Rôm 10 - Kálara Zyɛ̌m Edwán é mpʉ̌n

¹ Obɨɔ ga bam aa! Gwɨma leme wam, wé ó oYʉden nkʉʼ bi tiʼ molu mo mpoʼ mɨmɛh. Yé nteme ó ndɨ mɨnjwɨʼla myam.

² Me ekʉ boʼlo, tiibe e be ó, mpaŋ gwɨma yɔɔ, yé ó, bé bul du Zyɛm. Bé agʉa yɛɛ mpaŋ zi bé lé ejala le edu ɨ.

³ É mpʉ bé a be ó si jeʼe mbi Zyɛm lé edwe bʉr mokebe e, bé a kʉ ka saa ó, njɨ bé biʼe mokebe é lɔb ocɨcyel wɔɔ, benɔ lé efil bé bʉr o tɨʼ si e Zyɛm ó, nye nkʉʼ dwe be mokebe edwɛna.

⁴ Me elwib no ó, ebe, Krɨst a si gba nkati é zi edu motie. Bʉr, bé aŋa ka bi mokebe lé edu zi waa. Bʉr o ndɨ ejyɛʼ taa buʼo yɔɔ boo Zyɛm ɨ, bé ó ndɨ ebi mokebe boo nye.

Zyɛm, nye etiʼ ó, baa bɨbɛh lé ejyɛʼ taa buʼo yɔɔ boo Yesʉs ɨ

⁵ Moyiz a tile ó, ebi mokebe é mih mo Zyɛm, lé ó mʉr duʼo motie me. Nye ó: «Waa nyiwɛh lé edu motie e, nye óbi tiʼ molu mo mpoʼ mɨmɛh ó, ebe mbi nye lé edu motie maa ɛ.»

⁶ To kœb ó, yé ó e zi ebi mokebe mofih é mih mo Zyɛm. Bʉr o ndɨ ejyɛʼ taa buʼo yɔɔ boo nye e, bé ó ndɨ ecwɨɨ tɨ, ntɔʼ bi mokebe maa, é mpʉ yé ndɨ tila ɛ. Bé a tile é Kalara Zyɛm ó: «Adî é leme go tʉŋlʉ ó: “Zé óto é jobo kʉ?”» (No yé elɛɛ ó: mʉr ayi pahle ó, nuu mʉr óto é jobo kʉ, lé eto baŋle Krɨst, ó nye fula.)

⁷ Bé a tile nteme ó: «Daʼ dî é leme go tʉŋlʉ ó: “Zé ófulo, to pyal é Bɨ-siʼe?”» (No yé elɛɛ ó, mʉr ayi pahle ó, nuu mʉr óka to kœb Krɨst kwar odwè, ntɔʼ bula e nye.)

⁸ Yé ó tila é Kalara Zyɛm ó: «Lɔɔ Zyɛm, wé ó kunokuno e go. Wé ó é nʉm go ndwe e leme go tʉŋlʉ.» Mɨlɔb mɨmpwar myaa, myé ó myaa bɨh lé eto le etuno, myaa bʉr bé lé ejala le ebuʼla ɛ.

⁹ Yé ó tila é Kalara Zyɛm ó: go óbi tiʼ molu mo mpoʼ mɨmɛh nkʉ go ólɛɛ é nʉm go ó: «Yesʉs ó ndɨ Njwɨɨ» le ebuʼla é leme go tʉŋlʉ ó, Zyɛm a si pɛ̀h nye é foo,

¹⁰ ebe, leme go, wé ó fum go jyɛʼɛ taa buʼo yo boo Zyɛm ɨ, nye ntɔʼ dwe go mokebe é mih me. No ó, ǃgo si mɛʼle ocyecye, lé elɛɛ ó: «Yesʉs ó ndɨ Njwɨɨ» nɛʼɛ, go óbi tiʼ molu mo mpoʼ mɨmɛh.

¹¹ Yé ó mpʉ yé ndɨ tila é Kalara Zyɛm ɨ. Yé ó tila ó: «Mʉr nyiwɛh ójyɛʼ taa buʼo ye boo Zyɛm ɨ, nye aŋa sɔma.»

