Mɨngwiha 9 - Kálara Zyɛ̌m Edwán é mpʉ̌n

¹ Engles tɛn ntɔʼ lʉo sebe we. Me ntɔʼ bee atwitwɛn lé etɨl, duho é jobo kʉ, duma si. Atwitwɛn waa a si dweŋɔ bɨdiba, ó nye dibɨ mongʉŋ lé epɨr nʉm Bɨ-siʼe e.

² Nye ntɔʼ dib ye. Jɔʼ bɨ yaa, yé a be, yé mu mbeʼ e, me ntɔʼ bee duulʉ lé epyal tɨ, duulʉ yaa mpʉ duulʉ lé epyal é duro e molul ɨ. Yé ntɔʼ dwiŋle dobo e l'ejyoo.

³ Mpʉ yé a pyal tɨʼ ɨ, byʉʉ bɨsɔʼɔ nteme ze pʉʼa é bɨ, bɨsɔʼɔ mpʉ baaceme-bɨka. Baaceme-bɨka baa zeŋɔ kaʼ si. Bé a be ó si dweŋɔ nkul mojwɨ̀ʼa ndɨ ó, bé dɨʼe lʉ bʉr mpʉ bɨkʉʼlɨl lé elʉ-lʉ be e.

⁴ Sa gwar, bé a baadweŋɔ nkul elɨr bɨka, nkʉ bɨlɨ, nkʉ mompœʼ. Bé a kʉ ka lʉ-lʉ ó njɨ bʉr. Abe nteme bʉr bɨbɛh, njɨ baa b'a baagbaŋɔ mojwɨʼ mo Zyɛm é bɨnceʼe e.

⁵ Etie, lé a be tɨʼ ó, mʉr bé ólʉ ɨ, nye l'adwè. Bé ólʉ-lʉ be no ó, tɔɔ ongɔn otɛn. Bé ósia e bɨsa byaa mpʉ bʉr lé esia e mogumba é jɔʼ bɨkʉʼlɨl lé elʉ be e.

⁶ É molu maa, bʉr, bé ósaa efie, é saa saa, abeɔ. Bé ókpɛl ó, bé dwèʼ, efie lɛɛ kpɛɛ-kpɛɛ be kpɛŋɨ.

⁷ No ó, baaceme-bɨka baa, bé a dɨ nwɨɨla ó e bɨkabala bɨ dɔm. É mɨlʉ myɔɔ, bé a be lé ebwar-bwar byʉʉ bɨsɔʼɔ, sa ndɨ enwɨɨla e mopʉʼlʉ mo gol ɨ. Mompom mɔɔ, mé a be ó lé enwɨɨla ó e mompom mo bʉr.

⁸ É mɨlʉ myɔɔ, bé a be ó e mpuo mpʉ mpuo bʉba. Moje mɔɔ, mé a be ó mpʉ maa mo ngbampwɨɨ.

⁹ Bé a be ó e byʉʉ bɨsɔʼɔ é mompɨr mpʉ mompor bɨnkoho mo dɔm. Mompaba mɔɔ, mé a dùo-dùo ó, mpʉ duu bɨkaliʼ bɨ dɔm lé edaʼrɔ e buobuo bɨkabala ɛ.

¹⁰ Bé a be ó e mɨkʉn mpʉ bɨbamlwal. Bé nteme, bé a lʉ-lʉ ó mpʉ bye. Mɨkʉn myɔɔ myaa, myé ó lé edwe be nkul elʉ bʉr, tɔɔ ongɔn otɛn.

¹¹ Tî wɔɔ, nye ó engles ndɨ e nkul mojwɨ̀ʼa é Bɨ-siʼe e. Bé ejebe nye é lwib ebrœ ó, Abadɔn. Yé be ó é lwib grɛk yɛɛ nɛʼɛ, lɛɛ ó, yé ó Apolion.

¹² Sa tuu efoʼ, yé mu ó si laa. Byʉʉ bɨsa bɨ nkoo bɨba, byé dina ó dolo.

