Rôm 11 - Kálara Zyɛ̌m Edwán é mpʉ̌n

Zyɛm lé ejwɨʼ bwa b'Ɨzraɛl nkoo

¹ Ebe no, me edî ó nɛɛ: é mpʉ yé ndɨ no e, zê yé lé elɛʼle ó, Zyɛm a si myah kul bʉr ye ɛ? Hɨʼɨ, yé abe ba no! Me mʉr tɨ, me ó mpɛh Ɨzraɛl. Me a byɛl ó, é l'eveh mo Benjamin. Me ó mʉr mpoŋbʉr mo Abraham.

² Zyɛm a baamyah bʉr nye a bɛa lɛɛ ó, bé ó kul bʉr ye e. Zê bɨn bé agʉa sa bé a tile é Kalara Zyɛm, tiibe e Élie ɨ? Élie a be ó si pur bwa b'Ɨzraɛl é mih mo Zyɛm. Nye a lɛɛ ó:

³ «Da, bɨ sil jʉ ogwiha o mɨlɔb bo. Bé nteme, bɨ sil gbah bɨtaa mɨndwɛa ndɨ é l'efu e motwina mo e. Yé ekʉ ka liʼ ó njɨ me ome lé edu go. Bé mu lé esaa nteme ó, bé jʉ ó me!»

⁴ No ó, Zyɛm nyɛɛ a ka bɨha e nye nyá ɛ? Nye a lɛɛ e nye ó: «Hɨʼɨ, go abe go ome. Mɨ baʼle bʉr otɔɔyin tambɛl. Abe e lʉʉ dobo bé a kur moboo mɔɔ si, jwɨʼla e Baal.»

⁵ É mya bʉr ga wina wi, yé nteme, yé e ma dœh e bʉr Zyɛm a pɛh le ebaʼle ebe ncwɨncwɨa we e.

⁶ Nye a pɛh be ó, ebe ncwɨncwɨa we; nye a baapɛh be ebe mɨmpaŋ bɨsyɛɛla byɔɔ. Nkʉ nye a be ó be, pɛh be ebe bɨsyɛɛla byɔɔ nɛʼɛ, mpa ncwɨncwɨa a baaka be ncwɨncwɨa.

⁷ Yé be no nɛʼɛ, bɨna lɛɛ ga é yé? Bɨna lɛɛ ga ó, bwa b'Ɨzraɛl, bé a baabee sa bé a be lé esaa ɛ. Bʉr o Zyɛm a pɛh ɛ, bɛɛ, bé ó b'a bee. Baa bʉʉ bɨbɛh, nye a lɨl mɨlʉ myɔɔ ó, lɨl lɨlɨ.

⁸ Yé ó mpʉ yé ndɨ tila é Kalara Zyɛm ɨ. Yé ó tila ó: «Zyɛm a si sa be ó, bé jaʼ bɨdwo. Nye a si dible mih mɔɔ, ó bé l'ayi ka bee. Nye nteme a si dibe mogwal mɔɔ, ó bé l'ayi joʼo. Bé ó no, ze pyal é muh é dobo lɨ.»

⁹ David nteme a tile ó: «Edɨɨ e mode lɔɔ, lé diʼe lam ndɨ ó, bé óbil ɨ. Lé diʼe be lam atwii, ebɔʼ bé óbɨm é mɨleme e. Bé duma cyecye. Zyɛm nkʉʼ kab be bɨntɨʼa!

¹⁰ Zyɛm dibla be mih, ó bé l'ayi ka bee. Nye saʼ ó, mɨkoo myɔɔ, myé nyɛmlɨ é jɔʼ yiyɛh.»

¹¹ No ó, me ebâʼle dî nuu tia ó: «Zê oYʉden, bé a kʉ twe ó, cyecye ɛ?» Hɨʼɨ, yé abe ba no! Zyɛm a si dwe bʉr o byʉʉ bɨkul bɨfih tiʼ molu mo mpoʼ mɨmɛh é lɔb motie oYʉden, bé a ntaa ɛ. Nye a sa no ó, é l'efu le egba oYʉden egu é mɨleme.

¹² É jɔʼ bwa b'Ɨzraɛl, bé a ntaa motie mo Zyɛm ɨ, nye ntɔʼ ze liŋ syem waa okum e l'ogbaa é l'efu e bɨkul bɨfih. Zyɛm pa taare kaale bʉr o ndɨ abe oYʉden ɨ, okum we é jɔʼ oYʉden, bé a sa nye pyeh e, a dwɛʼra e ncwɨncwɨa nye ólɛʼle bɨna ga e boo nɔɔ, é jɔʼ oYʉden baa bɨbɛh, bé óbula ze nye ye e! Nye ólɛʼle bɨna ga e boo nɔɔ ncwɨncwɨa laŋle!

