Mɨngwiha 2 - Kálara Zyɛ̌m Edwán é mpʉ̌n

Kalara a cenɔ mbɛr Zyɛm ndɨ ɨ Efɛɛz ɨ

¹ «Tila kalara. Go à cen engles lé edwiile mbɛr Zyɛm ndɨ ɨ Efɛɛz ɨ. Lɛŋɨ nye ó: Waa lé emɛr baatwitwɛn tambɛl é l'ekœh le ejʉm le e, nye ekœʼ paʼra bɨcye molama bɨ gol tambɛl. Nye elɛɛ ó:

² “Me egʉa lelelele syɛɛ bɨn lé ejaʼra e ye e, ndwe e mbi bɨn lé ejaʼra e mɨtuu ɨ. Me egʉa nteme ó, bɨn bé adihbe osyɛl be ebebe. Bɨn bɨ pahle bʉr o ndɨ elɛɛ ó, bé ó mɨlʉmlʉ mo Zyɛm ɨ, bɛɛ yɛɛ abe mye. Bɨn bɨ dweʼe ó, bé ó baanya-bɨkʉʉŋʉ.

³ Bɨn bé e bihbe. Bɨn bé edihbe mɨtuu ebe die lam, acyɛʼ mɨleme.

⁴ Sa gwar, mɨ niʼe bɨn baa ebebe. Yé ó: bɨn mu ó agʉa ka kpɛl me mbi bɨn bé a taare kpɛl-kpɛl me e.

⁵ Ebe no, toŋla ga gumo bɨn bé a syɛŋle é jɔʼ bɨn bé a duma ɛ. Gwɨma ga mobebe mɨn. Bɨn bé à dwir mɨleme. Dɨʼe loŋlo ga bɨsyɛɛla bɨ efoʼ mpʉ bɨn bé a bɛa sa-sa ɛ. ǃBɨn si be, asa no nɛʼɛ, me òze gʉʼ bɨn ye, ze pɛʼ cye elama yin gumo yé ndɨ cyela ɛ.

⁶ Dam be no, bɨn bé egʉa esa é jɔʼ bɨn lé enwim bɨsyɛɛla bɨ bʉr o lé edu Nikola ɛ. Mɛm nteme, me enwim bye.”

⁷ «No ó, mʉr ndɨ e mogwal mo ejoʼo e, nye joʼa mokan Sisim lé elɛɛ mɨmbɛr mɨ Zyɛm ɨ. Mʉr nyiwɛh óbe si ntaa, bula e l'esaa é koo e, me ódwe nye mpumo lɨ tiʼ ndɨ ɨ Paradis mo Zyɛm ɨ. Nye ó dɔɔ.»

Kalara a cenɔ mbɛr Zyɛm ndɨ ɨ Smirna ɛ

⁸ «Tila nteme engles lé edwiile mbɛr Zyɛm ndɨ ɨ Smirna ɛ. Lɛŋɨ nye ó: Waa ndɨ mʉr efoʼ ndwe e waa epihe, waa a dwè, ntɔʼ bula pàh ɛ, nye elɛɛ e bɨn ó:

⁹ “Me egʉa mɨtuu min, ndwe e l'enteʼe lɨn—to kœb ó, bɨn bé ó mɨsʉsʉ mɨ bʉr—, ndwe e movoʼ bʉr lé efœʼ bɨn ɨ. Baanya-movoʼ baa, bé dam lɛɛ ó, bé ó oYʉden, bé abe yɛɛ oYʉden ompa. Bé ó bʉr o mpah mɨnjwɨʼla mo Satan!

¹⁰ Ajoʼo ga bʉa e bɨntɨʼa bé ódwe bɨn ɨ. Mbe ga: Njwɨɨ moleme ómɛr bɨn bʉʉ bʉr, gba be é mbʉʼ, lé eboblo bɨn! Bɨn bé ósia e mɨtuu myaa ó, to pyal é molu ewʉm. Diʼe ga bʉr be ebuʼla, to pyal é l'efie. Ebe no ó me óbœr bɨn mopʉʼlʉ mo tiʼ é mɨlʉ.”

