Mɨngwiha 16 - Kálara Zyɛ̌m Edwán é mpʉ̌n

Empime mo Zyɛm

¹ Pie tɨ, me ze joʼo bwaʼbwaʼ twii lé eduho é l'Odia mo Zyɛm. Twii waa a lɛɛ e beengles tambɛl ó: «Nʉŋa ga mompele mɨn, maa dina mɨlwɨŋla e l'empime mo Zyɛm ɨ. Toʼ, to sʉ ga me si.»

² No nteme ó engles efoʼ a ze to e bele ye, to sʉ ye é si nwa. Bɨbebebebe mopɨɨ é kpaa kpaa, byé ntɔʼ pyal bʉr é monyʉl. Mopɨɨ, mé a pyal ó, baa b'a cɨma bɨtwii mo tir waa é monyʉl mɔɔ ɛ. Bé ó b'a dwiibɨ baŋabaŋa dweʼle ye.

³ Pie tɨ, engles mba ze to e bele ye, to sʉ ye si é maŋ. Modibe mo maŋ, mé ntɔʼ lihba bɨbuʼ motié, mpʉ motié mo muu. Bim bɨsɔʼɔ byé a be e tiʼ é maŋ ɨ, byé ntɔʼ sie lé edwè.

⁴ Jwɨʼ gwar yaa, engles lɛl, ze to e bele ye, to sʉ ye é mɨsʉm montibe ndwe e mono. Modibe maa mɨmɛh, mé ntɔʼ lihba motié.

⁵ Me ze joʼo engles lé ejwɨʼ montibe e maŋ ɨ, lé elɛɛ ó: «Da, go a bɛa ó be. Go nteme ó ndɨ. Go ó Waa ndɨ ti ɨ. Go ó cɨcyel mʉr, ebe, go a si tiʼe mɨlɔb myɔɔ mbi tiʼa winɨ,

⁶ ebe, bé a si kʉ jʉ mɨsaŋ mɨ bʉr myo ndwe e l'ogwiha o mɨlɔb bo. Motié mɔɔ, mɨ bul swɨɨ si. Ebe no nteme ó go a lɛɛ ojʉl bɔɔ ó, bé bɛbla motié e. Yé ó sa lé ekʉ jala e be e!»

⁷ Me ze joʼo mpɨha lé eduho é taa mɨndwɛa ó: «Yé ó no! Da Zyɛm Nkul nyiwɛh, go e l'ocyecye. Go etiʼe-tiʼe mɨlɔb ó, njɨ é l'ocɨcyel.»

⁸ Engles nâ to e ye bele, to sʉ ye é dobo. Dobo, lé ntɔʼ dweŋɔ nkul ó, lé diʼɨ bʉr e siʼe ye.

⁹ Jɔʼ bʉr, bé a diʼe no e, bé a si to dolo lé elwɨɔ Zyɛm, nyɛɛ mʉr a kab be bɨntɨʼa byaa ɛ. Bé a baamɛʼle egwɨma mobebe mɔɔ, nkʉ dwir mɨleme, nkʉ dwiibɨ nye.

¹⁰ Engles tɛn to e ye bele, to é dia taʼa mo tir waa, to sʉ ye tɨ. Edurʉ ntɔʼ fila é lal tir a jwɨ̀ʼ we e. Bʉr o lal waa, bé a dɨ koʼlo ó bɨjɨm é mɨtuu myɔɔ.

¹¹ Dam be no, bé a baagwɨma bɨsyɛɛla bɨ ebebe byɔɔ, nkʉ dwir mɨleme. Bé a si to dolo lé elwɨɔ Zyɛm, nyɛɛ mʉr ndɨ é jobo kʉ ɨ. Bé a sa no ó ebe mokpaa ndwe e mopɨɨ mɔɔ.

Moleme molɛl

¹² Engles tobo ze to e ye bele, to sʉ ye é dibe nɨnɨ, die Efrat. Jɔʼ nye a sʉ ye si ɨ, dibe yaa ntɔʼ jwɨl. Dibe yaa, yé a jwɨl no ó, lé entɛŋ mɨnjwɨɨbʉr myé óduho nko dobo lé emʉa ɛ.

¹³ Me a bee nteme ó bɨbɨbla mɨsisim mɨlɛl. Myé a nwɨɨla ó e baadwam. Yiʼ bɨbla sisim, yé a duho ó, é nʉm kʉʼrʉ myɔɔ. Yʉʉ, yé a duho ó, é nʉm tir monyan waa. Yʉʉ yɛɛ, é nʉm mo mpʉmpʉl ngwiha mɨlɔb.

¹⁴ Moleme maa, mé eto le esa bɨdweʼle bɨ nkul wɔɔ, le eto boo ojwɨʼa o si nwaʼ nyiwɛh, lé ebaŋle be ó, bé syɛŋɨ monkul mɔɔ é l'efu le elʉo dɔm. Bé ólwimla ó e Zyɛm Nkul nyiwɛh é moho nɨnɨ we.

¹⁵ Tî ga wina, nye elɛɛ ó: «Mbe ga, me ó ma ze nɨ! Me ópyal bɨn ye ó, mpʉ ndiblʉ, mʉr abuʼla. Mocyɛʼ mo mpom, mé óswɨɨ é waa ndɨ edi nkehe, mɨkan mɨmbœra é nyʉl ɨ. Nyɛɛ, nye aŋa nyin fufwah, nkʉ sɔma.»

¹⁶ Bé a si syɛŋa nteme no, é duò dɔm bé lé ejebe é lwib ebrœ ó, Armagedɔn ɨ.

¹⁷ Engles tambɛl ntɔʼ to e bele ye, to sʉ ye é pubo. Bwaʼbwaʼ twii ze duho é dia taʼa ndɨ é l'odia mo Zyɛm ɨ. Nye ó: «Yi ka sie!»

¹⁸ Me ze bee mɨndweh é keb-keb, joʼo mɨndum mɨ mpie é nkʉʉʉ, joʼo nteme mpâm nkɛl-jobo lé esala «kaaa». Si ze ncyeŋa é buobuo. Ngbàa bʉr, bé a cyeŋɔ, bé apa bee si lé encyeŋa é mbi nɨ.

¹⁹ Nkana nɨnɨ yaa, yé ntɔʼ bwiʼ, ze bʉl mɨmyal mɨlɛl. Bɨnkana bɨfih é myʉʉ mɨlal nteme, byé a si duma si. Zyɛm a be ó si toŋlo bɨsyɛɛla mo Babilɔn, nkana nɨnɨ. Nye ntɔʼ kab nye bɨntɨʼa, lé edu mpʉ leme we, wé a loŋlo e l'empime é lurʉdʉ ɨ.

²⁰ É maŋ, mine mé a be tɨʼ ɨ, mé ntɔʼ dim é mih, myaŋɔ é modibe. Mocwɨʼ, mé a baaka be.

²¹ Motana é bwaʼbwaʼ ze duho é jobo kʉ, nkaŋa bʉr é monyʉl. Mé a be ó é dile dile, etana egwar kwoʼ be okilo mowʉm monâ. Bʉr ntɔʼ bâʼle ze lwɨɨ Zyɛm ebe ntɨʼa yaa, ebe, bɨbwaʼbwaʼ motana maa, mé ó b'a bul ntɨʼ bʉr, laa byʉʉ bɨntɨʼa bibyɛh.