Mɨngwiha 21 - Kálara Zyɛ̌m Edwán é mpʉ̌n

Edwan e nkana Yerʉsalɛm

¹ Me a si bee edwan e jobo ndwe e l'edwan e si, ebe, jobo efoʼ bé e si efoʼ, byé a be ó si laa. Maŋ, mé a baaka be e dia.

² Me a si bee nteme nkana ndɨ e l'ekɛn ɨ, edwan e Yerʉsalɛm. Me a bee ye ó, lé eduho boo Zyɛm é jobo kʉ, fulo si é ntiii. Yé a be ó e nyaŋa é nyʉl mpʉ mʉma lé edi é car ó, nye óbwam, to nko njʉm we ndɨ ɨ.

³ Me ze joʼo bwaʼbwaʼ twii a duho é dia taʼa ɛ. Nye ó: «Zyɛm mu ó lé ekomlo odia we paʼra bʉr e bʉr. Nye ódi ó e be. Bé óbe ó bʉr o jwɨ̀ʼa ye. Zyɛm nye mʉr tɨʼ ódi paʼra wɔɔ.

⁴ Nye ótin be myɛɛle mɨmɛh é mih. Bé aŋa ka joʼo mogumba. Bé aŋa ka dwè. Efie, lé aŋa ka be. Bé aŋa ka jɨ modwe. Mɨmbor bɨsa myaa, myé ólaa.»

⁵ No ó, waa a be é dia taʼa ɛ, ze lɛɛ ó: «Mbe ga: mɨ sil sa bɨsa bibyɛh modwan e modwan!» Nye ze lɛɛ e me ó: «Tila bɨlwib bi! Byé ó mɨlɔb mɨ ebuʼla, le myaa ndɨ cyecye e.»

⁶ Nye e me ó: «Yi sie! Me ó mʉr efoʼ ndwe e waa epihe. Me nteme, me ó etɛɛrɨ e sa yiyɛh ndwe e l'efuʼla e tɨ. Mʉr lé ejoʼo dweh modibe e, mɛm ódwe nye ma edwɛna. Modibe maa, mé ó maa lé egʉ, duho é l'eno e tiʼ ɨ.

⁷ Mʉr nyiwɛh óbe si ntaa, bula e l'esaa é koo e, nye óbi we nkɔb é bɨsa byaa bibyɛh. Me óbe ó Zyɛm we. Nye óbe me ó mwan.

⁸ Baabʉbʉa bɛɛ ndwe e bʉr o ndɨ abuʼla Zyɛm ɨ, bʉr o ndɨ efœʼ monyʉl mɔɔ ɛ, ojʉl o bʉr, e l'osyɛl o mɨfyɛba, oleme ndwe e baa lé edwiibɨ bɨbaŋabaŋa bɨdweʼle e, ndwe e baanya-bɨkʉʉŋʉ bɨbɛh, bɛɛ, bé ókʉ ka kœb odia wɔɔ ó njɨ é Bɨ-siʼe. Yé ó lwɨŋla e siʼe ndwe e pir. Tɨʼ ó bʉr lé edwè efie emba ɛ.»

⁹ Nuu engles é sama beengles tambɛl bé a nkɛɛ mompele tambɛl ɨ, ze pyal me. (To kœb ó, mompele maa, mé ó b'a be mɨlwɨŋla e bɨntɨʼa bɨ epihe.) Nye e me ó: «Ncʉʼ. Me lɛʼla go mʉma Ma Ntœme a ba ɛ.»

¹⁰ Mbɨambɨa Sisim, nye osi mɛr me e nkul, engles waa ze nʉa me, to e me é l'ecwɨʼ enɨnɨ kʉ. Lé a be ó kʉ é pɨbɨbɨ. Ngbaa le eka be, bɨh mu gʉʼ nɛʼɛ, nye ze lɛʼle me Yerʉsalɛm, nkana ndɨ e l'ekɛn ɨ. Yé a be ó lé eduho é jobo kʉ, nko Zyɛm ndɨ ɨ, fulo si é ntiii.

¹¹ Yé a dɨ ncɛnba ó, moncɛnba mo Zyɛm, é mpʉ ekoʼ e diamant. Yé a dɨ ncɛnba ó, mpʉ jaspe, é ncyɛn-nti-ncyɛn.

¹² Bé a si bʉmra nkana e pɨpɨm é pibe pibe. Pɨpɨm yaa, yé a be nteme ó, kʉ é jaa jaa. Moniŋlɨ mo nkana, mé a be ó ewʉm e moba. Beengles ewʉm e l'oba, bé a be ó tɨʼ é moniŋlɨ maa. Tɨʼ é moniŋlɨ maa kʉ, bé a si tile mie moveh ewʉm e moba mo bwa b'Ɨzraɛl.

