Rôm 14 - Kálara Zyɛ̌m Edwán é mpʉ̌n

Adwe mbuʼla mobe mo twii ceme!

¹ Beŋla ga mbuʼla l'apa nʉa pim é buʼo e. ǃƗ buʼo ye le yaa yin be e ziila nɛʼɛ, apɨra ga mokan e nye ebe bwa mɨlɔb lé epahlɔ mɨmbi mɨmbi é Mbɛr-Zyɛm tʉŋlʉ ɨ.

² É lɔb mode, nwaʼ mbuʼla, nye ebuʼla ó, nye óbɛm de sa ede yiyɛh, antaa motie mo Zyɛm. Nuu mbuʼla, waa ndɨ apa gʉa buʼo é kpɛhla ɛ, de-de njɨ nteʼe.

³ Mʉr waa lé ede mɨmbi mode mimyɛh ɛ, nye beʼ l'acyɛl mʉr lé eti tir ɨ, ebe we mbi buʼo. Mʉr lé eti tir ɨ, nye beʼ l'aniʼe nyiha baa ebebe é lɔb edɨɨ le, ebe, Zyɛm a si beŋle mɨɔ win waa.

⁴ Gwɔɔ mʉr lé edwe syɛl mosa nyoonkan mobe e, go ebee ó, go ejʉʼa le esa nye no, dɔɔ waa yé? ǃNye si gwìh e nye, nkʉ ntɔʼ, ǃnye si gʉa sa nɛʼɛ, masa we ó lé ejala le eláa nye bɨbaa bɨ tɨ. Nye aŋa twe yɛɛ tweʼ, ebe, Da, nye ó e nkul efuʼo nye mbo é l'efu ó, nye cyɛba cɨcyel é nkʉʼʉ.

⁵ Bʉr ba, bé ejwɨʼ ó, myʉʉ mɨmoho, myé elaa myʉʉ é modile. Bʉʉ bʉr bɛɛ, bé ejwɨʼ ó, mɨmoho mimyɛh, myé edile ó jwɨʼ gwar. Bɨsyɛɛla bɨ mbuʼla nyiwɛh, byé ejala le eduho ó, é l'ocɨcyel o mɨpɛhla mɨ leme we.

⁶ Mʉr lé ebee ó, guu moho, wé ó nye sa ndɨ ti ɨ, nye esa no ó, nye gumla Da Yesʉs tɨ. Mʉr lé ede sa yiyɛh ɛ, nye egumlo Da Yesʉs tɨ, ebe, nye edwe Zyɛm ekiba é lɔb sa nye lé ede e. Waa lé eti yʉʉ sa ede e, nye esa no ó, nye nkʉʼ gumlo Da Yesʉs é zi bɨti byaa. Nye nteme, nye edwe nye ekiba é lɔb sa ede nyɛɛ lé emɛʼle de e.

⁷ Abe e mʉr ngwar é sama ga yina lé etiʼe, nkʉ dwè, é l'efu le nye mʉr tɨ.

⁸ Til molu bɨna ga dina e tiʼ ɨ, yé e nyɔm é l'efu ó, bɨna gumla Da Yesʉs tɨ. É jɔʼ bɨna lé edwè ga ɛ, bɨna dwè ga ó, bɨna gumla ga nye nteme. No ó, bɨna dam tiʼe ga, nkʉ ó, bɨna dam dwè ga, bɨna bɨbɛh, bé ó baa mo Da Yesʉs.

⁹ Ebe, Lœma mulo mo Zyɛm nye mʉr tɨʼ a si dwè, ze pàh, ó nye diʼe Tî wina é l'efu e mɨkubla le odwè e.

¹⁰ Go ebee ó, go ejʉʼa le eláa mɨɔ go mʉr baa ebebe, dɔɔ waa yé? Go ebee ó, go ejʉʼa le ecyɛl mɨɔ go mʉr, dɔɔ waa yé? Bɨna ga bɨbɛh, bé óto cyɛb ga é mih mo Zyɛm é dia tiʼà mɨlɔb ye,

¹¹ ebe, yé ó tila é Kalara Zyɛm ó: «Da, nye ekáale ó: “Neme me ndɨ kublakubla, me ókʉ bana sa ó, mʉr nyiwɛh kurɨ moboo si é mih mam. Mʉr nyiwɛh gumlo me, mɛm, mʉr ndɨ Zyɛm ɨ.”»