¹¹ «No ó, mʉr ndɨ e mogwal mo ejoʼo e, nye joʼa mokan Sisim lé elɛɛ mɨmbɛr mɨ Zyɛm ɨ. Mʉr nyiwɛh óbe si ntaa, bula e l'esaa é koo e, nye aŋa ka saŋɔ sɔʼɔ é jɔʼ bʉʉ bʉr, bé ódwè é l'efie emba ɛ.»

Kalara a cenɔ mbɛr Zyɛm ndɨ ɨ Pɛrgamos ɨ

¹² «Tila kalara. Go à cen engles lé edwiile mbɛr Zyɛm ndɨ ɨ Pɛrgamos ɨ. Lɛŋɨ nye ó: Waa ndɨ e fòŋ, njèba mii mɨpaʼ mɨmba ɛ, nye elɛɛ ó:

¹³ “Me egʉa gumo bɨn lé edi ɨ. Tɨʼ ó ndɨ dia taʼa mo Satan ɨ, bɨn yɛɛ lé eseʼle die lam. Bɨn bé a baakɛla ó, bɨn bé agʉa me, dam be é jɔʼ bé a jʉ Antɨpas ɨ. Bɨn bé a kʉ mɛʼle ó, bɨn bé edwiibɨ die lam. Antɨpas ó ndɨ mpaŋ mboʼla wam, le mʉr ebuʼla. Ebe no ó bé a mɛr nye é l'esama lɨn, jʉŋɔ nye e. Tɨʼ nteme ó ndɨ odia mo Satan.

¹⁴ Sa gwar, mɨ niʼe bɨn bɨbaa bɨ ebebe. Byé etiibe ó e motɨɨ bʉʉ bʉr o mbɛr Zyɛm win lé edu ɨ. Bé edu sikʉlʉ mo Balam. Nye ó waa a gomlo Balak é bebebebe zi, tɨe nye lé ekol ebɔʼ bwa b'Ɨzraɛl, bé óbɨm é mɨleme e. Ebe, nyɛɛ Balak a sa ó: nʉa tir a pa bàŋɔ é mpah bé ndɨ edwiibɨ ozyɛm bé a dɨ kpaʼ ɛ, ze timle nye bwa b'Ɨzraɛl. Bɛɛ ntɔʼ de nye, ze saŋɔ nteme bɨmala.

¹⁵ Yé cyecye ó, bʉʉ bʉr o mbɛr Zyɛm win, bé esa mpʉ Nikola lé etɨe e.

¹⁶ Ebe no, gwɨma ga mobebe mɨn. Bɨn bé à dwir mɨleme. ǃBɨn si be, asa no nɛʼɛ, me ópyal bɨn ye é banana, ntɔʼ lwimla e bʉr baa lé ebɨlan e fòŋ lé eduho é nʉm wam ɨ.”

¹⁷ «No ó, mʉr ndɨ e mogwal mo ejoʼo e, nye joʼa mokan Sisim lé elɛɛ mɨmbɛr mɨ Zyɛm ɨ. Mʉr nyiwɛh óbe si ntaa, bula e l'esaa é koo e, me ódwe nye manne lé edi é l'efo e. Me ódwe nye nteme ekoʼ epumo e tila die le tɨ. Die laa, lé ó die edwan le. Nuu mʉr fih, nye abe e nkul egʉa le, nkʉ yé abe waa lé ebi le e.»