¹³ É mompàh mo nkana mɨmɛh monâ, yé a be ó e moniŋlɨ molɛl molɛl. Maʼ moniŋlɨ molɛl, mé a be ó nko dobo lé emʉa ɛ; maʼ molɛl, nko lé lé eja ɛ; mʉʉ molɛl, nko tin, maʼ molɛl, nko tie.

¹⁴ Bé a si gba mokoʼ ewʉm e moba é pɨpɨm yaa tʉŋlʉ. Bé a be ó si tile mie mɨlʉmlʉ ewʉm e mɨmba Ma Ntœme a kœʼ e mye e, é mokoʼ maa.

¹⁵ Engles a lwib-lwib e me e, a be ó e lɨ é mbo, yaa nye a jwɨʼ-jwɨʼ bɨsɔʼɔ e tɨʼ ɨ. Lɨ yaa, yé a be ó kpɛʼa e gol. Nye a be ó lé eto jwɨʼ nkana, ndwe e moniŋlɨ, le pɨpɨm ye.

¹⁶ Nkana, yé a be fuma ó, mɨpaʼ mɨnâ; mɨpaʼ mimyɛh mɨcye. Engles waa a si jwɨʼ nkana e jwɨʼ nye a be e tɨʼ ɨ. Ejaa e nkana, lé a be ó tɔɔ okilmɨra otɔɔyin oba e mɨnter mɨmba (2.200). Mpwaʼ mo le eto e kʉ, byé a be nteme ó, jwɨʼ gwar yaa.

¹⁷ Engles ze jwɨʼ pɨpɨm. Yé a be ó é jaa kʉ, tɔɔ moniʼ mobo nter e mowʉm monâ e monâ (144). (Bé a jwɨʼ ye ó, du mpʉ bʉr lé ebɛa jwɨʼ-jwɨʼ bɨsɔʼɔ ɛ.)

¹⁸ Bé a sa pɨpɨm yaa ó e lʉʉ ekoʼ bé lé ejebe ó, jaspe ɨ. No ó, kubo nkana wɛɛ, wé a be fuma ó e mpaŋ gol. Yé a ncɛnba ó mpʉ la.

¹⁹ Paʼ pɨpɨm, wé a duho si ɨ, wé a cyɛb-cyɛb ó, é mɨmbi mokoʼ ndɨ é bul mbɨa lé ebee e. Me a be ó monyʉl monyʉl. Mokoʼ bé a fumo pɨpɨm e tɨʼ ɨ, mé ó ma: ekoʼ le efoʼ: jaspe; laa emba: saphir; laa elɛl: agate; laa enâ: émeraude;

²⁰ laa etɛn: oniks; laa tobo: sardoine; laa e tambɛl: chrysolithe; laa e mwom: beryl; laa bu: topaze; laa ewʉm: chrysoprase; laa ewʉm e ngwar: turquoise; laa ewʉm e mba: amethyste.

²¹ Bɨdibla moniŋlɨ mo nkana ewʉm e moba, byé a be ó mɨsɛa le ekoʼ bé lé ejebe ó, perle ɨ. Mɨmpaʼa mɨ nkana mimyɛh, myé a be mɨsɛa ó e mpaŋ gol. Yé a be ó, lé encɛnba mpʉ la.

²² Me a baabee Odia mo Zyɛm tɨʼ é nkana yaa, ebe, Da Zyɛm Nkul nyiwɛh nye mʉr tɨʼ ó ndɨ edila Odia waa, bé e Ma Ntœme.

²³ Bʉr o nkana yaa, bé ajɨ mɨmbah mɨ dobo, nkʉ myaa mɨ alomo, ebe, moncɛnba mo Zyɛm, mé epan gʉ. Ma Ntœme ó ndɨ elama e nkana yaa.

²⁴ Bʉr o ndɨ abe oYʉden ɨ, bé ókœʼ mbɨmbɨa ó, é myɛn elama laa. Ojwɨʼa o si nwaʼ bɨbɛh, bé óze e bɨsa bɨna ndɨ egumlo ga ɛ, tɨ.

²⁵ Abe e jɔʼ moniŋlɨ mo nkana, mé ódiblɔ. Pum, wé aŋa ka dwine gʉ.

²⁶ Bé óze e l'okum e l'ogbaa wɔɔ, sa bʉr o ndɨ abe oYʉden ɨ, lé egumlo e. Bé óto niŋle bye é nkana yaa.

²⁷ No ó, bɨsa molwaʼbe, byé aŋa ni tɨ. Bʉr o ndɨ esa bɨsyɛɛla Zyɛm lé ebul bene e, bé e mɨmpʉmpʉl, bé ákwoʼ ni nteme tɨ. Bʉr o bé óni tɨʼ ɨ, bé óbe ó njɨ baa b'a bɛa be e mie mɨtila é kalara tiʼ mo Ma Ntœme e.