Mɨngwiha 8 - Kálara Zyɛ̌m Edwán é mpʉ̌n

Ma Ntœme, nye ebʉ luʼ epihe a ŋmɛhɔ sitam ɨ

¹ No ó Ma Ntœme a bʉ luʼ tambɛl é l'oluʼ bé a ŋmɛhɔ sitam ɨ. É jɔʼ nye a bʉ nye le egwìh mbom kalara ɛ, bɨsa bibyɛh ndɨ é jobo kʉ ɨ, byé ntɔʼ di é gʉʼʉʉ, tɔɔ mɨnwira mowʉm molɛl.

² Pie tɨ, me ntɔʼ bee beengles tambɛl bé a cyɛb-cyɛb é mih mo Zyɛm ɨ. Bé a si dweŋɔ osebe.

³ Nuu engles fih a be ó e bele gol é mbo, bele bé lé ediʼ ndwam e tɨʼ jɔʼ yiyɛh ɛ. Nye a si ze cyɛb kunokuno e taa mɨndwɛa ndɨ é l'efu e motwina ɛ. Tina, yé ó, taa mɨndwɛa yaa, yé a saŋɔ ó e gol. Nye a be ó é l'empom e dia taʼa mo Zyɛm. Bé a si dwe nye bele le buobuo ndwam, ó nye diʼ ó we.

⁴ Nye ze sa no. É jɔʼ ndwam wé a dɨ duo e, duulʉ, yé a pyal-pyal ó, duho é bele yé a be é mbo we e, duulʉ, yaa lé ebere ó, é bur-bur, to nko Zyɛm a be é dia taʼa ɛ. Duulʉ yaa, yé a be ó zyɛŋa e mɨnjwɨʼla mɨsaŋ mɨ bʉr mo Zyɛm mimyɛh.

⁵ No ó engles a si nʉa bele yaa, nʉa nteme siʼe, duho é taa mɨndwɛa yaa, ze kaale ye é bele. Bele yaa mu lwɨŋla e siʼe nɛʼɛ, nye ntɔʼ peble ye kaʼ si. Pie tɨ, me ze joʼo mpâm nkɛl-jobo sala é kaaa, joʼo mɨndum mɨ mpie lé edumo é nkʉʉʉ, le ebee mɨndweh mɨ mpie é keb-keb. Si kʉ ze ncyeŋa nteme.

Osebe o dɔm tambɛl

⁶ No ó, beengles tambɛl bé a be e osebe tambɛl ɨ, bé ze di é car ó, bé lʉo ó me.

⁷ No ó, é jɔʼ waa efoʼ a lʉo sebe we e, motana mpuhba e siʼe ndwe e motié, byé ntɔʼ guhɔ é si nwaʼ nyiwɛh. É si nwaʼ nyiwɛh, buobuo mɨlal, myé a si diʼe, jala e nkɔb ngwar é monkɔb molɛl. Buobuo bɨlɨ, byé a si diʼe nteme, jala e nkɔb ngwar é monkɔb molɛl. Bwa bɨka lé epah si e si ɨ, bé a si sie lé ediʼe.

⁸ No ó engles mba a lʉo sebe we. Bwaʼbwaʼ sɔʼɔ mpʉ ecwɨʼ, yé a be ó lé epyɛl mɨnjʉl. Bé ntɔʼ guho ye é maŋ tʉŋlʉ. No ó, buobuo modibe mo maŋ, mé a si lihba motié, jala e nkɔb ngwar é monkɔb molɛl.

⁹ No ó, buobuo bɨsa byé a tiʼe-tiʼe é maŋ ɨ, byé a si sie lé edwè, jala e nkɔb ngwar é monkɔb molɛl. Ndwe nteme, buobuo bɨtitima, byé a si twiʼlɨ, jala e nkɔb ngwar é monkɔb molɛl.

^10-11 Engles lɛl ze lʉo sebe we. Nuu bwaʼbwaʼ atwitwɛn, a be ó tɨʼ é jobo kʉ, die le Modwie. Nye ntɔʼ tɨl, duho kʉ, nkaŋa si. Nye a be ó lé eduo é tuuu mpʉ etwim e mpah. Nye a duma ó, é buobuo montibe le mono, jala e nkɔb ngwar é monkɔb molɛl. Nye a si liŋ buobuo montibe é dwie dwie mpʉ lomo, jala e nkɔb ngwar é monkɔb molɛl. Buobuo bʉr o b'a de modibe maa ɛ, bé a si sie lé edwè é l'edwie e modibe maa.

¹² No ó engles nâ ze lʉo sebe we. Jɨh tɨʼ nye a lʉo we, dobo, lé ntɔʼ siila nyʉl we. Bwaʼbwaʼ peh nyʉl ye, yé ntɔʼ dwine, jala e nkɔb ngwar é monkɔb molɛl, jwɨʼ gwar e gwar mpʉ alomo nteme a dwine e. Buobuo baatwitwɛn nteme ntɔʼ dwine, jala e nkɔb ngwar é monkɔb molɛl. No ó byé a baagʉa ka pan ɨ. Dobo bé e l'alomo, bé a kʉ ka pan ó njɨ é bwa bɨjɔʼ. Pie tɨ, byé a lɛŋ-lɛŋ byʉʉ bɨjɔʼ ó, aka panɔ.

¹³ Ngbaa le ebe, me mu lé edwɛʼ kʉ nɛʼɛ, me ntɔʼ bee mpele-nɔn lé epiili é l'ejyoo. Nye a lwib lé eyɨm twii ó: «A vwaʼ e baa ndɨ é si nwaʼ ɛ, ebe, beengles olɛl, bé l'apa lʉo osebe bɔɔ. A vwaʼ e bʉr é jɔʼ bé ólʉo be e!»