¹³ Banana, me mu ó lé eze lwib e bɨn, bʉr o ndɨ abe oYʉden ɨ, mɛm lʉmlʉ Zyɛm a lomlo bɨn ɨ. Me ekʉ bul doʼo e syɛɛ me lé esea é l'efu lɨn ɨ.

¹⁴ Me esa no ó, me nkʉʼ gba kul bʉr yam egu é mɨleme. Diŋa ó, bʉʉ bʉr o sama yih, bé óze bi tiʼ molu mo mpoʼ mɨmɛh é zi waa,

¹⁵ ebe, Zyɛm a pɨm oYʉden ó, lé ede mpʉn e bʉr o si nwaʼ nyiwɛh, é mbi ndɨ ó, nye nkʉʼ bula nʉa be pie tɨ. Yé ónwɨɨla ó e pɛ̀ha foo.

¹⁶ Mɨtom mʉr óto pɛʼ é peme ye e, myé edweŋɔ Zyɛm, myé ntɔʼ liŋa sa ndɨ ti ɨ. Mode mɨmɛh lé eliʼ é peme yaa ɛ, mé mu nteme ó, sa ndɨ ti ɨ. ǃBé si dwe Zyɛm mɨkaale mɨ lɨ nɛʼɛ, lɛɛ ó, mɨlɔɔ lé eduho é kubo lɨ yaa ɛ, myé ó ti, ebe, myé ejoʼo nteme ó e Zyɛm.

¹⁷ Mpoŋbʉr Ɨzraɛl, nye ó mpʉ lɨ olivye, yé a be-be e mɨlɔɔ myé a jala le esyɛh ɨ. Bé ze nʉa myʉʉ mɨlɔɔ mɨ lɨ olivye yé a pah é diʼ ɨ, ntɔʼ nɛr mye tɨʼ é kubo lɨ yaa. Jwɨʼ gwar e gwar yaa ó bɨn bé a nɛrɔ é kul oYʉden ɨ! Bɨn mu ó é zyɛŋa win boo nɔɔ lé egwɨm dira win nyɔm é mokana lé eduho é mɨkaale e.

¹⁸ É mpʉ yé ndɨ no e, asʉna ga é lɔb mɨlɔɔ mɨ lɨ mu si syɛhɔ ɛ. ǃBɨn si gwɨm doʼo nɛʼɛ, gʉŋa ga ó, ntʉʼ bɨn, mɨlɔɔ, ndɨ enkɛɛ mɨkaale. Mɨkaale ó ndɨ enkɛɛ mɨlɔɔ!

¹⁹ Go óbɛm bɛʼ ó: «Yé ó no: Zyɛm a syɛh myʉʉ mɨlɔɔ mɨnɨ ó, me dila mɨlɔɔ myaa, me diʼe nɛra é kubo lɨ.»

²⁰ Nɔɔɔ, gɨ kʉ gʉa elɛɛ! Bé a syɛhɔ é lɨ yaa ó, ebe, bé a baabe e buʼo. Bɨn bɛɛ, bé ódi é dia nɨ ebe taa buʼo bɨn lé ejyɛʼ boo Krɨst ɨ. Ankɛɛ ga monyʉl. Sa ndɨ ekʉ jala ɛ, yé ó, bɨn bilɨ ekɛn.

²¹ Zyɛm pa taare be, akamle e l'oYʉden, bʉr nye a taare komlo mpʉ mɨmpaŋ mɨlɔɔ mɨ lɨ ɨ, a dwɛʼra e bɨn! Nye aŋa kamle e bɨn.

²² Mbe ga: é mpʉʼ ó Zyɛm ndɨ elɛʼle mpwaʼ ncwɨncwɨa we e! Nye nteme lé edi, adihbe bʉr o b'a lɨʼa omyacyɛŋ é nkɨŋlɨ ɨ. Nye ekʉ lɛʼle ncwɨncwɨa we ó, gwɔɔ. ǃGo si bene lé eliʼ é dia ncwɨncwɨa mo Zyɛm nɛʼɛ, gʉŋa ó, nye nteme ókʉ syɛh go mpʉ lɔɔ lɨ, e ncɨr é leme.

²³ To kœb ó, ǃɨ oYʉden si bir lɔb abuʼla wɔɔ nɛʼɛ, Zyɛm óbâʼle cyel be é bɨcye bɨ efoʼ byɔɔ, ebe, nye e nkul ebâʼle nɛr be é bɨcye byɔɔ byaa, bé di.

