Mɨngwiha 4 - Kálara Zyɛ̌m Edwán é mpʉ̌n

Bé edwiibɨ Zyɛm é jobo kʉ

¹ Jɔʼ ze laa ba, me ze bee yʉʉ sa jehe: ebe, lé a be ó mbeʼ é jobo kʉ! Me ntɔʼ joʼo twii efoʼ me a taare joʼo e. Nye a lwib e me ó, mpʉ sebe lé elwɨɨ ɨ. Nye e me ó: «Ntaʼ kaʼ kʉ. Me lɛʼla go bɨsyɛɛla byé ókʉ be é nere-nere ó, byé syɛŋɨ pie tɨʼ ɨ.»

² Cye e cye yaa, Mbɨambɨa Sisim, nyi ze mɛr me e nkul. Me ze bee dia taʼa é jobo kʉ. Nuu mʉr a be ó tɨʼ ndindil.

³ Nye a be ó é bul ncɛnba. Moncɛnba me, mé a dɨ nwɨɨla ó e jaspe nkʉ sardoine. Nkulyɛn a be ó lé ebʉmra dia taʼa ye é nka. Nkulyɛn waa a be ó lé epan mpʉ émeraude.

⁴ Bɨdia bɨ taʼa mowʉm moba e bɨnâ, byé a be ó lé ebʉmra dia taʼa yaa é nka. Otamabʉr mowʉm moba e l'onâ, bé a be ó tɨʼ ondindil, e mɨkan mɨpumo é monyʉl ndwe e mopʉʼlʉ mo gol é mɨlʉ.

⁵ No ó, dia taʼa yaa, yé a be ó lé epyɛl mɨndweh é keb-keb. Me ze joʼo mɨndum mɨ mpie é nkʉʉʉ, mpâm nkɛl-jobo sala é kaaa. Tɨʼ nteme, yé a be ó e motwim mo mpah tambɛl lé eduo é pan-pan é tuuu. Mɛɛ, mé ó Mbɨambɨa Sisim ndɨ ti ɨ.

⁶ Yʉʉ sɔʼɔ é bɛl-bɛl, yé a be ó é l'empom e dia taʼa yaa, mpʉ sa cɨŋɔ ó, yé ó maŋ lé epan é nge-ngɨ-nge mpʉ cristal ɨ. Yé a be nteme ó e mɨkubla bɨsɔʼɔ mɨnâ myé a cyɛb é mompàh mo dia taʼa yaa ɛ. Mɨmo ndwe e mɨkoo myɔɔ, myé a be ó e mih lwɨŋla.

⁷ Kublakubla sɔʼɔ efoʼ, wé a be ó, lé enwɨɨla e ngbampwɨɨ. Waa mba wɛɛ, nwɨɨla e njɨh ntɛɛ. Waa lɛl, wé a be ó e mpom nwɨɨla e mpom mʉr. No ó, waa nâ, wé a nwɨɨla ó e bwaʼbwaʼ mpele-nɔn lé epiili ɨ.

⁸ Mɨkubla bɨsɔʼɔ mimyɛh mɨnâ, myé a be ó e mompaba tobo. Mompaba mɔɔ nteme, mé a be ó lwɨŋla e mih, dam be é mompaba si, dam be nteme é nko paʼ kʉ. Myé a be ó lé ejɛɛ bɨjɛɛ moho e pum. Myé a jɛɛ-jɛɛ, lé elɛɔ ó: «Ti, ti, ti! Da Zyɛm Nkul nyiwɛh! Go ó waa a bɛa be, waa ndɨ, e waa lé eze e.»

⁹ No ó mɨkubla bɨsɔʼɔ mɨnâ, myé a jɛɛ nye bɨjɛɛ lé edwiibɨ mʉr a be é dia taʼa, waa ndɨ etiʼe njʉmdia e njʉmdia ɛ. Bé a si dwe nye ekiba e duu é zi bɨjɛɛ byɔɔ.

¹⁰ É jɔʼ yiyɛh bé a sa-sa no e, otamabʉr mowʉm moba e l'onâ baa, bé a si bɨʼ mompom mɔɔ si é mih mo mʉr a be é dia taʼa ɛ, lé edwiibɨ mʉr ndɨ etiʼe njʉmdia e njʉmdia ɛ. Bé a be ó lé epɛʼ-pɛʼ mopʉʼlʉ mo gol mɔɔ é mɨlʉ, jyɛʼɔ-jyɛʼɔ me si é mih me. Bé ó:

¹¹ «Tî wih ndwe e Zyɛm wih! Yé ejala ó, bʉr gumla go, bé dwiibɨ go ndwe le eseʼle nkul go, ebe, go ó b'a cye bɨsa bibyɛh. É gwɨma yo ó byé a be ndwe le ecyeŋɔ ɛ.»