Mɨngwiha 3 - Kálara Zyɛ̌m Edwán é mpʉ̌n

Kalara a cenɔ mbɛr Zyɛm ndɨ ɨ Sardɛs ɨ

¹ «Tila kalara. Go à cen engles lé edwiile mbɛr Zyɛm ndɨ ɨ Sardɛs ɨ. Lɛŋɨ nye ó: Waa lé emɛr mɨsisim mo Zyɛm tambɛl ndwe e baatwitwɛn tambɛl ɨ, nye elɛɛ ó: “Me egʉa sa yiyɛh go lé esa ɛ. Bʉr bé eseʼle go, lé elɛɔ ó, go ó kublakubla, to kœb ó, gwɔɔ, go ó mpʉ muu!

² Diʼe ga nkehe. Bɨn bé amu sie lé edwè é pe, ebe, mɨ gʉa mpʉ syɛɛ yin ndɨ enyin boo Zyɛm me ndɨ esea e nye e. Etiʼ lam, lé ó, yé apa be mbɨmbɨa é mɨpaʼ mimyɛh.

³ Ebe no, toŋla ga sikʉlʉ bɨn bé a joʼo é molu pihe e. Toŋla ga nteme mpʉ bɨn bé a taare nʉa ye e. Gwɨma ga mobebe mɨn. Bɨn bé à dwir mɨleme. ǃBɨn si bene di nkehe nɛʼɛ, gʉŋa ga ó, me ópyal bɨn mpʉ ndiblʉ, bɨn l'abuʼla. Bɨn bé aŋa gʉa ewala me óze e.

⁴ No ó, yé yɛɛ ó e bʉʉ bʉr o mbɛr Zyɛm win ɨ Sardɛs, baa b'a baalœʼ mɨkan myɔɔ ɛ. Bɛɛ bé óbwar mɨkan mɨpumo. Bɨh e boo nɔɔ, bé ókœʼ sama gwar, ebe, bé ejala e tɨ.”

⁵ Mʉr nyiwɛh óbe si ntaa, bula e l'esaa é koo e, me óbœr nye kan pumo. Me aŋa cyam die le é kalara tiʼ. Me ólɛɛ Sɔŋ wam, bé e beengles be ó: Waa wam ó nwa!

⁶ «No ó, mʉr ndɨ e mogwal mo ejoʼo e, nye joʼa mokan Sisim lé elɛɛ mɨmbɛr mɨ Zyɛm ɨ.»

Kalara a cenɔ mbɛr Zyɛm ndɨ ɨ Filadɛlfi ɨ

⁷ «Tila kalara. Go à cen engles lé edwiile mbɛr Zyɛm ndɨ ɨ Filadɛlfi ɨ. Lɛŋɨ nye ó: Mokan ma, mé eduho ó, é nʉm mo Mʉr ndɨ ti, waa ndɨ cyecye e. Mbe ga: diba mo njwɨɨbʉr David ó nye ndɨ e ye é mobo nɨ! ǃNye si dib ebe nɛʼɛ, abe e mʉr óka pɨr le. Laa nye si pɨr ɨ, abe e mʉr ndɨ e nkul eka dib. Nye elɛɛ e go ó:

⁸ “Me egʉa sa bɨn lé esa ɛ. Me egʉa ó, bɨn bé e bwa o nkul. Dam be no, bɨn bé a si bana baʼle lɔɔ wam, asoŋlo me. Dwɛʼa ga: mɨ dib bɨn ebe, abe e mʉr ndɨ e nkul ekamle bɨn lé eni tɨ!

⁹ Mbe ga: é mpʉʼ ó me ósa bʉr o mpah mɨnjwɨʼla mo Satan, baa lé elɛɛ ó, bé ó oYʉden, bɛɛ l'abe be e. Bé ekʉ ka sa ó njɨ mpʉl. Me ósa ó, bé ntaʼ, ze bɨʼ mompom mɔɔ si é mih mɨn, ó bé nkʉʼ gʉa ó, me ekpɛl bɨn.

¹⁰ No ó, me a lɛɛ e bɨn bɛɛ ó, bɨn dihba. Bɨn ntɔʼ ze baʼle lɔɔ wam waa. Mpʉ bɨn bé a joʼo me no e, me óbaʼle bɨn, ebe, bɨn bé amu jaa ni é bɨntɨʼa mu lé epyal é mʉr nyiwɛh é si nwaʼ ɛ.

