔɔ é bɨgumo bibyɛh bʉr l'apa joʼo be lé etublo die mo Yesʉs-Krɨst ɨ. Me a baakpɛl lɛɛ we boo bʉr o b'a taare lɛɔ we e. Bʉr, bé amu ka lɛɛ é lʉ wam ó, bim me a koʼo lé efumo mɨmbɛr ɨ, yé a kʉ ka be ó njɨ é mompɔɔnʉ moonkan!

²¹ Me ekpɛl ó, yé diʼe é wam paʼ ó, é mpʉ yé ndɨ tila é Kalara Zyɛm ɨ. Yé ó tila ó: «Bʉr o b'a baalɛɔ lʉʉ ekan lé etiibe e Zyɛm ɨ, bé ó ngo bee é sʉlʉlʉ. Baa b'a baapa joʼo yʉʉ sɔʼɔ lé etiibe e nye e, bɛɛ ó b'a joʼo.»

²² Ebe no, me a baabe e l'epʉla lé eze bee bɨn, mɛm yɛɛ e gwɨma esa no zɔʼ e zɔʼ.

²³ Taare é molu pihe, ze pyal é muh é dobo lɨ, me ó njɨ lé egwɨm ze bee bɨn. Sa gwar, yé a baabana. No ó, banana, syɛɛ yam, yé mu ó si sie ɨ bɨnkɔra bi.

²⁴ Me ebuʼla ó, me óbee bɨn é jɔʼ me ólaa lé eto Panya ɛ. Sa gwar, me ebuʼla ó, bɨna bé ódi ba ma jɔʼ é l'efu le egʉa mo e bɨn. Pie tɨ, me òlaa, to Panya, bɨn lé efuʼo me é cyen yaa.

²⁵ Banana, me paʼ taare to yɛɛ Yerʉsalɛm, lé eto gul mɨsaŋ mɨ bʉr o ndɨ gʉʼ ɨ,

²⁶ ebe, obuʼla o bɨpeh bɨ si bɨ Masedwan ndwe e Akayi, bé a tiʼe é mɨleme ó, bé syɛŋ ó bɨmɔn lé egul mɨsaŋ mɨ bʉr mo Zyɛm mu é l'enteʼe ɨ Yerʉsalɛm ɨ.

²⁷ Bé bʉr o tɨ, bé a si joʼo bɨsʉhʉ lé esa no. Syɛɛla yaa, yé óbe nteme ó, mpʉ mpɔla bé a ka mɛʼle le ejɛna ɛ. OYʉden onɨ ó b'a taare gul bʉr o ndɨ abe oYʉden ɨ, é l'efu ó, bé sʉŋɔ mocyɛʼ mo mpom mo Zyɛm. No ó, banana, yé ejala ó, bʉr o ndɨ abe oYʉden baa ɛ, bé fuʼa be, lé edwe be bɨsa mu lé esa be sɔɔlʉ ɨ.

²⁸ No ó, é jɔʼ me óbe si to be e ngula waa ɛ, le egʉa nteme ó, bɨ bi we e, é jɔʼ yaa ó me óka bula, to Panya, cwɨɨ gʉʼ bɨn ye e.

²⁹ Me egʉa ó, pyala me ópyal bɨn ye e, me óbe ó e mocyɛʼ mo mpom mo Yesʉs-Krɨst.

³⁰ No ó, obɨɔ ga bam aa! Sa me lé edî e bɨn é die mo Tî ga wina Yesʉs-Krɨst, le é kpɛl Mbɨambɨa Sisim lé egba é mɨleme ga mina, yé ó bɨn kœbɨ me é dɔm lɨ, lé ejwɨʼla e Zyɛm é l'efu lam.

³¹ Saʼ ga mɨnjwɨʼla ó, Zyɛm syɛbɨ me é mobo mo oYʉden o lal Yʉda, baa ndɨ esa lɔɔ Zyɛm ebɨh ɨ. Saʼ ga mɨnjwɨʼla nteme ó, mɨsaŋ mɨ bʉr o ndɨ ɨ Yerʉsalɛm ɨ, bé beŋɨ syɛɛ me óto sea be e, mbɨmbɨa.

³² No ó me óze gʉʼ bɨn ye lwɨŋla e bɨsʉhʉ ɨ, é gwɨma mo Zyɛm tʉŋlʉ, me nkʉʼ gʉa gbala é piiia.

³³ Zyɛm lé egba bɨna ga motala é mɨleme e, nye diʼe e bɨn bɨbɛh. Amɛn.