Rôm 1 - Kálara Zyɛ̌m Edwán é mpʉ̌n

Moswɨhlɨ

¹ Mɛm Pol, syɛl mosa mo Yesʉs-Krɨst ó lé etile bɨn kalara nwa. Zyɛm a jebe me ó, me diʼe lʉmlʉ we, le ecyel me é syɛɛ ó, me toʼ le elɛɛ Mbɨambɨa Lɔɔ we.

² Mbɨambɨa Lɔɔ waa, Zyɛm a si bɛa kɛʼ é zi ogwiha o mɨlɔb ó, nye óntɨh bɨna ga wa. Nkɛʼ waa, nye ó tila é Kalara Zyɛm.

³ Mbɨambɨa Lɔɔ waa, wé etiibe ó e Mwan we. É nko paʼ mbyɛla we, nye a be ó mʉr mpoŋbʉr mo David.

⁴ É nko paʼ mo Sisim we ndɨ ti ɨ, nye a si jwɨrɔ ó «Mwan mo Zyɛm» e bwaʼbwaʼ nkul ebe pɛ̀ha foo: Tî ga wina Yesʉs-Krɨst.

⁵ Zyɛm a si lɛʼle me ncwɨncwɨa we le ecyel me é dia lʉmlʉ we ó, dumo e nye é l'efu ó, byʉʉ bɨkul bibyɛh, byé jyɛʼɛ taa buʼo yɔɔ boo nye, le esa nye mojoʼo. Nye a sa me syɛɛla yaa ó, é l'efu le edwe die e Mwan we kum.

⁶ Bɨn nteme, bé ó é bʉr baa, bɨn bʉr o b'a jebɔ, dumo e Yesʉs-Krɨst ɨ.

⁷ Me etile ó, bʉr bɨbɛh ndɨ Rom, baa Zyɛm a bul kpɛl ndwe le epɛh ó, bé diʼe mɨsaŋ mɨ bʉr be e. Mocyɛʼ mo mpom e motala mo Zyɛm Sɔŋ ga wina bé e Da Yesʉs-Krɨst, mé swɨŋɨ é bɨn.

Pol lé egwɨm to bee bʉr o Rom

⁸ Sa efoʼ, me edwe Zyɛm Sɔŋ wam ekiba é zyɛŋa wih boo Yesʉs-Krɨst é lɔb win, ebe, é si nwaʼ nyiwɛh, bʉr bé ejoʼo mɨlɔɔ min, mpʉ bɨn lé ejyɛʼ taa buʼo yin boo Yesʉs-Krɨst ɨ.

⁹ É jɔʼ yiyɛh, me ejwɨʼla e nye é l'efu lɨn. Zyɛm nye mʉr tɨ, nye egʉa ó, me elɛɛ ó ocyecye. Nye waa ó me lé esea syɛɛ ye e leme wam wiwɛh ɛ. Me esea ye ó, é zi elɛɛ Mbɨambɨa Lɔɔ lé etiibe e Mwan we e.

¹⁰ Me ejwɨʼla e nye é jɔʼ yiyɛh ó, nye dweʼ me jɔʼ eze bee bɨn, lé edu bɨgwɨma bɨ leme we,

¹¹ ebe, me ejoʼo dweh ebee bɨn é l'efu le eliʼe bɨn e byʉʉ bɨntɔɔ Mbɨambɨa Sisim lé enol bɨna ga ɛ, ó bɨn nʉŋa pim é buʼo.

¹² Sa me lé elɛɛ ɛ, yé ó, bɨna beʼ ga, baʼ fuʼo ba, baʼ fuʼo ba, é buʼo. Buʼo bɨn ndɨ e ye boo Krɨst ɨ, le yaa yam, byé ó ngo gba bɨna ga nkul é monyʉl.

¹³ Obɨɔ ga bam aa! Me egwɨm ó, bɨn gʉŋa ó, é bɨjɔʼ é buobuo, me a be ó lé ejwɨʼ ó, me óze bee bɨn. Sa gwar, me a si bul bɔma e mokɔbla. Me óze yɛɛ é l'efu le eze sa syɛɛ-Zyɛm é l'esama lɨn, yé guma nteme mpumo bɨn ye é mpʉ yi gumo mpumo é mɨlal mɨ bʉr o ndɨ abe oYʉden ɨ, ó me nkʉʼ to é mɨngol.

