Mɨngwiha 6 - Kálara Zyɛ̌m Edwán é mpʉ̌n

Oluʼ tobo be efoʼ bé a ŋmɛhɔ sitam ɨ

¹ Me ze dwɛʼ, bee Ma Ntœme lé ebʉ luʼ efoʼ a ŋmɛhɔ sitam ɨ, paʼra oluʼ tambɛl baa. É jɔʼ yaa, guu kublakubla sɔʼɔ é mɨkubla bɨsɔʼɔ mɨnâ myaa, wé a si lwib lé eyɨm twii. Twii we a jwɨ̂ʼ mpʉ sa cɨŋɔ ó, yé ó mpâm nkɛl-jobo, é kaaa. Nye ó: «Ntaʼ!»

² Me ze dwɛʼ, bee ó mpaŋa kabala, bee nteme mʉr é koo we kʉ. Mʉr waa a be ó e la dɔm é mobo. Bé a be ó si bœr nye epʉʼlʉ é lʉ. Nye ntɔʼ to le entaa bʉr é dɔm, le ebula e l'esaa é koo.

³ Pie tɨ, Ma Ntœme ze bʉ luʼ mba a ŋmɛhɔ sitam ɨ. Guu kublakubla sɔʼɔ, wé ntɔʼ lɛɛ ó: «Ntaʼ!»

⁴ Yʉʉ kabala akaa-e-kaa é zʉʉŋ ntɔʼ pyal. Mʉr a be tɨʼ kʉ ɨ, a si dweŋɔ nkul elʉo dɔm é si nwaʼ nyiwɛh ó, bʉr, bé jwɨɨla paʼra wɔɔ. Nye a si dweŋɔ fòŋ é jaa jaa.

⁵ É jɔʼ nye a bʉ luʼ lɛl a ŋmɛhɔ sitam ɨ, guu kublakubla sɔʼɔ, wé ntɔʼ lɛɛ ó: «Ntaʼ.» Me ka bee nɛʼɛ, kabala dwinɨ! Mʉr a be tɨʼ kʉ ɨ, a be ó e lor é guu mbo.

⁶ Me ntɔʼ joʼo lwib, lwib yaa lé eduho é nko paʼ mɨkubla bɨsɔʼɔ mɨnâ myaa. Yé a nwɨɨla ó e lwib mʉr lé elɛɛ ó: «Lira pu ble ngwar, nye mu ó tɔɔ saŋ denie ngwar. Olira o orge olɛl, bé ó tɔɔ saŋ denie ngwar. Sa gwar, asa ebebe é nko paʼ mulo ndwe e monwoʼ mo rezɛŋ.»

⁷ É jɔʼ nye a bʉ luʼ nâ a ŋmɛhɔ sitam ɨ, kublakubla sɔʼɔ epihe, wé ze lɛɛ ó: «Ntaʼ!»

⁸ Me ka bee nɛʼɛ, kabala nyʉl bɨka! Mʉr a be tɨʼ kʉ ɨ, a be die ó, Efie. Kwar odwè, nye ntɔʼ pyɛl bʉr o b'a di tɨʼ ɨ, bé ze du nye é koo pihe. É bʉr o si bɨbɛh, bé a si dwe be nkul mojwɨ̀ʼa ndɨ ó, nye jʉʼo bʉr, jala e nkɔb ngwar é monkɔb monâ. Nye ójʉ be ó e fòŋ, e za, ndwe e bɨnumò. Otir o montiʼ nteme, bé ójʉ bʉʉ bʉr.

⁹ É jɔʼ Ma Ntœme a bʉ luʼ tɛn a ŋmɛhɔ sitam ɨ, me ntɔʼ dwɛʼ é l'empàh e taa mɨndwɛa, me ze bee mɨsisim mɨ bʉr tɨ. Bʉr baa, bé a jʉŋɔ ó, ebe lɔɔ Zyɛm, ndwe e mboʼla bé a boʼlo e.

¹⁰ Bé ze lwib e nye lé eyɨm twii ó: «Da! Go ó Mʉr ndɨ ti, waa ndɨ Zyɛm ocyecye e. Odil o si nwa bé a jʉ bɨh ɨ, go óka tiʼe be mɨlɔb é yáa jɔʼ? Go óka bala motié mɨh é yáa jɔʼ?»

¹¹ No ó nye a nʉa bɨdur é pumo-pumo, bœr bɨbɛh, le elɛɛ e be ó, bé dihba ba titia, to pyal é jɔʼ bɨɔ bɔɔ ndɨ é l'empomo e syɛɛ egwar ɨ, bé taara jʉŋɔ nteme mpʉ be. Ebe no ó bé e boo nɔɔ, bé ósa sama ntinɨ ɨ.

¹² No ó, me ze dwɛʼ, bee Ma Ntœme lé ebʉ luʼ tobo a ŋmɛhɔ sitam ɨ, si ntɔʼ ze bul ncyeŋa. Dobo, lé a be ó, lé mu dwidwin é vyʉk. Alomo nyiwɛh a be ó, nye mu akaa-e-kaa é zʉʉŋ, mpʉ nyʉl motié.

¹³ Baatwitwɛn, bé a si duho é jobo kʉ, duma si, mpʉ bɨbyɔɔ bɨ mpumo ofig, kur si é jɔʼ nkuo lé ekuulo e nkul ɨ.

¹⁴ Jobo, yé a si dim é mih é piii, é mpʉ mɨtila lé edim-dim é jɔʼ bé lé epile mbom kalara ɛ. Mocwɨʼ mɨmɛh ndwe e mine mɨmɛh, byé a si pʉʼa é bɨcye byɔɔ.

¹⁵ Odil o si nwaʼ bɨbɛh, bé a si fwab é bɨbah mokoʼ tʉŋlʉ ndwe e mocwɨʼ paʼra mokoʼ, taare é l'ojwɨɨ o si nwa, bé e l'osabene ndwe e l'ojwɨɨ o bɨzima onɨnɨ, ka kɛl obil o bɨsa ndwe e mɨnjɨh mɨ bʉr, to pyal é molʉa bé e bʉr o ndɨ é dia otî ɨ.

¹⁶ Bé a lɛɛ-lɛɛ e mocwɨʼ ndwe e mokoʼ ó: «Duma ga bɨh é monyʉl ɔɔ! Bɨn bé à fol bɨh ɔɔ, ebe, waa ndɨ é dia taʼa ɛ, nye amu jaa bee bɨh. Ndwe nteme, Ma Ntœme amu jaa kpaa empime e bɨh,

¹⁷ ebe, moho nɨnɨ, wi pyal: moho bé ófil empime lɔɔ ó wi! Zé óka cyɛb é mih mɔɔ?»