¹³ Engles tobo ze lʉo sebe we. No ó, me ze joʼo twii lé eduho é bɨntoo bɨnâ bɨ taa mɨndwɛa ɛ. (Taa mɨndwɛa yaa, yé a saŋɔ ó e gol. Nye a be ó é l'empom e dia taʼa mo Zyɛm.)

¹⁴ Twii waa a lɛɛ engles tobo ó: «Toʼ, to tii beengles onâ mo Satan bé a kaʼɔ é pɨn dibe nɨnɨ bé lé ejebe ó, Efrat ɨ.»

¹⁵ Beengles onâ baa, bé ó baa Zyɛm a bɛa cye ó, bé sea nye syɛɛ yaa é mbu waa, é ngɔn waa, é moho ngwar waa nteme, é l'ewala egwar laa nteme. Nye a cye be ó, bé toʼ, to jʉ bʉr. Nkɔb bʉr ngwar é monkɔb molɛl, bé ójʉŋɔ. No ó, njoʼa engles a joʼo lɔɔ waa ɛ, nye ntɔʼ to tii be.

¹⁶ Me a si bee buobuo bɨzima é bɨkabala kʉ. Bé a si lɛɛ me bim bɨzima byé a be e. Byé a be ó, bʉr ozabra mɨnter mɨmba (200 000 000).

¹⁷ Me a si bee sa jehe yi: me a bee ó bɨkabala, ndwe e bʉr o b'a be é mɨkoo myɔɔ kʉ ɨ. Bé a bwar-bwar ó mompor mo dɔm, wiʼ paʼ é zʉʉŋ mpʉ siʼe, guu paʼ mpʉ nyʉl jobo. Guu paʼ nteme, pɨe-e-pɨe. Mɨlʉ bɨkabala, myé a be ó mpʉ mɨlʉ mɨngbampwɨɨ. Duulʉ le siʼe ndwe e pir, byé a be lé eduho é mɨnʉm bɨkabala byaa.

¹⁸ Bɨntɨʼa bɨlɛl byaa, siʼe, duulʉ ndwe e pir, byé ó b'a kʉ bul jʉ buobuo bʉr, jala e nkɔb ngwar é monkɔb molɛl. Bɨsa byaa, byé a duho ó, é mɨnʉm bɨkabala.

¹⁹ Tina, yé ó, bɨkabala byé a jʉ-jʉ bʉr ó e bɨpeh bɨ nyʉl bɨba: le mɨnʉm ndwe e mɨkʉn myɔɔ. Nkul wɔɔ a be ó tɨ. Mɨkʉn myɔɔ, myé a nwɨɨla ó e l'onyʉa. Mɨkʉn nteme, e mɨlʉ. Mɨlʉ myaa, myé ó b'a be lé elʉ bʉr ɨ.

²⁰ Bʉʉ bʉr o b'a baapa dwè é bɨntɨʼa byaa ɛ, bé a baakpɛl egwɨma bɨsyɛɛla bɨ ebebe bé a sa-sa ɛ, nkʉ dwir mɨleme. Bé a si to dolo lé edwiibɨ moleme bé e bɨbaŋabaŋa bɨdweʼle bʉr bé a dɨ kpaʼ e mobo mɔɔ ɛ. Bé a dɨ kpaʼ mye ó, miʼ e gol, myʉʉ e nkoho mɔn, myʉʉ nteme e bɨnkoho bɨgbaa molele. Bé a dɨ kpaʼ byʉʉ bɨbaŋabaŋa bɨdweʼle ó e mokoʼ, myʉʉ e bɨlɨ. Bɨsa byaa, byé abee, byé ajoʼo, luʼo ba sɔʼɔ. Byé akœʼ. Sa gwar, bɛɛ l'agwaʼ lé edwiibɨ bye.

²¹ Bé a baagwɨma ejwɨɨ e bʉr, sɛa mɨmir mɨ eleme, bɨmala, mɨfyɛba, ndwe e díbe. Bé a baadwir mɨleme.