¹⁴ Empomo e syɛɛ lam, lé ó, me lɛŋɨ Mbɨambɨa Lɔɔ boo bʉr o lwib grɛk bé e bʉr o bɨlwib bɨfih. Me lɛŋɨ we boo ogwɨa be okalara, ndwe e mɨmiʼ.

¹⁵ Ebe no, me egwɨm ó, me lɛŋɨ nteme we bɨn ye, bɨn bʉr o Rom.

Nkul ndɨ é Mbɨambɨa Lɔɔ ɛ

¹⁶ Me abe e nkul ejoʼo ba fwon lé elɛɛ Mbɨambɨa Lɔɔ, ebe, wé ó nkul mo Zyɛm é l'efu le etiʼ mʉr nyiwɛh óbuʼla we e, taare é l'oYʉden, to pyal é baa ndɨ abe oYʉden ɨ.

¹⁷ Mbɨambɨa Lɔɔ waa, wé elɛʼle mpʉ bʉr lé ebi mokebe é mih mo Zyɛm ɨ. Mokebe maa, mé edweŋɔ ó, njɨ ebe taa buʼo mʉr lé ejyɛʼ boo Krɨst ɨ, taare é l'etɔɔrʉ, to pyal é l'efehle. Yé ó mpʉ yé ndɨ tila é Kalara Zyɛm ɨ. Yé ó tila ó: «Mʉr ndɨ e tiʼ molu mo mpoʼ mɨmɛh ɛ, nye ó njɨ waa a bi mokebe é mih mo Zyɛm ebe taa buʼo nye a jyɛʼ boo nye e.»

Mʉr nyiwɛh, nye ó e mɨsyem

¹⁸ Zyɛm, nyi lɛʼle bɨna ga mpʉ nye lé ekpaa empime é lɔb ga wina ɛ. Nye esa no ó, bʉr é sʉlʉlʉ, duho é jobo kʉ. Bɨna bé esa ga nye ebɨh ndwe e bɨsyɛɛla bɨ ebebe bibyɛh. Bɨna bé elwimla ga e l'ocyecye, du-du njɨ bɨsyɛɛla bɨ ozyɛhozyɛh.

¹⁹ Sa lé esa ó, mʉr gʉŋa Zyɛm ɨ, yé enyin bʉr bɨbɛh é pono. Bʉr bɨbɛh, bé ebee sa yaa ó, ebe, Zyɛm nye mʉr tɨʼ a si lɛʼle be ya.

²⁰ Taare é jɔʼ Zyɛm a cye sa yiyɛh ɛ, njwɨr we ndɨ abeɔ ɛ (no, yé ó nkul we ndɨ njʉmdia e njʉmdia ɛ, ndwe e kwɨmla we ndɨ anwɨɨla e waa mo mɨcyea bɨsɔʼɔ ɛ), wé enyin bʉr é mih é pono, é jɔʼ bɨna lé egʉa dwɛʼ ga le epahle bɨsyɛɛla bye e. No ó, bʉr o ndɨ esa Zyɛm mongan ɨ, bé aka be e nkar é mih me.

²¹ Dam be ó, bé a be ó si kʉ gʉa ó, Zyɛm, nye ó tɨ, bé a baadwiibɨ nye mpʉ yé a jala ɛ, nkʉ dwe nye ekiba é lɔb bɨsyɛɛla bye. Bé a kʉ ka pahle sɔʼɔ ó njɨ bɨsa byaa ndɨ abe e nyɔm ɨ. Bé ze lihba ó, mɨmiʼ.

²² Bé dam doʼo e l'ocyoo wɔɔ, bé eka to fuʼla ó bɨgʉ.

²³ Laa ó, bé dwiibɨ Zyɛm, waa ndɨ abe e nkul edwè e, bé a fuo mɛʼle yɛɛ ó, bé dwiibɨ njɨ bɨbaŋabaŋa bɨdweʼle ndɨ mɨkpɛʼa ɛ. Bé a kpaʼ bɨsa byaa ó, lé edweʼle bʉr o ndɨ edwè-dwè e, bé e bɨnɔn, otir o mopɔrʉ, otir o motɔrʉ, nkʉ onyʉa.

