Rôm 13 - Kálara Zyɛ̌m Edwán é mpʉ̌n

Obuʼla, bé ejala le esa ojwɨɨ bɔɔ mojoʼo

¹ Mʉr nyiwɛh, nye saʼ ojwɨʼa o lal mojoʼo, ebe, nkul mojwɨ̀ʼa nyiwɛh, Zyɛm ó b'a cyel nye. Bʉr o ndɨ ejwɨʼ bʉʉ ɨ, Zyɛm ó ndɨ ecyel be é bɨdia byɔɔ.

² No ó, mʉr lé ekaŋa e njwɨɨ ɨ, nye esa sa Zyɛm a cyel ɨ, mongan. Baa lé esa no e, bé edaʼre mobe é monyʉl mɔɔ.

³ Baa lé esa embɨa ɛ, bé abe e bʉa é mɨleme lé ecyɛb é mih mo ojwɨʼa. To kœb ó, osyɛl be ebebe, bé ó ndɨ e bʉa waa é mɨleme myɔɔ. Zê go lé egwɨm ó, mɨpɛhla mɨ leme myo, myé diʼe é pyɛɛɛ jɔʼ yiyɛh é mih mo ojwɨʼa baa ɛ? Saʼ be embɨa, bé nkʉʼ seʼle go.

⁴ Ebe, njwɨʼa, nye ó syɛl mosa mo Zyɛm ndɨ é l'efu le esa go embɨa ɛ. ǃBɨn si sa ebebe nɛʼɛ, kpɛŋɨ ga njwɨʼa é jɔʼ yaa, ebe, mpɛl ebaʼ nye lé ebi ɨ, nye abi ye mbɛh. Nye ó syɛl mosa mo Zyɛm lé ekuna baa osyɛl be ebebe lé esa ebebe e. Nye ó lʉmlʉ we ndɨ ekpaa empime e mʉr lé esa nuu ebebe e.

⁵ Ebe no ó bɨn lé ekʉ jala le efil monyʉl mɨn si é mih mo ojwɨɨ ɨ. Abul be njɨ lé ekpɛɛ empime le bɨntɨʼa mo Zyɛm. Bɨn bé esa nteme mojoʼo maa ó, ebe, bɨn bé egwɨm ó, mɨpɛhla mɨleme min, myé diʼe myaa ndɨ é pyɛɛɛ ɛ.

⁶ Ebe no nteme ó bɨn lé ejɛna tœa ɛ, ebe, Zyɛm a si cyel ojwɨɨ é bɨdia byɔɔ é l'efu ó, bé saʼ syɛɛ yaa é dwiii.

⁷ Jɛna ga bʉr bɨbɛh mompɔla bɨn ndɨ be e ma ɛ. Jɛna ga otœa boo bʉr o ndɨ ebɛma be e. Dwaaba ga baa lé ejala e duu ɨ. Seʼla ga baa lé ejala e moseʼla ɛ.

Kpɛl paʼra obɨɔ e l'obɨɔ

⁸ Adi ga nuu mʉr e mpɔla. Me dam lɛɛ no, bɨn bé yɛɛ ó e mpɔla bɨn lé ekʉ jala le ejɛna ɛ. Mpɔla waa, nye ó kpɛl paʼra win. Mʉr lé ekpɛl mɨɔ we mʉr ɨ, nyi du motie mo Zyɛm mɨmɛh.

⁹ Yé ó tila é mompene mo Zyɛm ó: «Asa mɨfyɛba. Ajʉ mʉr. Adíbe. Acen mih é sa yoonkan, nkʉ gwɨm ye.» Mompene monɨ ndwe e mʉʉ mɨmɛh, mé eto syɛŋa ó, é l'etie egwar lɨʼ tʉŋlʉ: «Kpɛlɨ mɨɔ go mʉr mpʉ go lé ekpɛl go mʉr tɨʼ ɨ.»

¹⁰ Mʉr lé ekpɛl mɨɔ we mʉr ɨ, nye abe e nkul esa nye ebebe. ǃGo si kpɛl bʉr nɛʼɛ, lɛɛ ó, go edu motie mɨmɛh mbɨmbɨa.

¹¹ Saʼ ga no, ebe, bɨn bé egʉa jɔʼ bɨna ga mu ɨ. Banana, yé ó jɔʼ bɨn lé ekʉ jala le ejɨma é bɨdwo e. Jɔʼ Zyɛm a bɛa tiʼe é leme we ó, nye dwe ó bɨna ga tiʼ molu mo mpoʼ mɨmɛh ɛ, yé mu ó kunokuno le epyal, laa mpʉ yé a taare be é jɔʼ bɨna bé a taare jyɛʼ ga taa buʼo ga yina boo Zyɛm ɨ.

¹² Pum mu ó lé ekʉ laa. Mɛn, wé mu ó lé ekunbo. Bɨna birɨ ga be bɨsyɛɛla bɨ apum. Bɨna bwara ga mokʉa mo dɔm é l'efu ó, bɨna lwimla ga e me é moho.

¹³ Bɨna kœʼœ ga ebò e cyen ndɨ ejala e bʉr o ndɨ é myɛn ɨ. Bɨna l'ayi lɔʼba ga le ebwal mozɔɔ, nkʉ fwaʼ monwoʼ, nkʉ lama fwon é zi bɨduo, nkʉ sa bɨmala zam e l'ekomo, nkʉ sa mpɔʼa monkɔm, nkʉ zii.

¹⁴ Diʼe ga é zyɛŋa win boo Da Yesʉs-Krɨst. Bwara ga nye mpʉ kan. Acen ga mɨleme min é nko paʼ bɨsyɛɛla nyʉl bɨpuno win lé egwɨm sa ɛ.