Filemɔŋ 1 - Kálara Zyɛ̌m Edwán é mpʉ̌n

Moswɨhlɨ

¹ Mɛm Pol, mbʉʼ mo Yesʉs-Krɨst ó lé etile go kalara nwa, bɨh e Timote, mɨɔ wina. Bɨh bé etile ó, gwɔɔ mɨɔ kpɛl wih Filemɔŋ, bɨna ndɨ é l'empomo e syɛɛ egwar ɨ.

² Bɨh bé etile nteme ó, kɛl ga wina Apia, ndwe e Arkipɔs, bʉr o bɨna ga e boo nɔɔ lé elwimla é lɔb buʼo e, ndwe e bʉr o mbɛr Zyɛm ndɨ eze gwɨhla é jɔʼ yiyɛh é mbɛr go e.

³ Mocyɛʼ mo mpom le motala mo Zyɛm Sɔŋ ga wina bé e Da Yesʉs-Krɨst, mé swɨŋɨ é bɨn.

Kpɛl ndwe e buʼo mo Filemɔŋ

⁴ É jɔʼ yiyɛh me lé esa Zyɛm Sɔŋ wam mɨnjwɨʼla é l'efu lo e, me edwe nye ekiba é lɔb go,

⁵ ebe, me ejoʼo-joʼo bé lé elɛɛ é lɔb go ó, go ekʉ jyɛʼ taa buʼo yo boo Da Yesʉs, le ekpɛl mɨsaŋ mɨ bʉr be bɨbɛh.

⁶ Mpʉ bɨna ndɨ é zyɛŋa wina ɛ, bɨna mu ó e buʼo gwar. Bɨna mu ó lé egʉa nteme bɨsa bɨ embɨa bibyɛh bɨna ndɨ e bye é zyɛŋa wina boo Krɨst ɨ. No ó, zyɛŋa-mɨleme waa, nye ejala le egwɨe le eto dolo.

⁷ Mɨɔ wam, go a si bul gba me bɨsʉhʉ é leme é jɔʼ me a bee mpʉ go lé ecwɨa e mɨsaŋ mɨ bʉr mo Zyɛm ɨ! Yé nteme, yé a si bul gba mye nkul é monyʉl.

Motɨɨ mo Pol é lɔb mo Onezimos

⁸ Me óbɛm lɛɛ e go ó: «Dɨʼe sa sa lé ejala ɛ,» ebe, Krɨst a si dwe me leme elwib é kpɛŋlɛm, abaawe sɔʼɔ e mʉr.

⁹ Dam be no, me alwib e go é mbi waa, ebe, me ekpɛl go. Me ejwɨʼla e go ó, jwɨʼla. Me ó lé elwib e go, mɛm Pol, ndɨ tamamʉr e go e. Me ó bananaʼ é mbʉʼ ó, é lɔb buʼo lé etiibe e Yesʉs-Krɨst ɨ.

¹⁰ Me ejwɨʼla e go ó, é lɔb mo mwan wam Onezimos. Ngbaa me mu wâʼ é mbʉʼ, mɨ bya nye é zi elɛɛ nye Mbɨambɨa Lɔɔ.

¹¹ Molu pihe, nye a baabe go e nyɔm é guu paʼ. Banana, nye mu ó e nyɔm é nko paʼ wina, bɨna e go bɨbɛh.

¹² Mɨ lomo nye gʉʼ go ye. Yé ó mpʉ me ndɨ e nkul entɨh go bumo leme yam ɨ!

¹³ Nkʉ go a be ó be, mɛʼle ó, bɨh diʼe wâʼ nɛʼɛ, mpa me a bir ó, bɨh e nɔɔ diʼe sama. Nye a si ngbaa sea e me é dila yo cye yiyɛh me dina é mbɛr mɨmbʉʼ é lɔb Mbɨambɨa Lɔɔ ɛ.

¹⁴ Sa gwar, me agwɨm sa no, to pyal é jɔʼ go mʉr tɨʼ ómɛʼle e. Me akpɛl yɨm go e nkul ó, go saʼ me embɨa laa. Me ekʉ ka gwɨm sɔʼɔ ó njɨ go kɛmɨ me ebe kpɛl yo.

¹⁵ Yʉʉ jɔʼ, Zyɛm ó b'a sa ó, Onezimos toʼ, to di é guu paʼ, molu abuo, ó nye nkʉʼ bula go ye, bɨn e nɔɔ nkʉʼ di gumo gwar é jɔʼ yiyɛh,

¹⁶ ebe, banana, nye aka be go njɨ elʉa. Nye entaa elʉa; nye mu ó mɨɔ kpɛl wina, kʉ bʉl be é paʼ wam! Mɛm pa taare kpɛl nye é buobuo, a dwɛʼra e go! Go óbul kpɛl nye, laa me, ebe, nye ó waa go, bula be nteme mɨɔ go é zyɛŋa ga wina boo Da Yesʉs.

¹⁷ Ebe no, yé be ó, go emɛʼle ó, bɨna bé ó e mpaʼra nɛʼɛ, dɨʼe bɨlan e nye mpʉ go ngbaa bɨlan e me mʉr tɨʼ ɨ.

¹⁸ Yé be ó, nye a si sa go ebebe nɛʼɛ, lɛŋɨ me, me nkʉʼ jɛna mobyaʼ me. Yé be ó, nye ó go e mpɔla nɛʼɛ, me ójɛna mpɔla we waa.

¹⁹ Mɛm Pol, me etile mokan maʼ ó e mbo wam me mʉr tɨ: me ójɛna nye nya! (Ajɨha ó, go nteme, go ó me e mpɔla. No, yé ó tiʼ yo!)

²⁰ No ó, mɨɔ wam, me ejwɨʼla e go é zyɛŋa ga wina boo Tî wina ó, go saʼ leme wam ó, wé fila si.

²¹ Me etile go kalara nwaʼ ó, mɛm lé egʉa ó, go ósa sa me lé ejɨ, laa bim me lé elɛɛ ɛ.

²² Me egwɨm ó, go komla me tiʼe mbɛr é jɔʼ Onezimos ópyal gʉʼ ɨ, ebe, me ebuʼla ó, Zyɛm ólɛʼle bɨna ncwɨncwɨa é zi mɨnjwɨʼla min: nye ódwe me jɔʼ eze gʉʼ bɨn ye!

Moswɨhlɨ

²³ Epafras, mʉr nwan yam bɨh e nɔɔ ndɨ é mbʉʼ ebe Yesʉs-Krɨst ɨ, nye esoho go.

²⁴ Markus bé e Aristarkus e Demas ndwe e Lʉkas nteme, bé esoho go. Bɨbɛh, bé ó bʉr o nwan yam bɨh e boo nɔɔ ndɨ é l'empomo e syɛɛ egwar ɨ.

²⁵ Mocyɛʼ mo mpom mo Da Yesʉs-Krɨst, mé swɨŋɨ é sisim win.