¹² Ebe, mbɛʼ, wé abe paʼra oYʉden bé e bʉr o ndɨ abe oYʉden ɨ. Bɨbɛh, bé ó e njwɨʼa ngwar lé elɛʼle ncwɨncwɨa boo baa bɨbɛh lé ejwɨʼla e nye e.

¹³ Yé ó mpʉ yé ndɨ tila é Kalara Zyɛm ɨ. Yé ó tila ó: «Mʉr nyiwɛh ósa mɨnjwɨʼla é die mo Da ɛ, nye óbi tiʼ molu mo mpoʼ mɨmɛh.»

¹⁴ Sa gwar, bé e nkul ejwɨʼla e waa bé a baajyɛʼ taa buʼo yɔɔ boo nye e, wáa mbi? No ó, bé e nkul ejyɛʼ taa buʼo yɔɔ boo mʉr bé a baajoʼo die le e, wáa mbi? Bé ó e nkul ejoʼo die laa, abe e mʉr lɛɛ be la nyá ɛ?

¹⁵ Yé ndɨ e nkul esa ó, olɛa o lɔɔ Zyɛm beʼ, nkʉ Zyɛm, nye alomo be e? Yé ó mpʉ yé ndɨ tila é Kalara Zyɛm ɨ. Yé ó tila ó: «A mbɨa lé ebee bʉr o ndɨ eze le etuno Mbɨambɨa Lɔɔ ee!»

¹⁶ É jɔʼ oYʉden, bé a joʼo Mbɨambɨa Lɔɔ ɛ, ntʉʼ bɨbɛh, bé a mɛʼle we. Ngwiha mɨlɔb Ezayi nye mʉr tɨʼ a lɛɛ ó: «Da, zé a buʼla lɔɔ go bɨh bé a lɛɛ be e?»

¹⁷ No ó, gʉŋa ga ó, é jɔʼ mʉr lé ejyɛʼ taa buʼo ye boo Krɨst ɨ, buʼo ye, yé eduho ó, é njoʼa nye a taare joʼo lɔɔ waa ɛ. Njoʼa we waa, wé eduho ó, é l'ekan bé lé elɛɛ nye, tiibe e Krɨst ɨ.

¹⁸ No ó, me edî ó nɛɛ: «Zê oYʉden bɛɛ, bé a baajoʼo lɔɔ waa ɛ?» Ndɨ, bé a be ó si kʉ gʉa joʼo we! Yé ó njɨ, mpʉ bé a tile é Kalara Zyɛm ɨ. Yé ó tila ó: «Bʉr, bé a be ó si to le esa tuno waa gumo yiyɛh; motwii mɔɔ si jwɨ̂ʼ é si nwaʼ nyiwɛh, to pyal é modumo mo si mɨmɛh.»

¹⁹ No ó, me ebâʼle dî ó: «Zê bwa b'Ɨzraɛl, bé a baagʉa sa bé a joʼo e?» Ndɨ, bé a be yɛɛ ó, si kʉ gʉa ye. Moyiz a bɛa lɛɛ ó: «Zyɛm, nye elɛɛ ó: “Me ósa bɨn é mbi ndɨ ó, bɨn saʼ egu e bʉr o bɨkul bɨfih. Me ógba empime é mɨleme min, cwɨɨ é zi bʉr o ndɨ é lal mɨmiʼ ɨ.”»

²⁰ Pie tɨ, ngwiha mɨlɔb Ezayi a bana kʉ lɛɛ ó: «Zyɛm, nye elɛɛ ó: “Bʉr o b'a baasaa me e, bɛɛ ó b'a bee me. Me a si lɛʼle me mʉr tɨʼ é pono boo bʉr o b'a baagwɨm yʉʉ sɔʼɔ e me e.”»

²¹ É paʼ bwa b'Ɨzraɛl bɛɛ, Zyɛm, nye elwib, tiibe e be ó: «Me a be ó si syɛm mobo mam, tɔɔ moho ntinɨ, lé ejebe bʉr bam. Bɛɛ kʉ ka sa ó njɨ esa me ebɨh. Sa yiyɛh me lé elɛɛ be e, bɛɛ kʉ tɨ-tɨ tɨʼe.»