Mɨngwiha 13 - Kálara Zyɛ̌m Edwán é mpʉ̌n

Otir o monyan oba

¹ Myɔɔ waa ntɔʼ to cyɛb é pɨn maŋ. No ó, me a si bee tir lé eduho é modibe mo maŋ. Nye a be ó e mɨlʉ tambɛl ndwe e bɨntoo ewʉm. Mopʉʼlʉ mɨnjwɨɨbʉr, mé a be ó mɨpɛna é bɨntoo bibyɛh. É lʉ wiwɛh, bé a si tile yʉʉ bɨbla die, mie maa mɨmɛh lé epyeh Zyɛm.

² Tir waa a be ó mpʉ nkœœ. Motam me, mé a be ó mpʉ maa mo ours. Nʉm we, wé a be ó mpʉ nʉm ngbampwɨɨ. Kʉʼrʉ myɔɔ, wé a si dwe tir waa nkul we, ndwe e dia taʼa ye, ndwe e bwaʼbwaʼ nkul mojwɨ̀ʼa.

³ Guu lʉ paʼra mɨlʉ tambɛl mɨ tir waa, wé a be ó e boʼo pɨɨ. To kœb ó, pɨɨ waa a si bana dwele! Bʉr o si nwaʼ bɨbɛh ntɔʼ jehe nye, ka ze duŋɔ nye.

⁴ Bʉr bɨbɛh, bé a si dwe kʉʼrʉ myɔɔ kum, ebe, wé ó b'a dwe tir waa nkul mojwɨ̀ʼa we. Bé a be ó lé edwiibɨ nteme tir waa nye mʉr tɨ. Bé ó: «Zé nyɛɛ lé enwɨɨla e tir nwa? Zé nteme ndɨ e nkul elwimla e nye, ntaa nye é nkul?»

⁵ Tir waa a dweŋɔ nkul ó, nye dweʼ nye mʉr tɨʼ mosʉm ndɨ elɛʼle Zyɛm pyeh e. Nye a dweŋɔ nkul esa no ó, tɔɔ ongɔn mowʉm monâ e l'oba.

⁶ No ó nye a ka to le epyeh kubo mo Zyɛm, le elwɨɨ die le, le epyeh Odia mo Zyɛm, ndwe e bʉr bɨbɛh lé edi é jobo e.

⁷ Nye ze dweŋɔ nkul elʉo dɔm e mɨsaŋ mɨ bʉr mo Zyɛm le entaa mye é nkul. Nye a dweŋɔ nteme ó, nkul ejwɨʼ bʉr o moveh mɨmɛh, bʉr o mɨlal mimyɛh, bʉr o bɨlwib bibyɛh, ndwe e bʉr o bɨkul bibyɛh.

⁸ No ó, odil o si nwaʼ bɨbɛh, bé ódwiibɨ tir waa, pɛʼ njɨ baa Zyɛm a bɛa tile mie mɔɔ é kalara tiʼ we e. Kalara waa a bɛa be tila ó, duho é l'etɛɛrɨ e si nwaʼ ɛ. Nye ó é mobo mo Ma Ntœme bé a bɛa jʉ ɨ.

⁹ Mʉr nyiwɛh ndɨ e mogwal mo ejoʼo e, nye joʼa naa.

¹⁰ «Zyɛm, nye elɛɛ ó: “Yé be ó, yé ó tila ó, mʉr fih mʉr kɛ̀l ó jala le eto é l'okomo nɛʼɛ, nye óbana to. Yé be ó, yé ó tila ó, mʉr fih mʉr kɛ̀l ó jala le ejʉŋɔ e fòŋ nɛʼɛ, nye nteme óbana jʉŋɔ e fòŋ.”» (Wâʼ é gumo yi, yé elɛʼle ó, yé ejala é nko paʼ mɨsaŋ mɨ bʉr mo Zyɛm ó, bé diʼe nteme e bihbe ndwe e buʼo.)

¹¹ Me ze bee nuu tir monyan fih, nyɛɛ lé epyal é bɨbwah. Nyɛɛ a be ó e bɨntoo bɨba. Bɨntoo bye, byé a nwɨɨla ó e byaa bɨ Ma Ntœme. Nye a lwib-lwib ó mpʉ kʉʼrʉ myɔɔ.

¹² Nkul mojwɨ̀ʼa we a be ó mpʉ nkul tir monyan efoʼ. Nye a sea-sea syɛɛ ye ó, é mih mo tir monyan efoʼ waa. Nye ó b'a sa ó, odil o si nwaʼ bɨbɛh, bé dwiibɨ tir waa. (Tir monyan waa ó b'a be e boʼo pɨɨ é lʉ, a dwele e.)

¹³ Tir monyan a pyal é bɨbwah ɛ, ze sa bɨbwaʼbwaʼ bɨdweʼle bɨ nkul we, lé esa nteme ó, siʼe, yé duha é jobo kʉ, njʉl tɨʼ ze buma é si nwa, é mih mo bʉr bɨbɛh,

¹⁴ ebe, nye a si dweŋɔ nkul esa bɨdweʼle bɨ nkul we no é mih mo tir monyan efoʼ waa. Nye egomlo odil o si nwaʼ bɨbɛh é bebebebe zi é lɔb esa be mosima. Nye elɛɛ e be ó, bé kpaʼa dweʼle yé ónwɨɨla e tir monyan efoʼ, waa a pa kparɔ e fòŋ, nyɛɛ l'adwè e.

¹⁵ Tir waa a be ó si dweŋɔ nkul ó, nye gumla ngul we é dweʼle yaa, ó yé lwibɨ, ndwe nteme, yé jʉʼo bʉr bɨbɛh bé a bene dwiibɨ ye e.

¹⁶ No nteme ó nye a lɛɛ mɨmbi mɨ bʉr bɨbɛh ó, bé cɨma bɨtwii bye é koo ekœh é mbo ejʉm, nkʉ ɨ nceʼe. Nye a lɛɛ ó, taare é baanteʼenteʼe, to pyal é l'osabene, taare é baanteʼenteʼe o bʉr, to pyal é l'obil o bɨsa, taare é molʉa, to pyal é bʉr o ndɨ é dia otî ɨ.

¹⁷ Mʉr nyiwɛh a baacɨmɔ twii yaa ɛ, a baabe e nkul eka bwam, nkʉ bɛma yʉʉ sɔʼɔ é mompɛma. Twii yaa, yé ó bɨkaŋa motɔɔ. Yé elɛʼle die e tir monyan efoʼ.

¹⁸ Wâʼ é gumo yi, yé ejɨ ó, mʉr lé ekpɛl gʉa die laa ɛ, diʼe cɨcyoo. ǃƗ mʉr si bi ocyoo waa nɛʼɛ, nye gʉŋa sa bɨkaŋa byaa lé elɛɛ ɛ. Byé elɛʼle mbi mʉr tir waa ndɨ ɨ. Tɔɔ we, nye ó mɨnter tobo e mowʉm tobo le tobo (666).