Rôm 12 - Kálara Zyɛ̌m Edwán é mpʉ̌n

Edwan e tiʼ dumo e Krɨst

¹ No ó, obɨɔ ga bam, me ejwɨʼla e bɨn é nkoo Zyɛm a jwɨʼ bɨna ga ɛ, ó bɨn timla nye monyʉl mɨn ntinɨ e ntinɨ, ebe, monyʉl mɨn, mé ó sa bɨn lé ejala le edwe nye tɔɔ mɨkubla motwina ndɨ ti é mih me e. Nye óbee bɨtiʼ bin byaa mbɨmbɨa. É jɔʼ bɨn bé ósa no e, bɨn bé ódwiibɨ nye é mbi nye ógwɨm ɨ, é mɨsisim min.

² Aka du ga mɨnjwɨr bʉr o mya wiʼ lé ekuhlo e. Yé ejala ó, Zyɛm dweʼ bɨn mɨpɛhla mɨdwan, ó nye dwirɨ bɨn mɨleme. É mbi waa ó bɨn bé ógʉa sa Zyɛm lé egwɨm ɨ, é kpɛhla. Bɨn bé ógʉa sa ndɨ é mbɨa ɛ, ndwe e yaa nye lé emɛʼle e, ka kɛl sa ndɨ mbɨmbɨa é mɨpaʼ mimyɛh ɛ.

³ Zyɛm a si lɛʼle me ncwɨncwɨa we. É zi ncwɨncwɨa we waa ó me lé elɛɛ e mʉr nyiwɛh ndɨ é l'esama lɨn ó: mʉr beʼ l'abul láa nye mʉr tɨ. Nye seʼla nye mʉr tɨ, antaa njɨ. Mʉr nyiwɛh, nye pahla nye mʉr tɨ, nye nkʉʼ gʉa mbi mʉr nye ndɨ ɨ, lé edu mbi buʼo Zyɛm a gba nye é leme e.

⁴ Mʉr, nye ó nyʉl ngwar, nyʉl nyɛɛ e bɨfum bɨ nyʉl é buobuo. Bɨfum bɨ nyʉl bibyɛh, byé abe lé esea syɛɛ gwar.

⁵ Jwɨʼ gwar e gwar yaa nteme ó bɨna ndɨ ga é buo e. Sa gwar, bɨna ga bé ó nyʉl ngwar é zyɛŋa ga wina boo Krɨst. Bɨna ga bɨbɛh, bé ó bɨfum bɨ nyʉl we, byaa ndɨ mɨnɛra e nyʉl ngwar ɨ.

⁶ Zyɛm a nol bɨna ga bɨntɔɔ ó, mɨmbi mɨmbi. Mʉr nyiwɛh jala le esea e Zyɛm syɛɛ ó, du we mbi bɨntɔɔ Zyɛm lé enol nye e. Yé be ó, nye a si nol gwɔɔ bɨntɔɔ bɨ egwih mɨlɔb mye nɛʼɛ, toʼ dolo lé egwih mye é zi buʼo.

⁷ Yé be ó, Zyɛm a nol go ó, bɨntɔɔ bɨ egul bʉr nɛʼɛ, sea be syɛɛ yaa, to dolo. Yé be ó, nye a nol go ó, bɨntɔɔ bɨ eyeʼle bʉr nɛʼɛ, yeʼla be.

⁸ Yé be ó, nye a nol go ó, bɨntɔɔ é l'efu le egba bʉr nkul é monyʉl nɛʼɛ, gbaʼ be nkul waa. Yé be ó, nye a nol go ó, bɨntɔɔ bɨ ekab baanteʼenteʼe mobi nɛʼɛ, kabɨ be ma é ntuʼ-ntu-ntuʼ. Yé be ó, nye a nol go ó, bɨntɔɔ bɨ ejwɨʼ bʉr nɛʼɛ, gbaʼ nyʉl lé ekœʼ e be mbɨmbɨa. Yé be ó, nye a nol go ó, bɨntɔɔ bɨ elɛʼle bʉr nkʉnkoo nɛʼɛ, lɛʼla be nkʉnkoo yo e bɨsʉhʉ.

⁹ Kpɛl, yé duha bɨn é mɨmo si. Bena ga sa yiyɛh ndɨ é bebe e. Kpɛlɨ ga sɔʼɔ, njɨ yaa ndɨ é mbɨa ɛ.

¹⁰ Kpɛla ga paʼra win mpʉ mɨɔ e mɨɔ lé ejala le ekpɛla ɛ. Dwaaba ga bʉʉ bʉr é l'esama lɨn.

¹¹ Gbaʼ ga monyʉl lé esa syɛɛ, abe e l'epɨh. Mbɨambɨa Sisim, nye kubla é mɨleme min tʉŋlʉ. Sea ga e Da Yesʉs.

¹² Diʼe ga e bɨsʉhʉ ebe mbɛla ndɨ bɨn lwɨŋla é mɨleme e. Dihba ga mɨtuu e mɨndɛl. Gbaʼ ga monyʉl lé esa mɨnjwɨʼla.

¹³ Dweʼ ga mɨsaŋ mɨ bʉr mo Zyɛm bɨsa lé esa be sɔɔlʉ ɨ. Dɨʼe bɨlan ga e l'ojyoo lé epyal bɨn ye e.

¹⁴ É jɔʼ bʉr lé etíile bɨn ɨ, sʉʼo ga be mocyɛʼ mo mpom. Laa ó, bɨn syɛmɨ be, fuo sʉ ga yɛɛ be mocyɛʼ mo mpom.

¹⁵ Soha ga, bɨn e bʉr o lé esoho e. Jɨʼe ga modwe, bɨn e baa lé ejɨ ɨ.

¹⁶ Diʼe ga twii paʼra win. Ankɛɛ ga monyʉl; mɛʼla ga ó, bɨn sea mbi syɛɛ wiwɛh, yé dam be mbi ma syɛɛ bʉr ndɨ epyeh e. Atoŋlo ga ó, bɨn e bɨn ó ndɨ mɨcɨcyoo.

¹⁷ Abala ga syɛɛla ebebe. Saŋa ga zi esa bʉr bɨbɛh bɨsyɛɛla ndɨ é bul mbɨa é mih mo bʉr bɨbɛh ɛ.

¹⁸ Yé bana bɨn nɛʼɛ, saʼ ga mbi wiwɛh é nko paʼ win ó, bɨn e bʉr bɨbɛh, diʼe é motala.

¹⁹ Obɨɔ o kpɛl bam aa! Akuna ga bɨn bʉr o tɨ. Mɛʼla ga ó, Zyɛm nye ome, nye kpaŋa empime lɨn, ebe, yé ó tila é Kalara Zyɛm ó: «Da, nye elɛɛ ó: “Me ó ndɨ mokuna-bʉr win. Me óbala syɛɛla ebebe yɔɔ.”»

²⁰ Kalara Zyɛm, nye elɛɛ nteme ó: «ǃƗ mʉr dɔm go si joʼo za nɛʼɛ, dweʼ nye nyɔmlʉ. ǃNye si ka joʼo dweh modibe nɛʼɛ, dweʼ nye monyʉla. ǃGo si sa no nɛʼɛ, go ekaʼle nye ma mo siʼe é lʉ.»

²¹ Mʉr ayi bir ó, ebebe, lé ntaŋa nye é nkul. Bɨn bɛɛ ntaŋa ga le é nkul, lé esa bɨsyɛɛla ndɨ é mbɨa ɛ.