²⁴ Bɨn bʉr o ndɨ abe oYʉden ɨ, bɨn bé ó mpʉ mɨlɔɔ mɨ lɨ olivye yé a pah é diʼ ɨ. Zyɛm ze to syɛh guu lɔɔ tɨ, ze to nɛr we é mpaŋ lɨ olivye. Zyɛm pa taare nɛr lɔɔ lɨ diʼ é mpaŋ lɨ, a dwɛʼra e mɨlɔɔ myé a syɛhɔ é lɨ yaa ɛ! Nye ókʉ nɛr mye tɨ, myé bana nara.

Zyɛm, nye ecwɨa e bʉr o ndɨ abe oYʉden ɨ, bé e l'oYʉden

²⁵ Obɨɔ ga bam aa! Me ekpɛl ó, bɨn gʉŋa lwib odim yiʼ é kpɛhla. Bɨn bé amu jwɨʼ ó, bɨn e bɨn ó ndɨ mɨcɨcyoo. Lwib odim yaa, yé ó: bʉʉ bʉr é bwa b'Ɨzraɛl, bé e mɨlʉ ndɨ é bul lele lé ejoʼo e. Mɨlʉ myɔɔ, myé ódi e molele maa ó, to pyal é jɔʼ tolɔɔ obuʼla ndɨ abe oYʉden ɨ, bé ókumo bim Zyɛm a bɛa tiʼe é leme we ó, yé ójala ɛ.

²⁶ É mbi wiʼ ó bwa b'Ɨzraɛl bɨbɛh, bé óbi tiʼ molu mo mpoʼ mɨmɛh ɛ. Yé ó mpʉ yé ndɨ tila é Kalara Zyɛm ɨ. Yé ó tila ó: «Mʉr ósyɛb bɨna ga é l'ebebe e, óduho ó Sion. Nye ódib bwa onta mo Yakɔb zi egwɨma ebɨh bé lé esa Zyɛm ɨ.»

²⁷ Yé ó tila nteme ó: «Me óde mpʉn e be no ó, é jɔʼ me ópɛʼ bɨbaa bibyɛh me a niʼe é lɔb mɨsyem myɔɔ ɛ.»

²⁸ É nko paʼ mo Mbɨambɨa Lɔɔ wɛɛ, oYʉden, bé mu ó bʉr o dɔm mo Zyɛm. Syɛɛla yɔɔ yaa, yé ó, e nyɔm é nko paʼ win. É nko paʼ mo Zyɛm nyɛɛ, bé dina ó mɨpɛha. Nye eto dolo lé ebul kpɛl be é l'efu e bɨmpam byɔɔ,

²⁹ ebe, é jɔʼ nye mu si tiʼe é leme we ó, nye jebe ó mʉr fih mʉr kɛ̀l, le edwe nye mɨndwɛa mye e, nye aŋa ka siila mɨtiʼa mɨ efoʼ myaa pie tɨ.

³⁰ Bɨn, bʉr o ndɨ abe oYʉden ɨ, bɨn bé a si sa Zyɛm ebɨh é molu pihe. Banana, mpʉ oYʉden bɛɛ mu si sa nye ebɨh ɨ, Zyɛm, nyi ka ze jwɨʼ bɨn nkoo.

³¹ Mpʉ oYʉden, bé a sa Zyɛm ebɨh ɨ, nye a fuo bir ó, bé saʼ le, to pyal é jɔʼ nye ójwɨʼ be nteme nkoo, mbi nye a jwɨʼ bɨn nya ɛ.

³² No ó, Zyɛm a sa ó, bʉr bɨbɛh diʼe molʉa, duho é l'ebɨh lɔɔ é l'efu ó, nye jwɨʼɨ bɨbɛh nkoo.

³³ A ndwe e l'okum mo Zyɛm ee! Ocyoo we e ngwɨa we, byé abe e l'odumo. Zé ndɨ e nkul egʉa mɨtiʼa mɨ leme we ɛ? Zé ndɨ e nkul egʉa bɨsyɛɛla nye lé esa ɛ?

³⁴ Yé ó tila ó: «Zé lé egʉa mɨpɛhla mo Da ɛ? Zé ndɨ e nkul edwe nye motɨɨ ɛ?» Yé ó tila nteme ó:

³⁵ «Zé a pa dwe nye mɨndwɛa mɨ kʉlʉ, ó nye bula bi myɛna pie tɨʼ ɛ?»

³⁶ Yé abe e mʉr, ebe, Zyɛm ó b'a cye bɨsa bibyɛh. Byé a kwɨmlɨ nteme ó, dumo e nye. Sa yiyɛh, yé tɨʼ ó, é l'efu le. Bɨna gumla ga nye njʉmdia e njʉmdia. Amɛn.