²⁴ Ebe no ó Zyɛm a fuo ka bir ó, bé loŋla bɨgwɨma bɨ nyʉl bɨpuno wɔɔ, ndwe le elama fwon lé edu njɨ bɨjyɛʼ byɔɔ. Tina, yé ó, bé a dɨ sɛɛla bɨsa bɨ fwon byaa paʼra wɔɔ!

²⁵ Bé a si bene lé ebuʼla ocyecye mo Zyɛm, ka kpɛl dwiibɨ njɨ ozyɛm o mpʉl. Laa ó, bé dweʼ Zyɛm Kwihbʉr kum, bé a kʉ ka mɛʼle ó njɨ bé dwiibɨ bɨsa nyɛɛ a cye e. Kum diʼe e Zyɛm waa, njʉmdia e njʉmdia. Amɛn!

²⁶ Ebe no ó Zyɛm a fuo ka bir ó, bé saʼ bɨsyɛɛla lé eloŋlo bɨgwɨma bɨ nyʉl bɨpuno wɔɔ ɛ, lé esa ó, bé lama fwon. Bʉba bɛɛ lé ebene lé esyɛŋa e bʉrʉm é bɨduo, mpʉ Zyɛm a cye be ó, bé diʼe sa ɛ. Laa ó, bé saʼ mpaŋ syɛɛla yaa, bé a kʉ ka gba monyʉl mɔɔ ó njɨ lé ekœbla paʼra wɔɔ.

²⁷ Bʉrʉm, bé esa nteme no, jwɨʼ gwar yaa. Bé ebene lé eka syɛŋa duo e bʉba mpʉ bé a cyeŋɔ ó, bé dɨʼe sa ɛ. Laa ó, bé saʼ no, bé a kʉ ka joʼo dweh ó njɨ bé syɛŋa duo e bʉʉ bʉrʉm! Bʉrʉm e bʉrʉm, bé elama fwon lé ebana tɛbla paʼra wɔɔ. Bé edaʼre bɨntɨʼa é monyʉl mɔɔ. Bɨntɨʼa byaa, byé ó ndɨ myɛna bé lé ebi ɨ, duho é syem bé lé esa ɛ.

²⁸ Bʉr baa, bé a baabee ó, yé ejala ó, bé gʉŋa Zyɛm. No ó Zyɛm a fuo ka bir be ó, pɨʼ wɔɔ beʼ ntul ɨ. Nye ebir be ó, bé saʼ bɨsa bɨ fwon byaa ndɨ ajala ɛ.

²⁹ Bé efwahle bɨsyɛɛla bibyɛh ndɨ ozyɛhozyɛh ɛ. Byé ó: jeele e laŋ, bɨgwɨma, bɨn, zii, ejwɨɨ e bʉr. Bé esa mpɔʼa monkɔm, bé e bɨkʉʉŋʉ e tíila ndwe e bɨbuʼa,

³⁰ ka kɛl movoʼ. Bé nteme, bé ebene Zyɛm, le epyeh bʉr. Bé e nkɛa nyʉl, ndwe e jaale. Bé ekʉ ka saa ó njɨ mopɨʼ mo ekuhlo mʉʉ mobebe mofih. Bé ajoʼo obyɛl bɔɔ.

³¹ Bé ó mɨmiʼ. Bé adira monkɛʼ mɔɔ. Bé e cere é mɨleme. Bé abe e njwɨʼa-nkoo.

³² Dam be ó, bʉr baa, bé egʉa ó, Zyɛm a lɛɛ ó, bʉr bɨbɛh ndɨ esa mɨmbi mɨ ebebe myaa ɛ, bé edaʼre ó efie é monyʉl mɔɔ, bɛɛ, bé ó njɨ lé eto dolo lé esa-sa bɨsyɛɛla byaa. Yé abe njɨ no, yé ome. É jɔʼ bé lé ebee bʉʉ bʉr lé esa syem ɨ, bé ekʉ mɛʼle bɨsyɛɛla byɔɔ le esoʼlo be ó, bé toʼ dolo lé esa bye, to-to ó toʼ.