¹¹ Me mu ó kunokuno le eze. Mɛrɨ ga sa bɨn ndɨ e ye e, é kpɨɨɨ, ebe, nuu mʉr amu jaa kpah mopʉʼlʉ bɨn lé ejala le ebwar ɨ.”

¹² Baa bé óbe si ntaa, bula e l'esaa é koo e, me óliŋ be modwii é l'Odia mo Zyɛm, ndɨ Sɔŋ wam ɨ. Bé ócyɛb é nkʉʼʉ. Abe e sa yé ópyɛl be tɨ. Me ótile die mo Zyɛm Sɔŋ wam é monyʉl mɔɔ. Me ótile nteme die e nkana mo Zyɛm Sɔŋ wam, yaa ndɨ edwan e Yerʉsalɛm ɨ. Zyɛm óntɨh nkana yaa kaʼ si, duho é jobo kʉ é ntiii. Me ótile nteme edwan e die lam é monyʉl mo bʉr baa.

¹³ «No ó, mʉr ndɨ e mogwal mo ejoʼo e, nye joʼa mokan Sisim lé elɛɛ mɨmbɛr mɨ Zyɛm ɨ.»

Kalara a cenɔ mbɛr Zyɛm ndɨ ɨ Laodisea ɛ

¹⁴ «Tila kalara. Go à cen engles lé edwiile mbɛr Zyɛm ndɨ ɨ Laodisea ɛ. Lɛŋɨ nye ó: Waa ndɨ e die ó, Amɛn ɨ, nye nteme ó ndɨ mpaŋ mboʼla, le mʉr ebuʼla. Nye ó waa Zyɛm a cye kʉ e si é zi we e. Nye elɛɛ e go ó:

¹⁵ “Me egʉa bɨsyɛɛla bin. Me egʉa ó, bɨn bé atala. Bɨn nteme, bé adiʼa é yʉŋ-yʉŋ, mpʉ modibe lé etwaʼ ɛ. A jɨ bee bɨn mu le sa yiʼ, nkʉ yʉʉ!

¹⁶ Ebe, bɨn bé ó mpʉ modibe ndɨ é nyaʼra-nyaʼra, adiʼa, atala ɛ. Ebe no ó me ójʉ go mpʉ bɨjʉʉlʉ ɨ.

¹⁷ Bɨn bé elɛɛ ó, bɨn bé ó obil o bɨsa, lwɨŋla e bɨsa twiha. É mbea win, bɨn bé asaa sɔʼɔ. Bɨn bɛɛ, bé agʉa ó, é l'ocyecye, bɨn bé ó bʉr o ndɨ é bul kpaa nkoo e, ndwe e bʉr o motɨʼla. Bɨn bé ó baanteʼenteʼe, ontim, ofufwah.

¹⁸ Me etɨe bɨn ó: ǃbɨn si gwɨm bi mpaŋ okum nɛʼɛ, bwama ga gol yam. Yi duho é duro e molul. Bwama ga mɨkan mɨpumo. Bɨn bé à bwar mye, aka di fufwah é nda ndwe e fwon. Bɨn bé à bwam nteme mir etwaale é mih, ó bɨn nkʉʼ bula bee.”

¹⁹ Mʉr nyiwɛh me lé ekpɛl ɨ, me edwe nye mobe ndwe le eturo nye lʉ. Ebe no, gbaʼ ga monyʉl é l'efu ó, bɨn gwɨma mobebe mɨn, le edwir mɨleme.

²⁰ Mbe ga: me ó wâʼ lé ekwaʼle ebe ó, me niʼe. Mʉr ójoʼo lwib yam, dib me ebe e, me óni nye ye. Bɨh e nɔɔ, bé ópuhba mobo é teble ngwar.

²¹ Mʉr óbe si ntaa, bula e l'esaa é koo e, me ódwe nye nkul ó, bɨh e nɔɔ baʼra lé edi é dia taʼa yam, ebe, mɛm nteme, me a si ntaa, bula e lam esaa é koo, me ntɔʼ nʉa dia kunokuno e Sɔŋ wam é dia taʼa ye.

²² «No ó, mʉr ndɨ e mogwal mo ejoʼo e, nye joʼa mokan Sisim lé elɛɛ mɨmbɛr mɨ Zyɛm ɨ.»