Kalara a cenɔ mbɛr Zyɛm ndɨ ɨ Tiatir ɨ

¹⁸ «Tila kalara. Go à cen engles lé edwiile mbɛr Zyɛm ndɨ ɨ Tiatir ɨ. Lɛŋɨ nye ó: Lɔɔ wi, wé eduho ó, é nʉm Mwan mo Zyɛm. Mih me, mé ó mpʉ njʉl siʼe; mokʉ me, mpʉ nkoho lé ebul pan ɨ. Nye e bɨn ó:

¹⁹ “Me egʉa syɛɛ yiyɛh bɨn lé esea ɛ, le kpɛl yin, le buʼo yin, ndwe e mɨngula bɨn lé esa bʉr ɨ. Me egʉa bihbe win. Bɨsyɛɛla bin byaa, byé mu ó si buo, laa byaa bɨn bé a taare sa-sa ɛ.

²⁰ Sa gwar, mɨ niʼe bɨn baa ebebe. Baa yaa, yé ó: bɨn bɨ nee Yezabɛl zi é l'esama lɨn. Nye egomlo bɨn é bebebebe zi é jɔʼ nye lé elɛɛ ó, nye ó mʉma ngwiha mɨlɔb ɨ. Nye edwe osyɛl o mosa bam sikʉlʉ bɨkʉʉŋʉ, ó bé saʼ bɨmala. Nye enyiŋ be ó, bé deʼ tir a pa bàŋɔ é mpah bé ndɨ edwiibɨ ozyɛm bé a dɨ kpaʼ ɛ.

²¹ Me a dwe nye jɔʼ ó, nye gwɨma bɨmala nye lé esa-sa ɛ, le edwir leme, nyɛɛ l'akpɛl sa no.

²² Ebe no ó me ójyɛʼ nye é duo esyɛb ɨ. Me nteme, me ósa ó, bʉrʉm lé esa mɨfyɛba e nye e, bɔma e mɨtuu é buobuo, alaa ó bé ógwɨma bɨsyɛɛla bɨ ebebe byɔɔ byaa, le edwir mɨleme.

²³ Me nteme, me ójʉ nye bwan. Ebe no ó mɨmbɛr mɨ Zyɛm mimyɛh, myé óka gʉa ó, mɛm ó ndɨ egʉa mɨpɛhla ndwe e bɨgwɨma bɨ bʉr ɨ. É mbɛr Zyɛm win, mʉr nyiwɛh ósa yiʼ syɛɛla nkʉ yʉʉ ɨ, me ójɛna nye syɛɛla ye ó, du mpʉ ye ndɨ ɨ.”

²⁴ No ó, bɨn, bʉr o ndɨ ɨ Tiatir, baa ndɨ ajoʼo bɨbla sikʉlʉ yiʼ ɨ, bɨn bé adu mɨfela bɨsikʉlʉ Satan lé edwe, byaa bʉʉ bʉr lé elɛɛ-lɛɛ ó, byé ó cyecye e. Me ako bɨn nuu mbeʼ modile fih.

²⁵ Sa ndɨ tɨʼ yé ó, baʼla ga sa bɨn ndɨ e ye e, to pyal é dobo me óbula ze e.

²⁶ Mʉr nyiwɛh óbe si ntaa, bula e l'esaa é koo, waa ósea syɛɛ yam, to pyal é l'esie e, me ódil nye é dia taʼa. Nye ójwɨʼ bʉr o bɨkul bibyɛh.

²⁷ Nye ópala-pala be ó e jwɨɨ é lele lele mpʉ ntum nkoho. Nye óbʉ be mpʉ mʉr lé ebʉ bɨdaala bɨ deʼe bɨtwiʼ bɨtwiʼ ɨ. Nye óbi nkul, duho é mobo mam é mpʉ me a nʉa nkul boo Sɔŋ wam ɨ.

²⁸ Me ódwe nye nteme atwitwɛn lé epan é molama mo mɛn ɨ.

²⁹ «No ó, mʉr ndɨ e mogwal mo ejoʼo e, nye joʼa mokan Sisim lé elɛɛ mɨmbɛr mɨ Zyɛm ɨ.»