¹² Ebe no, mʉr nyiwɛh ndɨ é mbɛr Zyɛm ga wina ɛ, nye ókar é mih mo Zyɛm.

Akol mɨɔ go ebɔʼ nye óbɨm é leme e

¹³ É mpʉ yé ndɨ no e, bɨna gwaʼa ga lé edweela mobe paʼra ga wina. Bul laŋle nʉa ga tiʼa ó, mʉr ayi sa bɨsyɛɛla byé ókol nuu mbuʼla ebɔʼ nye óbɨm é leme e.

¹⁴ É zyɛŋa wih boo Da Yesʉs, mɨ kʉ gʉa nteme ó, ntʉʼ sa ede yé mʉr tɨʼ ndɨ e nkul elœʼ mʉr é mih mo Zyɛm. Sa gwar, ǃɨ mʉr si de mode maa nɛʼɛ, ǃnye si pahle ó, yé óbɛm lœʼ nye é mih mo Zyɛm wa, mode maa, mé ó cyecye lwaʼ é leme we.

¹⁵ Yé be ó, mɨɔ go óbɛm liʼ é gœʼra-gœʼra e mocyɛʼ mo nyʉl ebe sa ede yo nɛʼɛ, lɛɛ ó, gɨ bɔʼa e mpaŋ zi é jɔʼ go lé ede sa yaa ɛ. Go alɛʼle nye leme ncwɨncwɨa é zi ebò e cyen go lé ekœʼ œ. Asa ó, mʉr Krɨst a dwè, jala e nye e, nye dimɨ é nkɔb bʉr ebe mbi mode go lé ede e.

¹⁶ Syɛɛla bɨn bɛɛ lé ebee ó, yé ejala le esaŋɔ ɛ, yé be ó, bʉr, bé ófœʼ bɨn e tɨʼ nɛʼɛ, fuo di, aka sa ga ye.

¹⁷ Jwɨ̀ʼa mo Zyɛm, yé abul dwɛʼ lɔb ede le enyʉl. Yé ó jwɨ̀ʼa ocɨcyel, motala, ndwe e bɨsʉhʉ bɨna lé ebi ga é zi mo Mbɨambɨa Sisim ɨ.

¹⁸ Ebe, mʉr lé esea e Yesʉs-Krɨst é mbi waa ɛ, Zyɛm, nye ebee nye mbɨmbɨa, bʉr nteme seʼle nye.

¹⁹ É mpʉ yé ndɨ no e, bɨna gbaʼ ga monyʉl lé esa bɨsyɛɛla lé esa ó, sama ga yina tiʼa é motala ɛ. Saʼ ga nteme byaa byé ógwɨl bʉʉ bʉr é nko paʼ buʼo yɔɔ ɛ.

²⁰ Syɛɛ Zyɛm a sea ɛ, mʉr beʼ l'alɨr nye ya ebe mode. Yé cyecye ó, yé abe e mode ndɨ elœʼ mʉr é mih mo Zyɛm. Mode, mé ebebe ó, njɨ é jɔʼ ndɨa mode waa lé esa ó, mɨɔ go mʉr duma é l'ebebe e.

²¹ Yé mbɨmbɨa é nko paʼ go ó, go beʼ l'ade tir, nkʉ nyʉl monwoʼ, nkʉ sa syɛɛla yiyɛh ndɨ e nkul edulo mɨʉ ó, nye duma é l'ebebe e.

²² Sa go mu si buʼla ɛ, baʼla ye é leme go tʉŋlʉ. Bɨn e Zyɛm oba nkʉʼ gʉa ye. Zyɛm ósʉ mocyɛʼ mo mpom me ó, é mʉr lé ekœʼ ebò e cyen mʉr tɨʼ a pa mɛʼle e. Mʉr waa, nye aŋa gwɨma ebò e cyen le laa.

²³ To kœb ó, ǃɨ mʉr si de sa ede e mosono é leme nɛʼɛ, nye óbi mobe é mih mo Zyɛm ebe ndɨa mode waa. Ndɨa mode waa, wé aduho é buʼo ye. Ebe, syɛɛla yo yiyɛh ndɨ abɔma e buʼo yo e, yé ó go syem.