Mɨngwiha 5 - Kálara Zyɛ̌m Edwán é mpʉ̌n

Mbom kalara wé a be pila ndwe e ŋmɛha bɨsitam ɨ

¹ No ó, me a si bee mʉr ndindil é dia taʼa e mbom kalara é mobo. Nye a mɛr we ó e mbo ejʉm. Bé a tile kalara waa ó e l'epeb é jaa jaa, mɨpaʼ mɨmba, ntɔʼ pile le. Bé ze nɛr luʼ tɨʼ é bɨfum tambɛl, ntɔʼ ka ŋmɛhɔ nteme sitam é bɨgumo tambɛl byaa, ó mʉr fih amu jaa dib.

² Me ze bee guu njɨh engles. Wé ze dî tia e twii kʉ ó: «Zé ndɨ cye mʉr ndɨ ó, nye bʉʼo luʼ, gwìh kalara nwaʼ ɛ?»

³ To kœb ó, yé a baabe e mʉr. Taare é jobo kʉ ndwe e si, le é bɨbwah si kaʼ tʉŋlʉ, abe e waa a pa dweŋɔ nkul ndɨ ó, nye kɛŋɨ mbom kalara waa, dwɛʼ we paʼ tʉŋlʉ ɨ.

⁴ Me a si bul laŋle jɨ, ebe, yé a baabe e mbi mʉr ndɨ ó, nye gwìhɨ we, dwɛʼ we paʼ tʉŋlʉ.

⁵ No ó, nuu tamamʉr é l'otamabʉr baa a lɛɛ me ó: «Gwaʼ edwe. Dwɛʼa! Ngbampwɨɨ, wi pyal, duho é l'eveh mo Yʉda! Wé ó mʉr mpoŋbʉr mo David, waa a byɛl mpʉ ntoʼdu ɨ. Wɛɛ, wé a si ntaa sa yiyɛh, bula e l'esaa é koo. Wé ó b'a dweŋɔ nkul ndɨ ó, wé bʉʼo oluʼ tambɛl baa bé a ŋmɛhɔ sitam ɨ, le egwìh mbom kalara.»

⁶ No ó, me ze dwɛʼ, bee ó, mpa yé a be ó Ma Ntœme! Nye a si cyɛb paʼra dia taʼa e mɨkubla bɨsɔʼɔ mɨnâ, ndwe e l'otamabʉr baa. Ma ntœme waa a be ó e bɨpyɛb e bɨbam, bɨsa byé a lɛʼle ó, bé a si kʉ jʉ nye e! Nye a be ó e bɨntoo tambɛl é lʉ. Nye a be nteme ó e mih tambɛl. Mih me, mé ó Mbɨambɨa Sisim ndɨ ti ɨ, waa nye a lomo é si nwaʼ nyiwɛh ɛ.

⁷ Ma Ntœme waa ze dihle, to nko mʉr a be é dia taʼa ɛ, to nʉa mbom kalara waa e mbo ejʉm we.

⁸ É jɔʼ nye a nʉa we e, mɨkubla bɨsɔʼɔ mɨnâ myaa, ndwe e l'otamabʉr mowʉm moba e l'onâ baa, ze bɨʼ mompom mɔɔ si é mih mo Ma Ntœme, lé edwiibɨ nye. Mʉr nyiwɛh é sama yɔɔ a be ó e mper é mobo, ndwe e mompele mo gol, mɨmɛh mɨlwɨŋla e ndwam lé eduo e. (Ndwam waa, wé ó dweʼle, sa lé elɛʼle mɨnjwɨʼla mɨsaŋ mɨ bʉr lé esa Zyɛm ɨ.)

⁹ Bé a jɛɛ-jɛɛ ó, edwan e jɛɛ. Bé ó: «Go ó lé ejala le enʉa mbom kalara wi, bʉ oluʼ bé a ŋmɛhɔ sitam ɨ, le egwìh mbom kalara, ebe, go a si jʉŋɔ. Go ntɔʼ jɛna bwaʼbwaʼ tɔɔ, lé ekʉr bʉr. Motié mo, mé a si bwam Zyɛm Sɔŋ sa yé a jala e nye e: bʉr o moveh mɨmɛh, ndwe e bɨlwib bibyɛh, bʉr o mɨlal mimyɛh, ndwe e bɨkul bibyɛh.

¹⁰ Go ó b'a niŋle be é jwɨ̀ʼa yo, le esa ó, bé diʼe opara lé esea e Zyɛm Sɔŋ wih ɨ. Bé nteme ó ngo jwɨ̀ʼ si nwaʼ nyiwɛh.»

¹¹ Me a si bee nteme beengles otɔɔyin otɔɔyin, abe e tolɔɔ. Bé a be ó lé ebʉmra dia taʼa, ndwe e mɨkubla bɨsɔʼɔ mɨnâ, ndwe e l'otamabʉr baa é nka. Me a si joʼo deme lɔɔ bé a jɛɛ ɛ.

¹² Bé a jɛɛ kʉ kʉ ó e nkul, lé elɛɔ ó: «Ma Ntœme bé a jʉ ɨ, nye ejala le enʉa nkul nyiwɛh, e l'okum, e l'ocyoo, e l'onjɨh, e duu, ndwe e kum, ka kɛl moseʼla.»

¹³ No ó, me ze joʼo bɨsa bibyɛh Zyɛm a cye e, lé elwib é jɔʼ gwar: e byaa ndɨ é jobo kʉ ɨ, le byaa ndɨ é si nwaʼ ɛ, le byaa ndɨ é bɨbwah si tʉŋlʉ ɨ, ndwe e byaa ndɨ é maŋ tʉŋlʉ ɨ. Bibyɛh, byé ze jɛɛ bɨjɛɛ. Byé ó: «Kum, e duu ndwe e nkul, byé ó e waa ndɨ ndindil é dia taʼa ɛ, bé e Ma Ntœme, njʉmdia e njʉmdia!»

¹⁴ É jɔʼ bé a dɨ jɛɛ no e, mɨkubla bɨsɔʼɔ mɨnâ myaa, myé a bɨha-bɨha ó: «Amɛn!» Otamabʉr onɨ, bé ntɔʼ bɨʼ mompom mɔɔ si é mih mɔɔ, lé edwiibɨ be.