Mɨngwiha 7 - Kálara Zyɛ̌m Edwán é mpʉ̌n

Engles, nye egba bʉr mo Zyɛm mojwɨʼ é mompom

¹ Pie tɨ, me ze bee beengles onâ. Bé a cyɛb-cyɛb ó, é modumo mo si monâ, lé ekamle onkuo onâ lé ekuulo e nkul. Onkuo baa, bé amu jaa lɨr si, le maŋ ndwe e bɨlɨ.

² Me ze bee nteme nuu engles a duho nko dobo lé emʉa ɛ. Zyɛm ndɨ kublakubla ɛ, a ntɨh nye ó e sitam ye é mbo. No ó engles waa a jebe beengles onâ baa, baa Zyɛm a dwe nkul ó, bé lɨrɨ si ndwe e maŋ ɨ. Nye ntɔʼ lwib lé eyɨm twii ó:

³ «Alɨr ga si, nkʉ maŋ, nkʉ bɨlɨ. Bɨna paʼ sil lé eŋmɛh ga bʉr mo Zyɛm sitam ɨ bɨnceʼe, lé egba be mojwɨʼ.»

⁴ Pie tɨ, me ze bee bim bʉr o b'a ŋmɛhɔ sitam yaa ɛ. Bé a be ó otɔɔyin nter e l'otɔɔyin mowʉm monâ e l'otɔɔyin onâ (144 000). Bʉr o b'a ŋmɛhɔ sitam yaa ɛ, bé a duho ó, é moveh mo bwa b'Ɨzraɛl mɨmɛh ewʉm e moba:

⁵ Bʉr o b'eveh mo Yʉda bé a ŋmɛhɔ sitam ɨ: otɔɔyin ewʉm e l'oba (12 000); baa be eveh mo Rwibɛn: otɔɔyin ewʉm e l'oba (12 000); baa be eveh mo Gad: otɔɔyin ewʉm e l'oba (12 000);

⁶ baa be eveh mo Aser: otɔɔyin ewʉm e l'oba (12 000); baa be eveh mo Nɛftali: otɔɔyin ewʉm e l'oba (12 000); baa be eveh mo Manase: otɔɔyin ewʉm e l'oba (12 000);

⁷ baa be eveh mo Simeɔn: otɔɔyin ewʉm e l'oba (12 000); baa be eveh mo Levi: otɔɔyin ewʉm e l'oba (12 000); baa be eveh mo Isakar: otɔɔyin ewʉm e l'oba (12 000);

⁸ baa be eveh mo Zabulon: otɔɔyin ewʉm e l'oba (12 000); baa be eveh mo Yoseb: otɔɔyin ewʉm e l'oba (12 000); baa be eveh mo Benjamin bé a ŋmɛhɔ sitam ɨ: otɔɔyin ewʉm e l'oba (12 000).

Mpampaʼ bʉr

⁹ Jɔʼ ze laa ba, me ze bee bʉr mobɨʼ mopam, abe e tolɔɔ. Bé a be ó bʉr o bɨkul bibyɛh, bʉr o moveh mɨmɛh, bʉr o mɨlal mimyɛh, ndwe e bʉr o bɨlwib bibyɛh. Bé a be ó tɨʼ bɨbɛh é l'empom e dia taʼa ndwe e Ma Ntœme. Bé a be ó e bɨdur é pumo-pumo é monyʉl le mompuho mo elen é mobo.

¹⁰ Bé a lɛɛ-lɛɛ kʉ kʉ ó: «Zyɛm Sɔŋ ga wina, mʉr ndɨ é dia taʼa ɛ, bé e Ma Ntœme, bé ó ndɨ edwe bʉr tiʼ molu mo mpoʼ mɨmɛh.»

¹¹ Beengles bɨbɛh, bé a cyɛb ó, ocɨcyel, lé ebʉmra dia taʼa é nka, bé e l'otamabʉr, ndwe e mɨkubla bɨsɔʼɔ mɨnâ. É jɔʼ bé a joʼo mokan maa ɛ, bɨbɛh ntɔʼ bɨʼɔ mompom mɔɔ si é l'empom e dia taʼa mo Zyɛm, bɨbɛh lé edwiibɨ nye.

¹² Bé a lɛɛ-lɛɛ ó: «Amɛn! Eee, Zyɛm Sɔŋ ga wina, nye e moseʼla, le kum, le ocyoo, le ndwɛa ekiba, le duu, le nkul le onjɨh, njʉmdia e njʉmdia! Amɛn!»

¹³ No ó nuu tamamʉr a ze dî e me ó: «Baa ndɨ e bɨdur é pumo-pumo ba, bé ozé? Ndwe nteme, bé eduho nko?»

¹⁴ Me e nye ó: «Da, gwɔɔ ó lé egʉa.» No ó nye a lɛɛ me ó: «Bʉr ba, bé ó baa b'a sia e ntɨʼa nɨnɨ pihe e. Bɨ sohlo bɨdur byɔɔ e motié mo Ma Ntœme. Ebe no ó mɨkan myɔɔ ndɨ é puum ɨ.

¹⁵ Ebe no ó bé ndɨ ecyɛb é l'empom e dia taʼa mo Zyɛm ɨ. Bé edwe nye kum é l'odia we ó moho e pum. Waa lé edi é dia taʼa ɛ, nye ó ngo baʼle be.

¹⁶ Bé aŋa ka joʼo za. Bé aŋa ka joʼo nteme dweh modibe. Siʼe dwehe, yé aŋa ka ŋmɛha be é monyʉl, aka kah gumo bé ódi ɨ,

¹⁷ ebe, Ma Ntœme ndɨ teme dia taʼa ɛ, nye ó ndɨ ekoblo daa e bɨntœme le, lé eto e bye é l'eno, gumo modibe mo tiʼ lé esah ɛ. Zyɛm ótin be myɛɛle mɨmɛh é mih.»